ပလိၵ်ႈတီႉလႆႈ ၸၢဝ်းၶႄႇ 4 ၵေႃႉ ဢၼ်လၵ်ႉၶဝ်ႈမိူင်းမႃးလႄႈ တီႉလႆႈပႃးၵူၼ်းႁပ်ႉတေႃႉသူင်ႇၶဝ်ပႃး တီႈၸႄႈဝဵင်းမိူင်း ယွင်း ၸႄႈတွၼ်ႈမိူင်းၽျၢၵ်ႈ ၸိုင်ႈတႆးပွတ်းဢွၵ်ႇ။

ဝၼ်းတီႈ 5/6/2019 ယၢမ်းၵၢင်ၼႂ် 7:45 မူင်းၼၼ်ႉ တပ်ႉသိုၵ်းမၢၼ်ႈ တင်း ပလိၵ်ႈၸႄႈဝဵင်းမိူင်းယွင်း ၵူတ်ႇထတ်း တီႉ ၺွပ်းလႆႈ တီႈလၢၼ်ႇၵဵပ်းငိုၼ်း တၢင်းၶဝ်ႈၸႄႈဝဵင်းမိူင်းယွင်း။

သိုဝ်ႇၶၢဝ်ႇ Myanmaalinn ဢွၵ်ႇဝႃႈ “ ၵူၼ်းႁေႃႈၵႃးၼၼ်ႉ ပဵၼ်ၸၢႆးဢွင်ႇ ဢႃယု 22 ပီ လႆႈထဵတ်ႈထၢမ်မၼ်းၸၢႆးသေ လႆႈႁူႉ ဝႃႈ မၼ်းၸၢႆးလႆႈႁပ်ႉၵႃႈၸၢင်ႈ ၼိုင်ႈၵေႃႉလႂ် 1,500 ယွၼ် ငိုၼ်းၶႄႇ (မွၵ်ႈသၢမ်သႅၼ်ပျႃးငိုၼ်းမၢၼ်ႈ)၊ ၵူၼ်းၸၢဝ်းၶႄႇ 4 ၵေႃႉၼႆႉ လႆႈႁပ်ႉတီႈတႃႈၶီႈ လဵၵ်းမႃး တေတေႃႉသူင်ႇၵႂႃႇတၢင်း ၼႃႈလိၼ်ၶိုၵ်ႉတွၼ်းမၢႆ 4 တၢင်းပွတ်းၼမ်ႉပၢၼ်းၼၼ်ႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းပလိၵ်ႈၶဝ် လႆႈပိုတ်ႇလိူင်ႈလၢဝ်း ၵူၼ်းၸၢဝ်းၶႄႇ 4 ၵေႃႉ လၵ်ႉၶဝ်ႈမိူင်းဢမ်ႇ ပဵၼ်တၢင်းၵၢၼ်လႄႈ ပႃးၵူၼ်းၵိၼ်ၸၢင်ႈႁပ်ႉတေႃႉသူင်ႇ ၸၢႆးဢွင်ႇ ဝႆႉတီႈႁူင်းပလိၵ်ႈ ၸႄႈဝဵင်းမိူင်းယွင်း ၸွမ်းၼင်ႇပၵ်း ပိူင် မၢႆမီႈ ဝၢၼ်ႈမိူင်းမီးၼၼ်ႉ ဝႃႈၼႆ။

ၶေႃႈမုလ်း – ႁွင်ႈၵၢၼ်ၾၢႆႇပွင်ႇၶၢဝ်ႇၸႄႈဝဵင်း/ Myanmaalinn