လုၵ်ႈဢွၼ်ႇႁဵၼ်းၸွမ်းဝၢၼ်ႈၼွၵ်ႈၼႃးပၢင်ႇလႄႈ ပႃးၸဵမ်ၼႂ်းဝဵင်း ၸိူဝ်းယၢပ်ႇၽိုတ်ႇတႃႇၵႂႃႇႁူင်းႁဵၼ်း ဢၼ်ယူႇၵႆတင်း ႁူင်းႁဵၼ်း မွၵ်ႈ 2 ၵီႊလူဝ်ႊ ၼၼ်ႉ ယူႇတီႈၸုမ်း Lesswalk တေၸႅၵ်ႇပၼ်ရူတ်ႉထိပ်ႇ။
ဢူးတၢၼ်းထုၼ်းဝိၼ်း ၽူႈၵေႃႇတင်ႈၸုမ်း Lesswalk တႅမ်ႈတၢင်ႇဝႆႉ ၼိူဝ်ၾဵတ်ႉပုၵ်ႉမၼ်းဝႃႈ “ ၶွမ်ႊပၼီႊရူတ်ႉထိပ်ႇ တီႈမိူင်းသိင်ႇၵပူဝ်ႇလႄႈ မလေးသျိူဝ်ႊၼၼ်ႉ ယုၵ်ႉလိူၵ်ႈၵၢၼ်ငၢၼ်းၶဝ်လႄႈ ရူတ်ႉထိပ်ႇၶဝ်ၸိူဝ်းပဵၼ် သႅၼ်း ofo လႄႈ oBike တင်းမူတ်း 1 မိုၼ်ႇလမ်းၼၼ်ႉ တေဢဝ်မႃးတွၼ်ႈပၼ်လုၵ်ႈဢွၼ်ႇႁဵၼ်း ဢၼ်ၶိုၼ်ႈႁူင်းႁဵၼ်းၼႂ်းမိူင်းႁူမ်ႈတုမ် လူင်ပွင် ၸိုင်ႈၵႂႃႇ” ဝႃႈၼႆ။
လိူဝ်ၼၼ်ႉ တႅမ်ႈဝႆႉထႅင်ႈဝႃႈ “ ရူတ်ႉထိပ်ႇၸိူဝ်းၼႆႉ တေၸႅၵ်ႇပၼ် လုၵ်ႈႁဵၼ်းၸၼ်ႉဢွၼ်ႇ ဢၼ်လႆႈပႆတၢင်း မႃးၶိုၼ်ႈ ႁူင်းႁဵၼ်း တၢင်းၵႆ 1 လၵ်းပၢႆ ၸိူဝ်းၼၼ်ႉ” ဝႃႈၼႆ။
ၵႃႈရူတ်ႉထိပ်ႇလႄႈ ၵႃႈတၢင်ႇမႃးထိုင်မိူင်းမၢၼ်ႈ တေတူၵ်းၼႂ်းၵႄႈ 35,000 သႅၼ်ၻေႃႊလိူဝ်ႊထိုင် 4 သႅၼ်ၻေႃႊလိူဝ်ႊ (မွၵ်ႈ 6,000 သႅၼ်ပျႃး)။ ၶိုင်ႈၼိုင်ႈတႄႉ ယူႇတီႈၽူႈၵမ်ႉထႅမ် (သပွၼ်ႊသိူဝ်ႊ) ပၼ်ၵူႈယိုမ်ဝႆႉ။ တွၼ်ႈတႃႇထႅင်ႈၶိုင်ႈၼိုင်ႈ တႄႉ ယူႇတီႈ ၸုမ်း Lesswalk ၵေႃႉဢွၵ်ႇ ဝႃႈၼႆ။
တေႃႈလဵဝ် ရူတ်ႉထိပ်ႇၸိူဝ်းၼႆႉ လႆႈတၢင်ႇႁိူဝ်း(သၢင်းၽေႃးလူင်) မႃးထိုင် မိူင်းႁူမ်ႈတုမ်ယဝ်ႉ သၢမ်ႁဵင်လမ်း၊ ဢၼ်ၵိုတ်း ထႅင်ႈ ၸိူဝ်းၼၼ်ႉတႄႉ လိူၼ်ၵျုၼ်ႊၼႆႉသဵင်ႈ ၸုပ်ႈၼိုင်ႈ ပီ 2019 ၼႆႉသဵင်ႈၸုပ်ႈၼိုင်ႈ မုင်ႈမွင်းဝႃႈ တေႁွတ်ႈၽႅဝ်မႃးသေ တေၸၢင်ႈၸႅၵ်ႇယိုၼ်ႈပၼ်လုၵ်ႈဢွၼ်ႇႁဵၼ်းၵႂႃႇယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ