ႁႅင်းၵၢၼ်ယၢၼ်မိူင်း ပီႈၼွင်ႉတႆး ဢၼ်ႁဵတ်းၵၢၼ်တီႈ ၵုင်းထဵပ်ႈ ၵေႃႉၼိုင်ႈ ရူတ်ႉၶိူင်ႈ ၽႃႇသဝ်ၾႆးၾႃႉ ပဵၼ်ၽေးဢု ပၢတ်ႈသေ လႆႈမၢတ်ႇၸဵပ်းႁၢဝ်ႈႁႅင်း လႆႈ သူင်ႇယူတ်းယႃတူဝ် တီႈႁူင်းယႃ ႁူပ်ႉလွင်ႈယၢပ်ႇၽိုတ်ႇၵိၼ်းၸႂ် ၵႃႈယူတ်းယႃ။
ပူၼ်ႉမႃး မိူဝ်ႈဝၼ်းတီႈ 30/05/2019 ယၢမ်းၵၢင်ၶမ်ႈ 9 မူင်းပၢႆၼၼ်ႉ ၸၢႆးသၢင်ႇဢုင်း ဢႃယု 31 ပီ ႁေႃႈရူတ်ႉၶိူင်ႈဝႄႈ ရူတ်ႉထိပ်ႇ 3 လေႃႉဢၼ်ပၼ်ႇႁပ်ႉၸၢင်ႈၵူၼ်းၼၼ်ႉ ရူတ်ႉၶိူင်ႈလူမ်ႉသေ ၾႃႇသႂ်ႇသဝ်လၵ်းၾႆး ႁိမ်းၶၢင်ႈတၢင်း သဵၼ်ႈ တၢင်း ဝတ်ႉရၢမ်း ၼႂ်းၵႄႈသွႆး 8 တင်း သွႆး 6 ဝဵင်းလူင်ၵုင်းထဵပ်ႈ(မိူင်းၵွၵ်ႇ) ၸိုင်ႈထႆး။
ၼၢင်းၽိမ်း ၵေႃႉပဵၼ်မေးၼၢင်း ၸၢႆးသၢင်ႇဢုင်း လၢတ်ႈတီႈၽူႈတွႆႇႁွၵ်ႈဝႃႈ “ ၽူဝ်ၶႃႈ လုၵ်ႉတီႈႁဵတ်းၵၢၼ်သေ ႁေႃႈရူတ်ႉ ၶိူင်ႈ ပွၵ်ႈမႃးႁိူၼ်း မႃးဝႄႈရူတ်ႉထိပ်ႇႁပ်ႉၸၢင်ႈ 3 လေႃႉၼၼ်ႉသေ လႆႈလူမ်ႉၵႂႃႇ ၽႃႇၺႃးသဝ်းၾႆးၾႃႉ ႁိမ်းၶၢင်ႈတၢင်း ၼၼ်ႉၶႃႈ။ ဢွင်ႈတီႈဢၼ်ပဵၼ်ၼၼ်ႉ ၾႆးၾႃႉဢမ်ႇလႅင်း၊ ယဝ်ႉၵေႃႈၾူၼ်ၵေႃႈတူၵ်း။ ၶဵဝ်ႈမၼ်းၸၢႆးႁူင်ႈမူတ်း၊ လုပ်ႈၵၢင်း ၵေႃႈႁၵ်းၶႃႈ။ တေႃႈလဵဝ် ႁဝ်းၶႃႈ ႁူပ်ႉလွင်ႈယၢပ်ႇၽိုတ်ႇၵိၼ်းၸႂ် လွင်ႈၵႃႈၸႂ်ႉၸၢႆႇ တႃႇယူတ်းယႃ မၼ်း ၸၢႆးၶႃႈဢေႃႈ။ ငိုၼ်းလိူၼ်ၵေႃႈ ဢမ်ႇပႆႇလႆႈ ” ဝႃႈၼႆ။
ၸၢႆးသၢင်ႇဢုင်းၼႆႉ ဢႃယုလႆႈ 31 ပီ ပဵၼ်ၵူၼ်းၸႃတိ ဝၢၼ်ႈၵွင်းၶဵဝ် ဢိူင်ႇၵုၼ်ၵွၵ်ႇ ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။ ပဵၼ်လုၵ်ႈၸၢႆး လုင်းသၢင်ႇမွင်ႇလႄႈ ပႃႈၶမ်းသူၺ်ႇ ဝႃႈၼႆ။
ၼၢင်းၽိမ်း လၢတ်ႈဝႃႈ “ တေႃႈလဵဝ် ပႆႇၶႅၼ်းၶႃႈ တိုၵ်ႉယူတ်းယႃတူဝ်ယူႇ တိၵ်းတိၵ်းၶႃႈ။ ႁဝ်းၶႃႈသဵင်ႈငိုၼ်းၵႂႃႇ 6-7 မိုၼ်ႇ ဝၢတ်ႇယဝ်ႉၶႃႈ။ တႃႇတေသိုပ်ႇယူတ်းယႃၵႂႃႇထႅင်ႈၼၼ်ႉ ၶႃႈႁဝ်းဢမ်ႇမီးငိုၼ်းယဝ်ႉ ယၢပ်ႇၵိၼ်းၶၢၼ်ၸႂ် လွင်ႈငိုၼ်းတွင်း ၵႃႈယူတ်းယႃတႄႉတႄႉၶႃႈ။ ယွၼ်းပိုင်ႈဢိင် ပီႈၼွင်ႉတႆး ၼႂ်းမိူင်းထႆးၵူႈၵေႃႉၵူႈၵူၼ်းသေ ၵမ်ႉၸွႆႈထႅမ် ပၼ်ႁဝ်းၶႃႈၽွင်ႈ” ဝႃႈၼႆ။
တေႃႈလဵဝ် ၸၢႆးသၢင်ႇဢုင်းၼႆႉ လႆႈယူတ်းယႃတူဝ်ဝႆႉတီႈႁူင်းယႃ ပၢၵ်ႇၼမ်ႉ ၼႂ်းဝဵင်းၵုင်းထဵပ်ႈ။ မၢတ်ႇၸဵပ်း ၸွမ်းသူပ်း၊ ၸွမ်းၶေႃး၊ ၵွၵ်းႁူဝ်လႄႈ လုပ်ႇၵၢင်းႁၵ်း ၸဵမ်ၸိူဝ်းၼႆႉ ဝႃႈၼႆ။
ၸၢႆးသၢင်ႇဢုင်း တင်း ၼၢင်းၽိမ်းၼႆႉ မီးလုၵ်ႈႁူမ်ႈၵၼ် 2 ၵေႃႉ ၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ။ ၵေႃႉယႂ်ႇ ဢႃယု လႆႈ 6 ၶူပ်ႇလႄႈ ၵေႃႉလဵၵ်ႉသမ်ႉ ဢႃယု တိုၵ်ႉလႆႈ 11 လိူၼ်။ မၼ်းၸၢႆး ႁဵတ်းၵၢၼ်ၵိၼ်ၸၢင်ႈတႃးသီ။
သင်ဝႃႈ ပီႈၼွင်ႉၵေႃႉလႂ် ၽူႈလႂ်သေဢမ်ႇဝႃႈၶႂ်ႈၸွႆႈထႅမ် ၵႃႈယူတ်းယႃ ၸၢႆးသၢင်ႇဢုင်းၼႆၸိုင် သူင်ႇလႆႈတီႈမၢႆယေးငိုၼ်း ၵႃႊသီႊၵွၼ်ႊ 079-2-18626-4 (Mr. AUNG OHN)။ ဢမ်ႇၼၼ် ၵပ်းသိုပ်ႇလႆႈတီႈ ၼၢင်းၽိမ်း ၵေႃႉပဵၼ်မေးၼၢင်း ၸၢႆးသၢင်ႇဢုင်း မၢႆၾူၼ်း 062-681-029-2 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ