ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းတီႉၺွပ်းလႆႈ ယႃႈမႃႉ တီႈတၢင်းၶဝ်ႈသႅၼ်ဝီ တႃႇၵႃႈၶၼ်ငိုၼ်း သၢမ်မိုၼ်ႇ သႅၼ်ပျႃး ဢဝ်သႂ်ႇၵႃးမႃး လုၵ်ႉတၢင်းၵူတ်ႉၶၢႆ မႃးတၢင်းသႅၼ်ဝီၼၼ်ႉ ဝႃႈၼႆ။
ဝၼ်းတီႈ 04/06/2019 ယၢမ်းၵၢင်ၶိုၼ်းမွၵ်ႈ 11 မူင်းၶိုင်ႈ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းၵႃးလမ်းၼိုင်ႈ တီႈႁိမ်းလၢၼ်ႇၵဵပ်းငိုၼ်းဢူဝ်ႊရီႊယၼ်ႊထိူဝ်ႊၵဵတ်ႊ တၢင်းၶဝ်ႈဝဵင်းသႅၼ်ဝီ သဵၼ်ႈတၢင်းမူႇၸေႊ – ဝဵင်းလိူဝ်ႇ ၼႂ်းၸႄႈ ဝဵင်းသႅၼ်ဝီ ၸိုင်ႈတႆးပွတ်းႁွင်ႇ တီႉလႆႈယႃႈမႃႉ၊ ယႃႈမဝ်းၵမ်။
ႁွင်ႈၵၢၼ်ၾၢႆႇၽဵဝ်ႈမူၺ်ႉယႃႈမဝ်းၵမ် CCDAC Myanmar ပိုၼ်ၽၢဝ်ႇဝႆႉဝႃႈ “ ယႃႈမႃႉၼႆႉ ႁေႃႇၸေႈပူၵ်ႉထူင်ယၢင်သေ သႂ်ႇၵႃး လုၵ်ႉ တၢင်းၵူတ်ႉၶၢႆမႃး။ ၼႂ်းၵႃးၼၼ်ႉ ၵူၼ်းမႃးၸွမ်းၵၼ် 2 ၵေႃႉ။ ၵေႃႉၼိုင်ႈၸိုဝ်ႈႁွင်ႉ ဢၢႆႈပီး ဢႃယု 33 ပီ တီႉ ၺွပ်းၵုမ်း ၶင်တူဝ်ဝႆႉ။ ထႅင်ႈၵေႃႉၼိုင်ႈ ၸိုဝ်ႈႁွင်ႉ ယၢၼ်ႇသၢၼ်းၼၼ်ႉတႄႉ ပၢႆႈလွတ်ႈဝႆႉ” ဝႃႈၼႆ။
လိူဝ်ၼၼ်ႉ တီႉၺွပ်းလႆႈပႃးထႅင်ႈ ငိုၼ်းမၢၼ်ႈ 2 သႅၼ်ပျႃးလႄႈ ၾူၼ်း 1 လုၵ်ႈ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈ ပိုတ်ႇလိူင်ႈလၢဝ်း ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
ၶေႃႈမုလ်း – CCDA Myanmar
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ