ႁၢၼ်ႉၶၢႆၶမ်း ၼၢင်းၼၢင်းဝုၼ်းၵႅဝ်ႈ မၢႆ 2 ဢၼ်မီး တီႈပွၵ်ႉမႄႈၶၢဝ် ဝဵင်းတႃႈၶီႈလဵၵ်း ၺႃးၵူၼ်းႁၢႆႉၶဝ်ႈၸူၼ် သုမ်းၸွမ်း 2,000 သႅၼ်ပၢႆ။
ဝၼ်းတီႈ 03/06/2019 ယၢမ်းဝၢႆးဝၼ်း 2:45 မူင်းၼၼ်ႉ ႁၢၼ်ႉၶၢႆၶမ်း “ၼၢင်းၼၢင်းဝုၼ်းၵႅဝ်ႈ” ၶွင်ၸၢႆးဢၢႆႈဝုၼ်း လႄႈ ၼၢင်းမူဝ်း ဢၼ်ပိုတ်ႇဝႆႉတီႈၼိူဝ်သဵၼ်ႈတၢင်း မိူင်းႁူမ်ႈတုမ် တီႈပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ၶူင်းၼၼ်ႉ မီးၽူႈၸၢႆး 2 ၵေႃႉ ပူၵ်ႉၼႃႈပူၵ်ႉတႃသေ ဢဝ်ၵွင်ႈၸမ်ႈငႃလွၵ်ႇငိုတ်ႈ ၸူၼ်ဢဝ်ၶမ်းၵႂႃႇတင်းၼမ်လၢႆ။
ၽူႈမီးပုၼ်ႈၽွၼ်း ပလိၵ်ႈ ၸႄႈဝဵင်းတႃႈၶီႈလဵၵ်း လၢတ်ႈဝႃႈ “ ၵူၼ်းၸၢႆး 2 ၵေႃႉၼၼ်ႉ ပူၵ်ႉၼႃႈသေ ၶီႈရူတ်ႉၶိူင်ႈမႃး။ ၵေႃႉ ၼိုင်ႈ ယိပ်းၵွင်ႈပွတ်း၊ ထႅင်ႈၵေႃႉၼိုင်ႈ ယိပ်းလဵၵ်းလႅမ်။ ၶဝ် 2 ၵေႃႉၼႆႉ ၶဝ်ႈၵႂႃႇၼႂ်းႁၢၼ်ႉၶၢႆၶမ်းၼၼ်ႉသေ ဢဝ်ၵွင်ႈၸမ်ႈ ငႃ ၸူၼ်ဢဝ်ၶမ်းၼႂ်းႁၢၼ်ႉၼၼ်ႉၵႂႃႇ” ဝႃႈၼႆ။
ၶမ်းဢၼ်ၵူၼ်းႁၢႆႉ ၸူၼ်ဢဝ်ၵႂႃႇၼၼ်ႉ ပႃးၵႂႃႇသၢႆၶေႃးၶမ်း 130 သဵၼ်ႈ၊ ဝႅၼ်ၶမ်း 16 ဢၼ်။ ႁူမ်ႈၵၼ်တင်းမူတ်း ၶၼ် ငိုၼ်း (249,410,000) ပျႃး ဝႃႈၼႆ။
ၵဵဝ်ႇၵပ်းလွင်ႈၼႆႉ ၸၢႆးဢၢႆႈဝုၼ်း ၸဝ်ႈၶွင်ႁၢၼ်ႉၶမ်း လႆႈၸႅင်ႈပလိၵ်ႈဢဝ်လိူင်ႈ ၵူၼ်းႁၢႆႉ(ၸူၼ်) 2 ၵေႃႉၼၼ်ႉသေ ပၼ်တူတ်ႈတၢမ်ႇၵႂႃႇ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ၵႆႉမီး လွင်ႈၵၢၼ်ၸူၼ်ႁၢၼ်ႉၶၢႆၶမ်းလႄႈ လွင်ႈယိုဝ်းၵၼ်တၢႆ ၸွမ်းသဵၼ်ႈတႃႈသၢႆတၢင်း ၸိူဝ်းၼႆႉ ၵူၼ်းမိူင်း ပဵၼ်ဢၼ်မႆႈၸႂ် ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 29 လိူၼ်မၢတ်ႉၶျ်ၼၼ်ႉ မီးၽူႈၸၢႆး 6 ၵေႃႉ ၶဝ်ႈၸူၼ်တီႈႁၢၼ်ႉၶၢႆၶမ်း ၼၢင်းၼၢင်းဝုၼ်းၵႅဝ်ႈ (မၢႆ -1) တီႈပွၵ်ႉသၼ်သၢႆး(ၵ) ၸႄႈဝဵင်းတႃႈၶီႈလဵၵ်း ပႃးၵႂႃႇၶမ်း 80 ၵျၢပ်ႈ၊ သႅင်ၸိင်ႇ ၶၼ်ငိုၼ်း 20 သႅၼ်ဝၢတ်ႇ(ငိုၼ်းထႆး)၊ ငိုၼ်းထႆး ထႅင်ႈ 20 သႅၼ်ဝၢတ်ႇလႄႈ ၾူၼ်း 7 လုၵ်ႈ ဝႃႈၼႆ။
မိူဝ်ႈဝၼ်းတီႈ 29 လိူၼ်မၢတ်ႉၶျ်ပူၼ်ႉမႃးၼႆႉ ပလိၵ်ႈ(ယေး) တႃႈၶီႈလဵၵ်းပိုၼ်ၽၢဝ်ႇဝႃႈ တီႉၺွပ်းလႆႈ ၵူၼ်းဢၼ်ၵဵဝ်ႇၶွင်ႈ မၼ်း 3 ၵေႃႉယဝ်ႉ။ ၼႂ်းၼၼ်ႉ ပႃးၵူၼ်းမိူင်းထႆး ၵေႃႉၼိုင်ႈ ဝႃႈၼႆ။
