ၼၢင်းမူဝ်းမူဝ်းဢေး ဢႃယု 35 ပီ ႁဵတ်းၽိုၼ်လိၵ်ႈမိူၼ်ၸုမ်းယိပ်းၵွင်ႈၵၢင်ႇသေၸုမ်းၸုမ်း တွၵ်ႇမိၵ်ႈမၢႆလၢဝ် 5 လုၵ်ႈသေ လွၵ်ႇငိုတ်ႈ ၵဵပ်းယွၼ်းငိုၼ်း ႁၢၼ်ႉၶၢႆၶူဝ်း ၸွမ်းသဵၼ်ႈတၢင်းလူင် ၼႂ်းၸႄႈဝဵင်းသႅၼ်ဝီ။
ဝၼ်းတီႈ 02/06/2019 ၼၼ်ႉ ပလိၵ်ႈၸႄႈဝဵင်းမူႇၸေႊ လႆႈႁပ်ႉႁူႉၶၢဝ်ႇ တေမီးၵူၼ်းမႃးႁပ်ႉငိုၼ်း တီႈႁူင်းသဝ်း ၼမ်ႉမၢဝ်း ၶမ်း ပွၵ်ႉႁူဝ်မူၼ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇသေ ၵႂႃႇမူၵ်းပႂ်ႉတူၺ်းဝႆႉလႄႈ တီႉၺွပ်းလႆႈမၼ်းၼၢင်း။
သိုဝ်ႇၶၢဝ်ႇ Myanmaalinn ၶွင်လူင်ပွင်ၸိုင်ႈ ဢွၵ်ႇဝႆႉဝႃႈ “ မၼ်းၼၢင်းႁဵတ်းလိၵ်ႈ မိူၼ်ၸုမ်းယိပ်းၵွင်ႈၵၢင်ႇသေ လွၵ်ႇငိုတ်ႈ သူင်ႇၸူးႁၢၼ်ႉ ၶၢႆၶူဝ်း ၼႂ်းဝဵင်းသႅၼ်ဝီ။ ႁႂ်ႈၸဝ်ႈၶွင်ႁၢၼ်ႉၶၢႆၶူဝ်းၸိူဝ်းၼၼ်ႉ ၵႂႃႇသူင်ႇပၼ်ငိုၼ်း တီႈၼႂ်းႁဵင်းလိၵ်ႈ ဢၼ် ပၼ်ဝႆႉ ၼႂ်းလိၵ်ႈၼၼ်ႉဝႃႈၼႆ။ ၵဵဝ်ႇၵပ်းလွင်ႈၼႆႉ ၸဝ်ႈၶွင်ႁၢၼ်ႉၶၢႆၶူဝ်း ဝဵင်းသႅၼ်ဝီ လႆႈသူင်ႇၶၢဝ်ႇ လၢတ်ႈၼႄ ၾၢႆႇပလိၵ်ႈ ၸႄႈဝဵင်းသႅၼ်ဝီ။ ပလိၵ်ႈသႅၼ်ဝီ လႆႈႁူမ်ႈမိုဝ်းတင်းပလိၵ်ႈမူႇၸေႊသေ ၸင်ႇတီႉၺွပ်းၵုမ်းၶင်လႆႈ ၼၢင်းမူဝ်းမူဝ်းဢေး ဝၼ်းတီႈ 2/6/2019 ယၢမ်းၵၢင်ဝၼ်းတဵင်ႈ” ဝႃႈၼႆ။
ပလိၵ်ႈၵူတ်ႇထတ်းတူၺ်းတီႈတူဝ်မၼ်းၼၢင်း တီႉလႆႈငိုၼ်းဢၼ်သႂ်ႇထူင်ဝႆႉ တင်းမူတ်း 2 သႅၼ်ပျႃး။ ယၢမ်းလဵဝ် တႃႇၵူတ်ႇ ထတ်းပၼ်တူတ်ႈတၢမ်ႇမၼ်းၼၢင်းၼၼ်ႉ ပလိၵ်ႈလႆႈသူင်ႇတူဝ်မၼ်းၼၢင်းပၼ် တီႈႁူင်းပလိၵ်ႈၸႄႈ ဝဵင်းသႅၼ်ဝီဝႆႉယဝ်ႉ။
ၼၢင်းမူဝ်းမူဝ်းဢေး ဢႃယု မွၵ်ႈ 35 ပီၼႆႉ ပဵၼ်ၵူၼ်းၸႃတိ ဝၢၼ်ႈႁူဝ်ၼႃး ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ ဝႃႈၼႆ။
ၶေႃႈမုလ်း – Myanmaalinn
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ