ၾႆးမႆႈၵၢတ်ႇၸိုဝ်ႈသဵင်ယႂ်ႇ ၼႂ်းမိူင်းၵွၵ်ႇ မီးလွင်ႈလူႉယႂ်ႇသုမ်းလူင်

ၾႆးမႆႈၵၢတ်ႇၸတုၸၵ်ႇ ၵၢတ်ႇၸိုဝ်ႈသဵင်ယႂ်ႇ ဢၼ်မီးတီႈၼႂ်းမိူင်းၵွၵ်ႇ ၸိုင်ႈထႆး ႁဵတ်းႁႂ်ႈႁွင်ႈၶၢႆၶူဝ်းၶွင် ထုၵ်ႇၺႃးၾႆးမႆႈၵႂႃႇ 120 ႁွင်ႈ ။

ဝၼ်းတီႈ 02/06/2019 ၶၢဝ်းယၢမ်းၵၢင်ၶမ်ႈမွၵ်ႈ 9 မူင်း15 မိၼိတ်ႉ ၾႆးမႆႈၵၢတ်ႇၼတ်ႉ ၸတုၸၵ်ႇ ႁဵတ်းႁႂ်ႈႁွင်ႈၶၢႆၶူဝ်း  ၶွင် 120 ႁွင်ႈ ၺႃးၾႆးမႆႈ ၵူၼ်းလူႉတၢႆမၢတ်ႇၸဵပ်းတႄႉ ဢမ်ႇမီး။

ၸၢႆးၸၢႆး ၵူၼ်းမိူင်းၵွၵ်ႇ လၢတ်ႈၼႄဝႃႈ – “ ၵၢတ်ႇၼတ်ႉၸတုၸၵ်ႇၼႆႉ ပဵၼ်ၵၢတ်ႇဢၼ်ၵူၼ်းၵိုၼ်းတႄႉတႄႉၶႃႈဢေႃႈ ပီႈၼွင်ႉတႆးၵေႃႈ ဢွၼ်ၵၼ်ၵႂႃႇဢႅဝ်ႇၵႂႃႇသိုဝ်ႉၶူဝ်းၶွင်ၸိူဝ်းၼႆႉ ။ ၾႆးမႆႈပွၵ်ႈၼႆႉ ဢၼ်ဝႃႈမီးပီႈၼွင်ႉတႆးမၢတ်ႇၸဵပ်းၼႆတႄႉ ဢမ်ႇလႆႈငိၼ်းၶႃႈ ” ဝႃႈၼႆ။

ၵၢတ်ႇၼတ်ႉၸတုၸၵ်ႇၼႆႉ ပဵၼ်ၵၢတ်ႇၼတ်ႉဢၼ်မီးၼႂ်း ဝဵင်းလူင်မိူင်းၵွၵ်ႇ မီးႁၢၼ်ႉၶၢႆၶူဝ်းၶွင် 8,000 ႁၢၼ်ႉ မီး ၶူင်းၵၢၼ် 27 ၶူင်းၵၢၼ် မီးၵုၼ်ႇသိၼ်ၵႃႉ 8 ယၢင်ႇ (မဵဝ်း ) မိူၼ်ၼင်ႇ ၽၵ်းယိူဝ်ႈၼၢင်းၶဵဝ် မၢၵ်ႇမႆႉမၢၵ်ႇတွၵ်ႇ၊ ၼိူဝ်ႉသတ်း၊ တူၼ်ႈမႆႉ၊ ၵိရိယႃႇၶဝ်ႈၽၵ်း ၊ တၢင်းၵိၼ်ႁႅင်ႈလႄႈ သိူဝ်ႈၶူဝ်းၸိူဝ်းၼႆႉ။ ပဵၼ်ၵၢတ်ႇတီႈဢၼ်ၵူၼ်းၼွၵ်ႈမိူင်း မႃးဢႅဝ်ႇယဵမ်ႈသိုဝ်ႉၶွင်လႄႈ ပဵၼ်ၵၢတ်ႇၸိုဝ်ႈသဵင်ယႂ်ႇလင်ၼိုင်ႈ။