ၸုမ်းပၢႆးမွၼ်းတႆး မူႇၸေႊ တေၸတ်းပၢင်ပွႆးယုၵ်ႉယွင်ႈဝၼ်းၵိူတ်ႇ မေႃၵႂၢမ်းတႆး ၸိုဝ်ႈသဵင်ယႂ်ႇ ၸၢႆးသၢႆမၢဝ်း မၢႆတွင်းဢႃယု ၶွပ်ႈတဵမ် 75 ပီ (ပီၵွၼ်းသႅင်)။
ပၢင်ပွႆးၼႆႉ တေၸတ်းၼႂ်းဝၼ်းတီႈ 6-7/6/2019 တီႈဝတ်ႉၼၼ်ႇတဝၼ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၸၢႆးထႅၼ်ႈလႅဝ်း မေႃၵႂၢမ်းတႆး ၸိုဝ်ႈသဵင်ယႂ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸုမ်းပၢႆးမွၼ်း မူႇၸေႊ ဢွၼ်ႁူဝ်သေ တေၸတ်း ႁဵတ်း 75 ပီ ပီၵွၼ်းသႅင် ပီႈသၢႆမၢဝ်းၶႃႈ။ မိူဝ်ႈၶႃႈႁဝ်းလႆႈၸွႆႈသူင်ႇယူတ်းယႃ ပီႈသၢႆမၢဝ်းမိူဝ်ႈၼၼ်ႉ တီႈမူႇၸေႊ တေဢၢၼ်း ႁႃငိုၼ်းၵွင်ၵၢင်သေၵမ်ႉၸွႆႈ။ ၵူၺ်းၵႃႈ ယွၼ်ႉငဝ်းလၢႆး ဝၢၼ်ႈမိူင်း ဢမ်ႇပေႃးၶႅမ်ႉ ပဵၼ်သိုၵ်းပဵၼ်သိူဝ်လႄႈ ဢမ်ႇပဵၼ် ၸတ်းသေ ဢမ်ႇလႆႈႁႃ ငိုၼ်းၵွင်ၵၢင်ပၼ်ပီႈသၢႆမၢဝ်း။ ယွၼ်ႉၼၼ် ဢဝ်တိုဝ်ႉတၢင်း ဢႃယု ပီႈသၢႆမၢဝ်း ၶွပ်ႈတဵမ် 75 ပီၼႆႉ သေ ႁႃငိုၼ်းၵွင် ၵၢင်ၵႂႃႇ တႃႇၵမ်ႉၸွႆႈပီႈသၢႆမၢဝ်း ဢၼ်ၶႃႈႁဝ်းလႆႈႁူႉၸွမ်းတႄႉ မီးၼင်ႇၼႆ” ဝႃႈၼႆ။
“ ပၢင်ပွႆးၼႆႉ တေၸတ်းဝၼ်းတီႈ 6-7 ၶၢဝ်းတၢင်း 2 ဝၼ်း တေပဵၼ်ပွႆး ၾရီႊသူဝ်ႊ(Free Show) ၵူၺ်း တေဢမ်ႇၵဵပ်းၵႃႈ ၶဝ်ႈပွႆး” ဝႃႈၼႆ။
ၸၢႆးသႅင်ၸွမ်ၾႃႉ မေႃၵႂၢမ်းတႆး ၸိုဝ်ႈသဵင်ယႂ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ယူႇတီႈၸုမ်းပၢႆးမွၼ်းတႆး တီႈမူႇ ၸေႊႁဝ်း တေဢွၼ်ၵၼ်ၸတ်းႁဵတ်း ပၢင်ပွႆးယုၵ်ႉယွင်ႈဝၼ်းၵိူတ်ႇ ပီၵွၼ်းသႅင် ၸၢႆးသၢႆမၢဝ်းၶႃႈဢေႃႈ” ဝႃႈၼႆ။
ၼႂ်းပၢင်ပွႆးယုၵ်ႉယွင်ႈဝၼ်းၵိူတ်ႇ ပီၵွၼ်းသႅင် ၸၢႆးသၢႆမၢဝ်း ဢႃယု ၶွပ်ႈတဵမ် 75 ပီၼႆႉ တေမီးၽူႈႁွင်ႉၽဵင်းၵႂၢမ်းတႆး/ ပၢႆး မွၼ်းတႆး တေၶဝ်ႈႁူမ်ႈထႅမ်ႁႅင်း လဝ်ႇမူၼ်ႈတူၼ်ႈၸႂ်ပၼ်ၵႂႃႇ မိူၼ်ၼင်ႇ ၸၢႆးလၢဝ်သႂ်၊ ၸၢႆးသႅင်ၸွမ်ၾႃႉ၊ ၸၢႆးသႅင်ၸွမ် မၢဝ်း၊ ထႅၼ်ႈလႅဝ်း၊ ဢူးလၢႆး၊ (လုၵ်ႈၸၢႆး) ၸၢႆးႁၢၼ်ႁိူင်းမၢဝ်း၊ ၼၢင်းၼုမ်ႇမၢဝ်း၊ ၼၢင်းသႅင်လိုၼ်းၶမ်း၊ ၼၢင်းလၢဝ်လၢဝ်၊ ၶေးလႃးမူဝ်း၊ ၼၢင်းၶမ်းၼွင်ႉ၊ ၼၢင်းမူၺ်ၽွင်လႄႈ ဢိၵ်ႇထႅင်ႈၽူႈႁွင်ႉၵႂၢမ်းၼႂ်းၸႄႈဝဵင်းမူႇၸေႊထႅင်ႈ လၢႆလၢႆၵေႃႉ ဝႃႈၼႆ။
