PPST ၸုမ်းႁဵတ်းၵၢၼ် လူင်းလၢႆးမိုဝ်းၵိုတ်းတိုၵ်း NCA 10 ၸုမ်းၼၼ်ႉ တေႁူပ်ႉဢုပ်ႇၵၼ် တီႈၵဵင်းမႆႇ ၼႂ်းႁၢင်လိူၼ်ၼႆႉ။

ဝၼ်းတီႈ 5-10/06/2019 ၽူႈႁၢပ်ႇၵၢၼ် ၼႂ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်းၼၼ်ႉ တူဝ်တႅၼ်း 1 ၸုမ်းလႂ် 1 ၵေႃႉ တေႁူပ်ႉၵၼ် တီႈႁူင်းႁႅမ်းဢၼ်ၼိုင်ႈ ၼႂ်းၸႄႈဝဵင်းၵဵင်းမႆႇ ၸိုင်ႈထႆး ႁၢင်ႈႁႅၼ်းတေဢုပ်ႇဢူဝ်းၵၼ် တင်းမူတ်း 3 ႁူဝ် ၶေႃႈ။ ၼႂ်း 3 ႁူဝ်ၶေႃႈၼၼ်ႉ တေပဵၼ်လွင်ႈပိုတ်ႇတီၵႂၢမ်း(တီႈပွင်ႇ) NCA၊ ၸုမ်းတေႁူပ်ႉတင်း လူင်ပွင်ၸိုင်ႈ NRPC လႄႈ လွင်ႈယူင်ႉသၢင်ႈ PPST ၸဵမ်ၸိူဝ်းၼႆႉ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် PPST လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ၸုမ်းပွင်ၵၢၼ်/ ၽူႈႁၢပ်ႇၵၢၼ်တေၺႃးၵၼ် ၵူၺ်း။ ၶဝ်တေဢုပ်ႇဢူဝ်းၵၼ် 3 ႁူဝ်ၶေႃႈ။ ၼႂ်း 3 ႁူဝ်ၶေႃႈၼၼ်ႉ ၸႅၵ်ႈပဵၼ် 3 ၸုမ်းသေ ဢုပ်ႇၵၼ်။ ၸုမ်းၸိူဝ်းဢၼ် တေဢုပ်ႇ လွင်ႈပိုတ်ႇတီၵႂၢမ်း NCA ၸုမ်းၼိုင်ႈ၊ ၸုမ်းၸိူဝ်းတေၵႂႃႇငူပ်ႉငီႉႁူဝ်ၶေႃႈဢၼ်ဢုပ်ႇဢူဝ်းၵၼ်တင်း NRPC ၼၼ်ႉ ၸုမ်းၼိုင်ႈ၊ ယဝ်ႉၵေႃႈ ၸုမ်းၸိူဝ်းဢုပ်ႇဢူဝ်း လွင်ႈယူင်ႉသၢင်ႈ PPST တေဝႆႉမိူၼ်ၵဝ်ႇႁႃႉ၊ တေလႅၵ်ႈလၢႆႈႁႃႉ ဢၼ် ၼႆႉ ၸုမ်းၼိုင်ႈ”ဝႃႈၼႆ။

လွင်ႈၸုမ်းၸိူဝ်းဢၼ်တေၵႂႃႇငူပ်ႉငီႉၵၼ်တင်း NRPC ၼၼ်ႉ တေႁူပ်ႉဢုပ်ႇၵၼ်ၼႂ်းဝၼ်းတီႈ 5-7 လိူၼ်ၵျုၼ်ႊၼႆႉ။ ၵဵဝ်ႇ လူၺ်ႈၶၵ်ႉတွၼ်ႈ ဢၼ်ၸွမ်သိုၵ်းလူင် ယွတ်ႈသိုၵ်း RCSS တင်း ၸွမ်သိုၵ်းလူင် မူႇတူးသေးၽူဝ်း KNU လႆႈယိုၼ်ႈလိၵ်ႈ ၶေႃႈႁၼ်ထိုင်ၵႂႃႇၸူးတီႈ တေႃႇဢွင်ႇသၢၼ်းသူႉၵျီႇလႄႈ ၸွမ်ၸိၵ်းသိုၵ်း မိၼ်းဢွင်ႇလၢႆႇ မိူဝ်ႈလိူၼ်ဢွၵ်ႊထူဝ်ႊပိူဝ်ႊ 2018 ၼၼ်ႉသေ ၵမ်းၼႆႉ ယူႇတီႈ NRPC ၵေႃႈ တူၵ်းလူင်းသေ တေႁူပ်ႉ။ ၼႂ်းၽိုၼ်လိၵ်ႈၶေႃႈႁၼ်ထိုင်ၼၼ်ႉ မီးယူႇ 4 ၶၵ်ႉ တွၼ်ႈ 1) လူဝ်ႇလႆႈငူပ်ႉငီႉတီၵႂၢမ်း NCA၊ 2) လွင်ႈသုၼ်ႇလႆႈၸႄႈမိူင်း၊ 3) လွင်ႈသုၼ်လႆႈမိူင်းႁူမ်ႈတုမ်လႄႈ 4) သမ်ႉ လွင်ႈႁူမ်ႇလူမ်ႈလႄႈ လွင်ႈၵေႃႇတင်ႈတပ်ႉသိုၵ်းမိူင်းႁူမ်ႈတုမ် ၸိူဝ်းၼၼ်ႉ ၸုမ်းၼႆႉ ယူႇတီႈဢူးမဵဝ်းဝိၼ်း တေၵပ်းသၢၼ် ႁဵတ်းသၢင်ႈၵႂႃႇ ဝႃႈၼႆ။

ၵဵဝ်ႇၵပ်းလွင်ႈ ယူင်ႉသၢင်ႈ PPST တေဝႆႉၸိူင်ႉႁိုဝ် ဢၼ်ဝႃႈၼၼ်ႉတႄႉ တေဢုပ်ႇၵၼ် ၼႂ်းဝၼ်းတီႈ 8-10 လိူၼ်ၼႆႉ။ သေႃးတႃႇတူဝ်ႇမူး တေၵပ်းသၢၼ် ႁဵတ်းသၢင်ႈၵႂႃႇ ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် လၢတ်ႈဝႃႈ “ ၸုမ်းၸိူဝ်းဢၼ်တေဢုပ်ႇဢူဝ်း လွင်ႈပိုတ်ႇတီၵႂၢမ်း NCA ၼၼ်ႉ တေႁူပ်ႉၵၼ် မိူဝ်ႈ လႂ် ဢၼ်ဝႃႈၼၼ်ႉ ဢမ်ႇလႆႈႁူႉၸွမ်း။ ၵူၺ်းၵႃႈ ၸုမ်းၸိူဝ်းတေဢုပ်ႇဢူဝ်း ယူင်ႉသၢင်ႈ PPST ၼႆႉတႄႉ တေဢုပ်ႇဢူဝ်း ၵၼ် တေ သိုပ်ႇဝႆႉမိူၼ်ၵဝ်ႇႁႃႉ၊ တေလႅၵ်ႈလၢႆႈႁႃႉ၊ မိူၼ်ၸိူင်ႉၼင်ႇ တၢင်းၾၢႆႇ ၽတူဝ်ႇၸေႃးတႃႇတူဝ်ႇမူးၶဝ် မႃးတၢင်ႇဝႆႉဝႃႈ ႁဝ်းလူဝ်ႇ မႃးတၢင်ႇပဵၼ် PPCM၊ ပေႃးၸိူင်ႉၼၼ် မီးၵႂၢမ်းထၢမ်ဝႃႈ ယႃႉပႅတ်ႈ PPST သေ မႃးႁဵတ်း PPCM ႁႃႉ၊ ဢမ်ႇၼၼ် ၵေႃႈ ဢမ်ႇယႃႉ PPST သေလႄႈ ႁဵတ်း PPCM ၵေႃႈလႆႈယူႇႁႃႉၼႆၸိူဝ်းၼၼ်ႉ” ဝႃႈၼႆ။

ပၢင်ၵုမ်ၵမ်းၼႆႉ ပဵၼ်တွၼ်ႈတႃႇၸုမ်းႁဵတ်းၵၢၼ်/ ၽူႈႁၢပ်ႇၵၢၼ် ၼႂ်းၸုမ်း PPST ႁူပ်ႉၵၼ်ၵူၺ်း ပႆႇပဵၼ်ပၢင်ၵုမ် ၽူႈၼမ်း ၸိၵ်းၸွမ် PPST ။ သင်ဝႃႈ ၸုမ်းၽူႈႁၢပ်ႇၵၢၼ် ႁူပ်ႉၵၼ် ဢုပ်ႇဢူဝ်းၵၼ်လႆႈယဝ်ႉ ၸင်ႇတေၸတ်းႁဵတ်း ပၢင်ၵုမ် ၽူႈ ၼမ်းၸိၵ်းၸွမ် ပွၵ်ႈၵမ်း 4/2 ထႅင်ႈၵမ်းၼိုင်ႈ ဝႃႈၼႆ။

ပၢင်ၵုမ် ၽူႈၼမ်းၸိၵ်းၸွမ် Summit ပွၵ်ႈၵမ်း 4/1 ၼၼ်ႉ ၸတ်းႁဵတ်းယဝ်ႉၵႂႃႇတီႈၵဵင်းမႆႇ မိူဝ်ႈဝၼ်းတီႈ 14-18/05/2019 ပူၼ်ႉမႃးၼၼ်ႉ ဝႃႈၼႆ။