မၢၵ်ႇတႅၵ်ႇတိူဝ်ႉသႂ်ႇ ၵူၼ်းဝၢၼ်ႈၼွင်လိူဝ်ႇ ၸႄႈဝဵင်းမိူင်းပၼ်ႇ တၢႆ 1 မၢတ်ႇ 1 ဝႃႈၼႆ။
ဝၼ်းတီႈ 31/05/2019 ယၢမ်းဝၢႆးဝၼ်း 4 မူင်းပၢႆၼၼ်ႉ မၢၵ်ႇတႅၵ်ႇတိူဝ်ႉသႂ်ႇ ၶုၼ်ႇဝိယ ဢႃယုမွၵ်ႈ 34 ပီ တီႈႁိူၼ်း ဝၢၼ်ႈ ၼွင်လိူဝ်ႇ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၶုၼ်ႇဝိယ လႆႈလူႉ တၢႆထင်တီႈ ၵေႃႉပဵၼ်မေးၼၢင်း လႆႈမၢတ်ႇၸဵပ်းၸွမ်း ဝႃႈၼႆ။
ၸၢႆးၼွင်ႉ ၽူႈတႅၼ်းသၽႃးၸႄႈမိူင်း ၸႄႈဝဵင်းမိူင်းပၼ်ႇ ပႃႇတီႇသိူဝ်ၽိူၵ်ႇ SNDP လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်း ၵူၼ်းဝၢၼ်ႈလၢတ်ႈမႃးတႄႉ မၼ်းၸၢႆးၵႂႃႇလႄႇထိူၼ်ႇသေ ၵဵပ်းလႆႈမၢၵ်ႇလုၵ်ႈၼိုင်ႈ သမ်ႉၵဵပ်းဢဝ်မႃးတီႈႁိူၼ်း။ မၼ်းၸၢႆး သမ်ႉ တေၵွၵ်းတွႆႇယႃႉ တေဢဝ်ၸိုၼ်းယၢမ်းတၢင်းၼႂ်းမၢၵ်ႇၼၼ်ႉသေ လႆႈဢဝ်တႅၵ်ႇပႅတ်ႈ တိူဝ်ႉသႂ်ႇမၼ်းၸၢႆး လႆႈလူႉတၢႆ တိူဝ်ႉၺႃးပႃးမေးၼၢင်းမၼ်းၸၢႆး လႆႈမၢတ်ႇၸဵပ်းၸွမ်း” ဝႃႈၼႆ။
မၢၵ်ႇတႅၵ်ႇ(မၢၵ်ႇၵဝ်ႇ) ၼၼ်ႉ ပဵၼ်မၢၵ်ႇၸုမ်းလႂ် ၾင်ဝႆႉဢၼ်ဝႃႈၼၼ်ႉတႄႉ ဢမ်ႇလႆႈႁူႉ။ ဢွင်ႈတီႈတၢင်းဢိူင်ႇၼႃးမွၼ် ၼၼ်ႉ ၵမ်ႈၼမ်ပဵၼ်ၵူၼ်းၸၢဝ်းတႆးတင်း ပဢူဝ်း ယူႇသဝ်းဝႆႉ။
ၶုၼ်ႇဝိယၼႆႉ မၢၵ်ႇတႅၵ်ႇတိူဝ်ႉသႂ်ႇတီႈတူဝ်မၼ်းၸၢႆးသေ လႆႈလူႉတၢႆထင်တီႈ။ ၵေႃႉ ပဵၼ်မေးၼၢင်း ၼၢင်းၼူၼ်းတႄႉ လႆႈ ၺႃးၸၢၵ်ႇမၢၵ်ႇ တိူဝ်းၸွမ်းၵွင်းလင် ဝႃႈၼႆ။
ၼႂ်းၸိုင်ႈတႆးၼႆႉ ၸုမ်းယိပ်းၵွင်ႈၵၢင်ႇၵေႃႈၼမ်၊ သိုၵ်းမၢၼ်ႈၵေႃႈထႅမ်ႁႅင်းသိုၵ်းၶိုၼ်ႈ၊ ပိုၼ်ႉတီႈပဵၼ်ပၢင်တိုၵ်းၸိူဝ်းၼၼ်ႉ မီးမၢၵ်ႇၾင်လိၼ်ႁၢင်ႈၵၢင်ၵၼ်ဝႆႉသေ ဢမ်ႇမီးၽႂ်မႃးၽဵဝ်ႈၵဵပ်းပၼ်။ ႁဵတ်းႁႂ်ႈၵူၼ်းမိူင်းတူၵ်းပဵၼ်ယိူဝ်ႇ ယဵပ်ႇၺႃးတႅၵ်ႇ သႂ်ႇၶိူဝ်းယႂ်း။
