ပလိၵ်ႈမၢၼ်ႈ တီႉလႆႈယႃႈမဝ်းၵမ် ယႃႈမႃႉတင်း ယႃႈၾိၼ်ႇလမ် တင်းမူတ်း ၶၼ်ငိုၼ်း တေတူၵ်းမႅၼ်ႈ 1,200 သႅၼ်ပၢႆ တီႈၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။
ဝၼ်းတီႈ 01/06/2019 မႃးၼႆႉ ယူႇတီႈၶွမ်ႊမတီႊၾၢႆႇၽဵဝ်ႈမူၺ်ႉယႃႈမဝ်းၵမ် ဢွၵ်ႇၶေႃႈပိုၼ်ၽၢဝ်ႇဝႃႈ တီႉလႆႈယႃႈမႃႉ တင်း ယႃႈၾိၼ်ႇလမ် တီႈႁိမ်းၵဵတ်ႉလၢၼ်ႇဢူဝ်ႊရီႊယၼ်ႊထိူဝ်လ်ႊ ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူတ်ႇထတ်း တီႉလႆႈယႃႈမႃႉ တင်းမူတ်း 6 မိုၼ်ႇမဵတ်ႉ တူၵ်းမႅၼ်ႈငိုၼ်း 1,200 သႅၼ်ပျႃး။ ယႃႈၾိၼ်ႇလမ် ၼမ်ႉၼၵ်း 1 ၵီႊလူဝ်ႊ မႅၼ်ႈငိုၼ်း 9 သႅၼ်ပျႃး သႂ်ႇထူင်ၸၢၼ်ႈတၢင်ႇၵႃးမႃး ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၵႃးၼႆႉ လုၵ်ႉတၢင်းသီႇပေႃႉမႃး တေသူင်ႇၵႂႃႇတၢင်းဝဵင်းၼွင်ၶဵဝ်။ ၵူတ်ႇထတ်းတီႉ လႆႈၼႂ်းၵႃး ယႃႈမႃႉတင်း ယႃႈၾိၼ်ႇလမ် ယဝ်ႉၵေႃႈ ၾူၼ်း 2 လုၵ်ႈ၊ ငိုၼ်းမၢၼ်ႈ 5 သႅၼ်ပျႃး” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်း ၾၢႆႇပလိၵ်ႈၶဝ် လႆႈပိုတ်ႇဢဝ်လိူင်ႈၵူၼ်းမႃးၸွမ်းၼႂ်းၵႃး 2 ၵေႃႉၼၼ်ႉ တီႈ ႁူင်းပလိၵ်ႈၸႄႈဝဵင်းၼွင်ၶဵဝ်ဝႆႉ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီး ဝႃႈၼႆ။
ယႃႈမႃႉ၊ ယႃႈမဝ်းၵမ်ၼႆႉ ပဵၼ်ၶွင်ၽႂ် ၸဝ်ႈၵႃးပဵၼ်ၽႂ်ၼႆ ပလိၵ်ႈဢမ်ႇလႆႈပိုၼ်ၽၢဝ်ႇပႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ