လၢႆလၢႆဝၢၼ်ႈဢိူင်ႇ ၼႂ်းၸေႈဝဵင်းမိူင်းၼၢႆး ၸေႈတွၼ်ႈလၢင်းၶိူဝ်း တီႈဢၼ်မီးႁူင်းၸၢၵ်ႈၾႆးၾႃႉ တၢတ်ႇလူင်ၸူင်ဢၢင် ႁိုဝ် ၼမ်ႉတူၵ်းတၢတ်ႇၵဵင်းတွင်းၼၼ်ႉ ယင်းပႆႇလႆႈၾႆးၾႃႉၸႂ်ႉ၊ ၽူႈတႅၼ်းသၽႃးမိူင်းၼၢႆး တိုၵ်ႉၶပ်းၶိုင်ပၼ် တႃႇသွင်ဝၢၼ်ႈ ႁႂ်ႈလႆႈလႅင်းၾႆးၾႃႉ မိူၼ်ပိူၼ်ႈ။

ၸၢႆးမွၼ်းလိူၼ် ၽူႈတႅၼ်းသၽႃးၸေႈမိူင်း ဝဵင်းမိူင်းၼၢႆးလၢတ်ႈတီႈၽူႈတွႆႇႁွၵ်ႈဝႃႈ – “ဝၢၼ်ႈၵုင်းၵျွင်း 70 လင် ဢၼ်မီး ၼႂ်း ဢိူင်ႇၵုၼ်ၼႃးၼႆႉ တိုၵ်ႉတေလႆႈၾႆးၾႃႉၵူၺ်းၶႃႈ။ မိူဝ်ႈၵူႈပွၵ်ႈ ဢၼ်ၵူၼ်းဝၢၼ်ႈ ၶိုင်ဢဝ် ႁင်းၵူၺ်းၼၼ်ႉ လႆႈပၼ် ၵႃႈယႂ်ႇလႄႈ ၵူၼ်းဝၢၼ်ႈၵုင်းၵျွင်း ဢၼ်ဢဝ်ၾႆး မီး 4-5 လင်ၵူၺ်း။ ၸိူဝ်းၶဝ်လႆႈ ပၼ်ၵႃႈၾႆးၾႃႉ 1 ႁိူၼ်း 13 သႅၼ်။ ယွၼ်ႉၼၼ် ၵူၼ်းဝၢၼ်ႈၶၢင်းဝႃႈ ဢမ်ႇပဵၼ်လႆႈလႄႈ ၶႃႈၶဝ်လႆႈၶတ်းၸႂ် ယွၼ်းငိုၼ်းၼႂ်းသၽႃးသေ ၶိုင်ပၼ်။ ယၢမ်းလဵဝ် ငိုၼ်းသၽႃး တူၵ်းမႃး ယဝ်ႉလႄႈ တႄႇတေႃႇသၢႆၾႆးၶဝ်ႈဝၢၼ်ႈ ၼႂ်းဝၼ်းသုၵ်းဝူင်ႈပူၼ်ႉမႃးၼႆႉၶႃႈဢေႃႈ။ သၢႆၾႆးတႃႇၶိုင်ႈ လၵ်းၼႆၶႃႈဢေႃႈ။ ဢိူင်ႇၵုၼ်ၼႃးလႄႈ ဢိူင်ႇၼႃးၶၢၼ် ၶႃႈဢေႃႈ။ ”- ဝႃႈၼႆ။

ဢိူင်ႇၼႃးၶၢၼ် ဝၢၼ်ႈပၢင်ဢူသမ်ႉ လင်ႁိူၼ်းမီး 100 ပၢႆ ။ ယၢမ်းလဵဝ် တႃႇလႆႈၾႆးၼၼ်ႉ လူင်ပွင်ၸိုင်ႈ မိူင်းတႆး တမ်းလူင်း ပၼ် မေႃႈၾႆး (Transformer) ၼိုင်ႈလုၵ်ႈလႄႈ သၢႆၾႆး 11 K ၼိုင်ႈသဵၼ်ႈ။ တေတႄႇ တေႃႇသၢႆၾႆးတီႈတၢင်းလူင်သေၶဝ်ႈ ဝၢၼ်ႈၼႂ်းဝူင်ႈၼႃႈၼႆႉ ဝႃႈၼႆ။

ဢိူင်ႇၼႃးၶၢၼ်လႄႈဢိူင်ႇၵုၼ်ၼႃးၼႆႉမီး ၸဵင်ႇႁွင်ႇဝၼ်းတူၵ်း ဝဵင်းမိူင်းၼၢႆး ယၢၼ်ၵႆမွၵ်ႈ 10 လၵ်း။ လုၵ်ႉတီႈသဵၼ်ႈ တၢင်းလူင်သေ ၶဝ်ႈၵႂႃႇထႅင်ႈမွၵ်ႈ 7 လၵ်း၊ ယၢၼ်တၢင်းလူင်ၸူင်ဢၢင်ၵဵင်းတွင်းတႄႉ 20 လၵ်းပၢႆပၢႆ။

ယၢမ်းလဵဝ် ၼႂ်းမိူင်းၼၢႆးၼႆႉ ဢၼ်ပႆႇလႆႈၾႆးၾႃႉမီးယူႇမွၵ်ႈ 4-5 ဢိူင်ႇ မိူၼ်ၼင်ႇ ဢိူင်ႇၼမ်ႉမေႃႇသူမ်ႈ ဢၼ်မီးၾၢႆႇႁွင်ႇ ဝဵင်း။ ဝၢၼ်ႈၶူၵ်ႉၸၢၵ်ႈလင်ႁိူၼ်းမီး မွၵ်ႈ 30-40 ။ တၢင်းၸၢၼ်းမိူင်းၼၢႆးသမ်ႉ ဢၼ်ပႆႇ လႆႈၾႆးတေပဵၼ် ဝၢၼ်ႈႁေလင် ႁိူၼ်းမီး 40-50 ။ ဝၢၼ်ႈၶူဝ်တိုဝ်ႉဝူဝ်းၸိူဝ်းၼႆႉ။ တၢင်းတူၵ်းမိူင်းၼၢႆးၼႆႉ ဢိူင်ႇၵၢတ်ႇႁႃႉ ဝၢၼ်ႈၵၢင်ၸိူင်း ဝၢၼ်ႈၵုင်းပဝ်း ဝၢၼ်ႈၽူၺ်းလႅမ် ၸိူဝ်းၼႆႉ- ဝႃႈၼႆ။

ၸၢႆးမွၼ်းလိူၼ်လၢတ်ႈဝႃႈ တွၼ်ႈတႃႇဝၢၼ်ႈဢိူင်ႇၼႂ်းမိူင်းၼၢႆးတေလႆႈၾႆးၼၼ်ႉ သၽႃးၶိုင်ပၼ်၊ ၵူႈဢဝ် ငိုၼ်းတီႈမိူင်း ၵျိူဝ်ႊမၼီႊ ၶပ်းၶိုင်ဝႆႉလႄႈ ၼႂ်းပီ 2020 ၼႆႉ ဝၢၼ်ႈဢိူင်ႇ 4-5 ဢိူင်ႇ ဢၼ်လၢတ်ႈမႃးပႃႈၼိူဝ်ၼႆႉ ၸၢင်ႈလႆႈၾႆးၾႃႉၵူႈ ဝၢၼ်ႈဢိူင်ႇယူႇ ဝႃႈၼႆ။

တၢတ်ႇလူင်ၸူင်ဢၢင် ဢၼ်ဢွၵ်ႇၾႆးၾႃႉၼမ်လိူဝ်ပိူၼ်ႈသုတ်းတီႈ 1 ၼႂ်းမိူင်းႁူမ်ႈတုမ်ၼႆႉ မီးၼႂ်းၵိင်ႇ ၸႄႈဝဵင်းၵဵင်းတွင်း၊ ၸႄႈဝဵင်းမိူင်းၼၢႆးသေတႃႉ ပႆႇဝႃႈ ၵူၼ်းဝၢၼ်ႈၵူၼ်းမိူင်း ႁိမ်းႁွမ်းမိူင်းၼၢႆး၊ ဢၼ်ၸမ် လိူဝ်ပိူၼ်ႈတီႈသုတ်း ၼႂ်းၵိင်ႇၸႄႈ ဝဵင်းၵဵင်းတွင်း၊ ၼႂ်းၸႄႈဝဵင်းမိူင်းပၼ်ႇ၊ ၼႂ်းၸႄႈဝဵင်းလၢင်းၶိူဝ်းၸိူဝ်းၼႆႉ ဢၼ်ဢမ်ႇလႆႈၸႂ်ႉၾႆးၾႃႉ တၢတ်ႇၵဵင်းတွင်းၵေႃႈ တိုၵ်ႉမီးတင်းၼမ်။

ၽူႈတွႆႇႁွၵ်ႈ – ႁွမ်ႈႁိူင်း