Friday, March 29, 2024

ၼၢင်းယိင်းယၢင်းၵေႃႉၼိုင်ႈ လႆႈႁပ်ႉသူး ၼၢင်းယိင်းႁတ်းႁၢၼ် ဢၼ် US မွပ်ႈယိုၼ်ႈ

Must read

NawK’nyawPaw ၽူႈတူင်ႉၼိုင်ၼႂ်းၸုမ်း ၼၢင်းယိင်းယၢင်းလႆႈႁပ်ႉသူး ၼၢင်းယိင်းၵတ်ႉၶႅၼ်ႇ ႁတ်းႁၢၼ် ႁဵတ်း ၵၢၼ်တွၼ်ႈတႃႇပုၼ်ႈၵူၼ်းၼမ် လုမ်းၽွင်းလူင်ၾၢႆႇၼွၵ်ႈမိူင်း မိူင်းဢမေႊရီႊၵႃႊ (USA) မွပ်ႈယိုၼ်ႈပၼ်။

Photo by SHAN/ႁၢင်ႈ- ၽူႈၼင်ႈလုမ်းၽွင်းတၢင်း US တီႈၵဵင်းမႆႇလ​ႄႈ ၼၢင်းNawK’nyaw Paw

ဝၼ်းတီႈ 30/05/2019 လုမ်းၽွင်းတၢင်မိူင်း(USA) ဢၼ်ပၵ်းဝႆႉတီႈဝဵင်းၵဵင်းမႆႇ ၸိုင်ႈထႆး ၸတ်းႁဵတ်းပၢင်ႁူမ် ၸူမ်း ၼၢင်းၼေႃႇၵယေႃးၽေႃး NawK’nyaw Paw ဢၼ်ယူႇၼႂ်းၸုမ်းၼၢင်းယိင်းယၢင်း Karen Women’s Organization (KWO), တူင်ႉၼိုင်ၸွႆႈထႅမ်ၼၢင်းယိင်းလႄႈ လုၵ်ႈဢွၼ်ႇ ႁႂ်ႈမီးလွင်ႈႁူမ်ႇလူမ်ႈ ၊ မီးလွင်ႈၽဵင်ႇပဵင်းပဵၼ်ထမ်း တိုၵ်းသူၼ်း ႁႂ်ႈမီးလွင်ႈငမ်းယဵၼ် မၼ်ႈၵိုမ်းယိုၼ်းယၢဝ်း ၸိူဝ်းၼႆႉ။

- Subscription -
Photo by SHAN/ ႁၢင်ႈၵူၼ်းမႃးႁူမ်ၸူမ်းပၼ်ႁႅင်း Naw K’nyaw Paw

Scot Marciel ၽူႈၼင်ႈလုမ်းၽွင်းတၢင် US တီႈတႃႈၵုင်ႈလၢတ်ႈဝႃႈ “ မၼ်းၼၢင်းၼႆႉပဵၼ် ၽူႈဢၼ်ပိုၼ်ႉပွႆႇပုၼ်ႈလီသုၼ်ႇတူဝ် ပဵၼ်ၵူၼ်းမီးၸႂ်ႁတ်းႁၢၼ်ၵတ်ႉၶႅၼ်ႇသေ ႁဵတ်းၵၢၼ်တွၼ်ႈတႃႇၵူၼ်းတင်းၼမ် တိုၵ်းတေႃး လွင်ႈဢမ်ႇၽဵင်ႇပဵင်းပဵၼ်ထမ်းသေ တူင်ႉၼိုင်ၵမ်ႉယၼ်လွင်ႈငမ်းယဵၼ် လွင်ႈသုၼ်ႇလႆႈသုၼ်ႇပဵၼ်ၵူၼ်း ၵွပ်ႈ ၼၼ်လႄႈ ႁဝ်းၶႃႈၸင်ႇမွပ်ႈသူးရၢင်းဝလ်း ပၼ်မၼ်းၼၢင်း ” ဝႃႈၼႆ။

ၼၢင်းNawK’nyaw Pawလၢတ်ႈဝႃႈ – “ ယၢမ်းလဵဝ်ၼႂ်းဝၢၼ်ႈမိူင်းႁဝ်းၶႃႈၼႆႉ ပိုတ်ႇပၢင်ႇယဝ်ႉ လႄႈမီးလွင်ႈႁဵတ်းၵၢၼ်ပၢႆးမၢၵ်ႈမီး လူင်းတိုၼ်းၼမ်မႃးၼႆသေတႃႉ တွၼ်ႈတႃႇၸၢတ်ႈပၢၼ် ၵူၼ်းဝၢၼ်ႈၵူၼ်းမိူင်းၼႂ်းၸႄႈမိူင်း ဝၢၼ်ႈၼွၵ်ႈၼႃးပၢင်ႇၸိူဝ်းၼႆႉယင်းတိုၵ်ႉႁူပ်ႉလွင်ႈယၢပ်ႇယူႇ ၊ ၼၢင်းယိင်းလႄႈ လုၵ်ႈဢွၼ်ႇဢၼ်ထုၵ်ႇၺႃးပူၼ်ႉပႅၼ်သုၼ်ႇလႆႈၵေႃႈ ယင်းတိုၵ်ႉမီးယူႇ မၼ်းဢမ်ႇပႆႇၸႂ်ႈဝၢၼ်ႈမိူင်းဢၼ်ၶိုၼ်ႈယႂ်ႇ ၵတ်းယဵၼ် ၵူၼ်းမိူင်းႁၢမ်းၶဵၼ်တႄႉတႄႉ လူင်ပွင်ၸိုင်ႈ တင်းၸုမ်းယိပ်းၵွင်ႈၵၢင်ႇလူင်းလၢႆးမိုဝ်းNCA ယဝ်ႉဝႃႈၼႆသေတႃႉ ဢမ်ႇမီးပၢင်တိုၵ်းၼႆလၢတ်ႈဢမ်ႇလႆႈ” ဝႃႈၼႆ။

သူးရၢင်းဝလ်းၼၢင်းယိင်းႁတ်းႁၢၼ်လုမ်ႈၾႃႉ International Women of Courage Award ၼႆႉ ယူႇတီႈလုမ်း ၽွင်းလူင်ၾၢႆႇတိတ်းတေႃႇၵပ်းသိုပ်ႇၼွၵ်ႈမိူင်းသေ ႁၼ်ထိုင်ၼၢင်းယိင်းဢၼ်ၵတ်ႉၶႅၼ်ႇ ၊ ၵမ်ႉထႅမ်လွင်ႈငမ်းယဵၼ်ၸိုင်ႈမိူင်း၊ လွင်ႈသုၼ်ႇလႆႈသုၼ်ႇပဵၼ်ၵူၼ်း ၽူႈယိင်းဢၼ်ပိုၼ်ႉပွႆႇလွင်ႈသုၼ်ႇတူဝ်သေ ႁဵတ်းၵၢၼ်ပၼ်တွၼ်ႈတႃႇၵူၼ်းတင်းၼမ် ၸိူဝ်းၼႆႉသေ ၵေႃႇတင်ႈၶိုၼ်ႈမိူဝ်ႈပီ 2007 ။ တင်ႈတႄႇၵေႃႇတင်ႈၶိုၼ်ႈမႃးၼႆႉ လႆႈမွပ်ႈယိုၼ်ႈပၼ်သူးၼၢင်းယိင်းႁတ်းႁၢၼ်ၵႂႃႇယဝ်ႉ 120 ၵေႃႉ ဢၼ်လုၵ်ႉမႃးတီႈ 65 ၸိုင်ႈမိူင်းတူဝ်ႈလုမ်ႈၾႃႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း