ၽူႈတႅၼ်းၵူၼ်းမိူင်း မိူင်းၵိုင် ႁႂ်ႈၸဝ်ႈၼႃႈတီႈၸွႆႈပွႆႇပၼ်လိၼ်ၼႃးၵူၼ်းမိူင်း ဢၼ်ပႃးၵႂႃႇၼႂ်းလိၼ်ၾၢႆႇပႃႇမႆႉ

ၽူႈတႅၼ်းသၽႃး ၵူၼ်းမိူင်း ၸႄႈဝဵင်းမိူင်းၵိုင် တွင်ႈထၢမ်ၼႂ်းပၢင်ၵုမ်သၽႃးႁႂ်ႈလူတ်းပွႆႇပၼ် လိၼ်သူၼ်ႁႆႈၼႃးၵူၼ်းမိူင်း ဢၼ်မီးၼႂ်းလိၼ်ၾၢႆႇပႃႇမႆႉၼၼ်ႉ လွင်ႈၼႆႉ ၸွင်ႇတေမီးၵၢၼ်ႁၢင်ႈႁႅၼ်းၶပ်းၶိုင်ပၼ်။

ဝၼ်းတီႈ 28/05/2019 ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ၵမ်းထူၼ်ႈ 12 တီႈၼေႇပျီႇတေႃႇ ၸၢႆးသႅင်မိူင်း ၽူႈတႅၼ်းသ ၽႃးၵူၼ်းမိူင်း ၸႄႈဝဵင်းမိူင်းၵိုင် တွင်ႈထၢမ် ၼႂ်းပၢင်ၵုမ်သၽႃးဝႃႈ လိၼ်သူၼ်ႁႆႈၼႃး ၵူၼ်းမိူင်း မိူင်းၵိုင် ဢၼ်လႆႈၶဝ်ႈပႃး ၼႂ်းလိၼ်ၾၢႆႇပႃႇမႆႉၵုမ်းဝႆႉၼၼ်ႉ ႁႂ်ႈၵူၼ်းမိူင်းမီးသုၼ်ႇၸၢမ်ႇပူၺ်ႈၵႂႃႇၶိုၼ်း လွင်ႈၼႆႉ ၸွင်ႇမီးလွင်ႈႁၢင်ႈႁႅၼ်းၶပ်းၶိုင်ပၼ် ဝႃႈၼႆ။

ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶႃႈႁဝ်း ထၢမ်ၵႂႃႇၼၼ်ႉတႄႉ ပဵၼ်ၼႃးပီႈၼွင်ႉၵူၼ်းဝၢၼ်ႈၽႃၶိူဝ်း ပွၵ်ႉ 3 မိူင်းၵိုင်လႄႈ တၢင်ႇပွၵ်ႉ/ ဢိူင်ႇထႅင်ႈ ဢၼ်ပႃးသဵၼ်ႈမၢႆ ၶဝ်ႈၵႂႃႇၼႂ်းၾၢႆႇပႃႇမႆႉ ၼၼ်ႉ ႁႂ်ႈယွၼ်းပၼ်ထွၼ်ပၼ်ၶိုၼ်းဝႆးဝႆး။ ႁဵတ်းသင်လႄႈၼႆ ၵူၼ်းဝၢၼ်ႈၼႆႉ လႆႈသုမ်းသုၼ်ႇ မိူၼ်ၸိူင်ႉၼင်ႇ ၾၢႆႇၽုၵ်ႇ သွမ်ႈၶဝ် ပၼ်ငိုၼ်းၵူႈ၊ ငိုၼ်းၶီႈၸိူင်ႉၼၼ်လႄႈသင်။ ၵူၼ်းဝၢၼ်ႈၶဝ်တေ ဢဝ်ၼႃးသေ ၵႂႃႇၽွၼ်ႇ ၵႂႃႇၵမ်ႉ ႁႂ်ႈပေႃးလႆႈ ၸၢၵ်ႈထႆၼႃး ၸႃႉၵႂႃႇၸိူင်ႉၼၼ်ႉ တႃႇတေၸႂ်ႉၸွမ်းပၢၼ်ႇ(Bank) ၸိူဝ်းၼႆႉ မၼ်းမီးတၢင်းယၢပ်ႇၽိုတ်ႇ ယွၼ်ႉပိူဝ်ႈဝႃႈ လိၼ်ၼႃးၸိူဝ်း ၼၼ်ႉသမ်ႉ မၼ်းဢမ်ႇၸႂ်ႈ(ပုံစံ ၇)။ ယွၼ်ႉၼၼ်လႄႈ မၼ်းသုမ်းသုၼ်ႇၸိူဝ်းၼၼ်ႉဝႆႉ” ဝႃႈၼႆ။

သိုပ်ႇလၢတ်ႈဝႃႈ “ ယွၼ်ႉပိူဝ်ႈဝႃႈ မၼ်းပႃးၵႂႃႇၼႂ်းလိၼ်ၾၢႆႇပႃႇမႆႉယဝ်ႉလႄႈ ၾၢႆႇၽုၵ်ႇသွမ်ႈၶဝ် ဢမ်ႇၸၢင်ႈႁဵတ်းပၼ် (ပုံစံ ၇)။ ပေႃးဢမ်ႇလႆႈ (ပုံစံ ၇) ၼႆၵေႃႈ ပွင်ႇဝႃႈ ၼႃးၼႆႉမၼ်းဢမ်ႇၶဝ်ႈပဵၼ်တၢင်းၵၢၼ်။ ၵွပ်ႈၼၼ် ၵူၼ်းမိူင်းၵေႃႈတေဢမ်ႇ လႆႈငိုၼ်း ၶီႈ၊ ငိုၼ်းၵူႈ ၸဵမ်ၵႂႃႇၸိူဝ်းၼၼ်ႉ ၶဝ်တေဢမ်ႇလႆႈၸိူင်ႉပိူၼ်ႈ။ ၵွပ်ႈၼႆလႄႈ ႁႂ်ႈၽွင်းလူင်ၾၢႆႇပႃႇမႆႉ လႄႈ ၾိင်ႈတိုၼ်းသၽႃႇဝၶဝ် ႁႂ်ႈလူတ်းပွႆႇပၼ်/ ထွၼ်ဢွၵ်ႇသဵၼ်ႈမၢႆပၼ်ဝႆးဝႆး ၶႃႈတႄႉလႆႈတွင်ႈ ထၢမ်ၵႂႃႇၸိူင်ႉၼၼ်။ တီႈလိၼ်သူၼ်ၼႃးၸိူဝ်းၼၼ်ႉတႄႉၵေႃႈ ၵူၼ်းမိူင်းႁဝ်းၶႃႈ မီးသုၼ်ႇႁဵတ်းၵိၼ်ယူႇ ၽႂ်ၵေႃႈဢမ်ႇလႆႈ ႁၢမ်ႈလႆႈသီး သင် ၼင်ႇၵဝ်ႇ။ ၵူၺ်းၵႃႈ မၼ်းသုမ်းသုၼ်ႇၼၼ်ႉၵူၺ်း” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈ ၻွၵ်ႊတိူဝ်ႊယေႊမိၼ်ႉသူၺ်ႇ ၽွင်းလူင်ၾၢႆႇမႅတ်ႇပႅင်းၶူဝ်းတိုၼ်းသၽႃႇဝလႄႈ ၾိင်ႈတိုၼ်း ပဵၼ် တွပ်ႇလၢတ်ႈၼႂ်းပၢင်ၵုမ်သၽႃးဝႃႈ “ လွင်ႈၼႆႉ မၼ်းဢမ်ႇယဝ်ႉတီႈႁဝ်းၶႃႈၵူၺ်း လွင်ႈတေလူတ်းယွၼ်ႇပွႆႇပၼ်ၼၼ်ႉ မၼ်းဢိင်ၼိူဝ် ပိူင်ငဝ်ႈပိုင်းမိူင်း မတ်ႉတႃ ၼိုင်ႈဢၼ်သေ တႃႇတေၶိုၼ်းမႄးတႅပ်းတတ်း တႃႇတေၶိုၼ်းမႄးႁဵတ်းလႅၼ် လိၼ် ဢိူင်ႇ၊ ပွၵ်ႉ၊ ဝၢၼ်ႈ၊ ၸႄႈဝဵင်း ၸိူဝ်းၼႆႉ တေၶိုၼ်းမႄးယၢႆႉႁၢင်ႈၽႅၼ်ႇလိၼ်။ ၸွမ်ၽွင်းလူင်မိူင်းတႆး လူဝ်ႇလႆႈလူင်း လၢႆးမိုဝ်းသေ ၵမ်ႉထႅမ်ယဝ်ႉၵေႃႈ တေလႆႈတၢင်ႇၶိုၼ်ႈမႃးတီႈၸွမ်ၸိုင်ႈ၊ ၸွမ်ၸိုင်ႈတေလူင်းလၢႆးမိုဝ်းၵွၼ်ႇ ၸင်ႇတေလႆႈ” ဝႃႈၼႆ။

တႃႇၸွမ်ၸိုင်ႈမိူင်းႁူမ်ႈတုမ် တေလူင်းလၢႆးမိုဝ်းလႆႈၼၼ်ႉ ၽွင်းလူင် ၾၢႆႇႁူမ်ႇလူမ်ႈၼႂ်းမိူင်း(ပြည်ထဲရေး)၊ ၾၢႆႇပႃႇမႆႉလႄႈ ၾိင်ႈတိုၼ်းသၽႃႇဝ ၶဝ်ၸိူဝ်းၼႆႉ။ ဢိၵ်ႇပႃးတင်းလုမ်းလူင်ပွင်ၸိုင်ႈမိူင်းႁူမ်ႈတုမ် ဢုပ်ႇဢူဝ်းၵၼ်သေ ၸင်ႇတေတၢင်ႇ ၶိုၼ်ႈၸူးတီႈၸွမ်ၸိုင်ႈမိူင်းႁူမ်ႈတုမ်၊ ၸွမ်ၸိုင်ႈလူင်းလၢႆးမိုဝ်းၵွၼ်ႇ ယွၼ်ႉၼၼ်လႄႈ ႁႂ်ႈလူင်ပွင်ၸိုင်ႈႁႃတၢင်းပၼ်တႃႇ ၸွႆႈထႅမ်ပၼ်လႆႈ ဝႃႈၼႆ။

တွၼ်ႈတႃႇတေလူတ်းယွမ်းပွႆႇပၼ်/ ပၢၵ်ႈပႅတ်ႈ ဢၼ်မီးၼႂ်းသဵၼ်ႈမၢႆ ၾၢႆႇပႃႇမႆႉၼၼ်ႉ ယူႇတီႈၸဝ်ႈၼႃးၶဝ် တေလႆႈ ႁဵတ်းလိၵ်ႈသေ တၢင်ႇၶိုၼ်ႈၸူး တီႈပွၵ်ႉ/ ဢိူင်ႇ၊ ၸႄႈဝဵင်း၊ ၸႄႈတွၼ်ႈ၊ ၸႄႈမိူင်း ယဝ်ႉၸင်ႇတေတၢင်ႇၶိုၼ်ႈ ၸူးထိုင်တီႈ ၸွမ်ၸိုင်ႈမိူင်းႁူမ်ႈတုမ် ဝႃႈၼႆ။

ႁႆႈၼႃးၵူၼ်းမိူင်းၵိုင် 77 ဢေႊၶိူဝ်ႊပၢႆ ဢၼ်ၶဝ်ႈပႃးၵႂႃႇၼႂ်းၼႃႈလိၼ်ၾၢႆႇပႃႇမႆႉၼၼ်ႉ တင်းမူတ်း ၸဝ်ႈၶွင်ပဵၼ် 19 ၵေႃႉ ဝႃႈၼႆ။