တူင်ႇဝူင်းတႆး ၼႂ်းၵဵင်းမႆႇ ၸိုင်ႈထႆး ႁူမ်ႈၵၼ်ၸတ်းႁဵတ်း ပၢင်ယုၵ်ႉယွင်ႈႁူမ်ၸူမ်းၸဝ်ႈတူၼ်ၶူး Dr. ၸဝ်ႈ တိုၼ်းတႆး တီႈ ဝတ်ႉပႃႇပဝ်ႈ ၵၢင်ဝဵင်းၵဵင်းမႆႇ တိုဝ်ႉတၢင်း ၸဝ်ႈလႆႈႁပ်ႉၸုမ်းၶူး Ph.D in Buddhist Studies တီႈၸၼ်ႉၸွမ် မႁႃၸုလႃး လူင်းၵွၼ်းရၢၸ်ႉ ဝိထယႃးလႆး မိူင်းထႆး ယုၵ်ႉယွင်ႈ။

ဝၼ်းတီႈ 29/05/2019 ယၢမ်းၵၢင်ၶမ်ႈ 7 မူင်းထိုင် 9 မူင်း ပီႈၼွင်ႉတႆး/ တူင်ႇဝူင်းတႆး ၼႂ်းၵဵင်းမႆႇ ႁူမ်ႈၵၼ် ၸတ်းႁဵတ်းပၢင် ယုၵ်ႉယွင်ႈႁူမ်ၸူမ်း ၸဝ်ႈတူၼ်ၶူး Dr. ၸဝ်ႈတိုၼ်းတႆး ဝိသုတ်ႉထိၺႃၼ မႁႃသတ်ႉထမ်မၸေႃးတိၵထၸ (Ph.D in Buddhism) ၸဝ်ႈၵွၼ်းဝတ်ႉလူင်ႁေႃၶမ်း မိူင်းမၢဝ်း။ ပၢင်ယုၵ်ႉယွင်ႈႁူမ်ၸူမ်းၼႆႉ တေၸတ်းႁဵတ်းတီႈဝတ်ႉပႃႇပဝ်ႈ ၸႄႈ ဝဵင်းၵဵင်းမႆႇ ၸိုင်ႈထႆး။

ၸဝ်ႈတူၼ်ၶူး Dr. ၸဝ်ႈတိုၼ်းတႆးၼႆႉ ၸႃတိတီႈၵိူတ်ႇ မိူင်းၸေႊၾၢင်၊ ၸႄႈတွၼ်ႈမိူင်းၶွၼ် ၼႃႈလိၼ်ၽွင်းငမ်းတူဝ် ၵဝ်ႇတႆး ၶဝ်ႈႁၢပ်ႇၵၢၼ်သႃသၼႃ – ၼုင်ႈၽႃႈလိူင်သၢင်ႇၵၢၼ်း မိူဝ်ႈဢႃယုၸဝ်ႈလႆႈ 12 ၶူပ်ႇ။ ၶိုၼ်ႈပဵၼ်ရႁၢၼ်း မိူဝ်ႈဢႃယု ၸဝ်ႈ 20 ပီ။

ဢွၼ်ၼမ်း – ၸတ်းပၢင်ၾိုၵ်းၽွၼ်ႉ၊ ပၢင်တၢၼ်ႈၶႆႈ၊ ပၢင်မဵတ်ႉတႃထမ်း။ ယေႃးတူဝ်ႁွတ်ႈထိုင် ၼႂ်းထုင်ႉမိူင်းမၢဝ်း၊ မိူင်း ၶွၼ်၊ မိူင်းလႃႈ၊ မိူင်းဝၼ်း၊ မိူင်းတိင်၊ မိူင်းလႅမ်း၊ မူႇၸေႊ၊ ၼမ်းၶမ်း၊ သႅၼ်ဝီ၊ လႃႈသဵဝ်ႈ၊ ၼမ်ႉလၼ်ႈ၊ လၢႆးၶႃႈ၊ ၵဵင်းတုင်၊ တူၼ်ႈတီး၊ ဝဵင်းလိူဝ်ႇ၊ ၵျႃႊပၼ်ႊ၊ ၶူဝ်ႊရီႊယိူဝ်ႊ၊ မိူင်းထႆး ၸဵမ်ၸိူဝ်းၼႆႉ။

လိူဝ်ၼၼ်ႉ တဵမ်ႈၽဵင်းၵႂၢမ်းလၢႆလၢႆၶိူဝ်း/ လၢႆလၢႆႁူဝ်လႄႈ ပပ်ႉလိၵ်ႈၽိုၼ်လၢႆးလၢႆလၢႆပပ်ႉ ဝႃႈၼႆ။

တွၼ်ႈႁၢပ်ႇၵၢၼ်သႃသၼႃ – ပူၵ်းတင်ႈႁူင်းႁဵၼ်း ၵေႃႇသၢင်ႈဝိႁၢရ် မိူၼ်ၼင်ႇ ႁူင်းႁဵၼ်းၽေႃးထိ၊ ဝတ်ႉလူင်ႁေႃၶမ်း မိူင်း မၢဝ်း၊ သိုပ်ႇသူင်ႇလုၵ်ႈႁဵၼ်း ၵႂႃႇႁဵၼ်းတေႃႇ တၢင်းမိူင်းတႆး၊ မိူင်းမၢၼ်ႈ၊ တၢင်းမိူင်းၶႄႇ၊ မိူင်းထႆး၊ မိူင်းသီႇႁူဝ်ႇ ၸိူဝ်းၼႆႉ။

ၸဝ်ႈႁၢပ်ႇႁၢမ် ၵၢၼ်လေႃးၵီႇ လေႃးၵုတ်ႈ – ပဵၼ်ႁူဝ်ပဝ်ႈမၢႆ 2 လုမ်းပုတ်ႉထသႃသၼႃ မိူင်းၶႄႇ B.A.C ၊ ႁူဝ်ပဝ်ႈ လုမ်းပုတ်ႉ ထသႃသၼႃ ၼႃႈလိၼ်ၽွင်းငမ်းတူဝ်ၵဝ်ႇတႂ်ႈၶူင်း၊ ဢတိပတိ ၽူႈၵွၼ်းႁူင်းႁဵၼ်းၽေႃးထိ ဝတ်ႉလူင်ႁေႃၶမ်း မိူင်းမၢဝ်း။

ၸုမ်ႈၶူးဢၼ်လႆႈႁပ်ႉ – ပီ 2013 လူင်ပွင်ၸိုင်ႈမၢၼ်ႈ ယုၵ်ႉယွင်ႈၸုမ်ႈၶူး သတ်ႉထမ်မ ၸေႃးတိၵထၸ၊ ပီ 2016 မိူင်း ဢိၼ်ႊၻီႊယိူဝ်ႊ ယုၵ်ႉယွင်ႈ ၸုမ်ႈၶူး Ph.D ၻွၵ်ႊၻိူဝ်ႊ၊ ပီ 2018 လူင်ပွင်ၸိုင်ႈမၢၼ်ႈ ယုၵ်ႉယွင်ႈ ၸုမ်ႈၶူး မႁႃသတ်ႉ ထမ်မ ၸေႃး တိၵထၸ၊ ပီ 2019 မိူင်းထႆး ၸၼ်ႉၸွမ်မႁႃၸုလႃး ယုၵ်ႉယွင်ႈ ၸုမ်ႈၶူး Ph.D ၻွၵ်ႊတိူဝ်ႊ။