လုမ်းၽွင်းတၢင် မိူင်းႁူမ်ႈတုမ်မၢၼ်ႈ ဢၼ်ပၵ်းတီႈဝဵင်းလူင်ပိူၺ်ႇၵျိင်း မိူင်းၶႄႇၼၼ်ႉ ပၼ်ၾၢင်ႉထိုင် ၵူၼ်းၵႂႃႇႁဵတ်း ၵၢၼ်ၼႂ်း မိူင်းၶႄႇ ႁႂ်ႈဢွၼ်ၵၼ်ဝႆႉသတိ မေႃယူႇသၢင်ႈၵိၼ်သဝ်းၵၼ်။
ဝၼ်းတီႈ 27/05/2019 ၼၼ်ႉ ယူႇတီႈလုမ်းၽွင်းတၢင် မိူင်းႁူမ်ႈတုမ် ဢၼ်ပၵ်းလုမ်းဝႆႉတီႈဝဵင်းလူင်ပိူၺ်ႇၵျိင်း ၸိုင်ႈမိူင်း ၶႄႇ ၼၼ်ႉ ဢွၵ်ႇၶေႃႈပၼ်ၾၢင်ႉထိုင် ႁႅင်းၵၢၼ်ယၢၼ် မိူင်းႁူမ်ႈတုမ် ၸိူဝ်းၶဝ်ႈၵႂႃႇႁဵတ်းၵၢၼ် ၼႂ်းမိူင်းၶႄႇ တင်းသဵင်ႈ ႁႂ်ႈႁဵတ်း ဝတ်းဝႂ်ယူႇသဝ်းၸွမ်းၶွပ်ႇပိူင်၊ ပေႃးဢမ်ႇမီးဝတ်းဝႂ်တေပဵၼ်ၵူၼ်းႁၢမ်းသုၼ်ႇလႆႈ ႁႂ်ႈၾၢင်ႉၵၼ်ယႂ်ႇၼမ်သေၵမ်း ၸဵမ်ၸိူဝ်း ၼႆႉ။
ၼႂ်းၽိုၼ်လိၵ်ႈ ၶေႃႈပၼ်ၾၢင်ႉၼၼ်ႉ ဢွၵ်ႇဝႆႉဝႃႈ “ ႁႅင်းၵၢၼ်မိူင်းႁူမ်ႈတုမ်မၢၼ်ႈ ၸိူဝ်းၶဝ်ႈမႃးႁဵတ်းၵၢၼ် ၼႂ်းမိူင်းၶႄႇ ၼၼ်ႉ ႁႂ်ႈဢွၼ်ၵၼ်မီးဝတ်းဝႂ်/ ဝီႊသႃႊၵၼ်သေမႃး။ လိူဝ်ၼၼ်ႉ မၢင်ၸိူဝ်းႁဵတ်းဝႂ်ၶၢမ်ႈမိူင်းၶဝ်ႈမႃးၼၼ်ႉ ႁႂ်ႈယူႇၼႂ်းၶွပ်ႇ ဢၼ်မၵ်းတတ်း ၶဵတ်ႇၼႃႈလိၼ်ဝႆႉၸိူဝ်းၼၼ်ႉ ယႃႇပေဢွၵ်ႇပူၼ်ႉၶွပ်ႇၶဵတ်ႇဢၼ်မၵ်းတၵ်းယဝ်ႉၵေႃႈ သင်ႁႅင်းၵၢၼ် ယၢၼ်မိူင်းၸိူဝ်းၶဝ်ႈ ဢွၵ်ႇ ၸွမ်းလႅၼ်လိၼ်ၼၼ်ႉ သင်ဢမ်ႇမီးဝႂ်ႁဵတ်းၵၢၼ်၊ ဢမ်ႇ မီးဝီႊသႃႊ တဵမ်ထူၼ်ႈၼႆၸိုင် သင်ၶဝ်ႈမႃးႁဵတ်းၵၢၼ်ၼႂ်း မိူင်းၶႄႇ ၵူဝ်လႆႈသုမ်းသုၼ်ႇလႆႈသုၼ်ႇပဵၼ်ၵၼ် ႁႂ်ႈဝႆႉၾၢင်ႉသတိၵၼ်။ လိူဝ်ၼၼ်ႉ သင်ဝႃႈ ၶဝ်ႈမႃးၼႂ်းမိူင်းၶႄႇၸိုင် မိူၼ် ၼင်ႇ ဝႂ်ၶၢမ်ႈမိူင်းလႄႈ ဝတ်းဝႂ်မိူင်းႁူမ်ႈတုမ် (မၢႆၾၢင်) ၸိူဝ်းၼၼ်ႉ ႁႂ်ႈႁဵတ်းၽိုၼ်မိူၼ် ဝႆႉထႅင်ႈသေ သိမ်းဝႆႉလီလီ” ဝႃႈၼႆ။
လိူဝ်ၼၼ်ႉ သင်ဝႃႈ ႁႅင်းၵၢၼ်ယၢၼ်မိူင်း ၸိူဝ်းၶဝ်ႈၵႂႃႇႁဵတ်းၵၢၼ်ၼႂ်းၸိုင်ႈမိူင်းၶႄႇၼၼ်ႉ သင်ထူပ်းလွင်ႈယၢပ်ႇၽိုတ်ႇၸိုင် ၶတ်းၸႂ်ၶဝ်ႈၵႂႃႇႁူင်းပလိၵ်ႈၶႄႇ ဢၼ်ယူႇၸမ်ႁိမ်းႁွမ်းႁဝ်းယူႇ။ ဢမ်ႇၼၼ် ၵပ်းသိုပ်ႇယွၼ်းတၢင်းၸွႆႈထႅမ် တီႈလုမ်းၽွင်း တၢင်မိူင်ႈႁူမ်ႈတုမ် ဢၼ်ပၵ်းဝႆႉတီႈ ပိူၺ်ႇၵျိင်း(မိူင်းပၢၵ်ႇၵိၼ်ႇ)ၼၼ်ႉ ဝႃႈၼႆ။
