ႁႅင်းၵၢၼ်တႆး ဢၼ်ၶဝ်ႈႁဵတ်းၵၢၼ်ၼႂ်းၵဵင်းမႆႇ ၵေႃႉၼိုင်ႈၼၼ်ႉ ၸုၵ်းၼိူဝ်ရူတ်ႉၶိူင်ႈသေႁေႃႈလႄႈ ၺႃးပလိၵ်ႈထႆး လမ်းတီႉၺွပ်း ၵုမ်းၶင်တူဝ်သေ ထုၵ်ႇမႂ်ႇငိုၼ်း 1 မိုၼ်ႇဝၢတ်ႇ။

ဝၼ်းတီႈ 28/05/2019 ယၢမ်းၵၢင်ၼႂ် ၸိုဝ်ႈႁွင်ႉ ၸၢႆးဢွင်ႇမိူင်း ဢႃယု 21 ပီ ပဵၼ်ၸၢဝ်းတႆး ၸုၵ်းၼိူဝ်ရူတ်ႉၶိူင်ႈသေ ႁေႃႈ ၼိူဝ်သဵၼ်ႈတၢင်းၼႂ်းၶူးမိူင်း ၸႄႈဝဵင်းၵဵင်းမႆႇ ၸိုင်ႈထႆး။ ၵႂႃႇမႃးဢမ်ႇၸွမ်းပၵ်းပိူင်/ ၸၢင်ႈႁဵတ်းႁႂ်ႈပဵၼ် ၽေးဢုပၢတ်ႈ တေႃႇ ၵူၼ်းၵႂႃႇမႃး ႁဵတ်းႁႂ်ႈၵူၼ်းၵႂႃႇမႃးတိုၼ်ႇသၢၼ်ႈသေ ၺႃးၸဝ်ႈၼႃႈတီႈပလိၵ်ႈထႆး ၵူတ်ႇထတ်းၵုမ်းၶင်တူဝ်လႆႈ ဝႃႈၼႆ။

လႆႈႁၼ်ၼိူဝ် Social Media ၾဵတ်ႉပုၵ်ႉတၢင်ႇဝႆႉၼၼ်ႉ “ ၼၢင်းယိင်းၵေႃႉၼိုင်ႈ ဢၼ်ႁေႃႈၵႃးမႃးတၢင်းလင် ၸၢႆးဢွင်ႇမိူင်း လႆႈထႆႇဝီႊဢူဝ်ႊ တၢင်ႇၶိုၼ်ႈဝႆႉၼၼ်ႉဝႃႈ မိူဝ်ႈၽွင်းၼၼ်ႉပဵၼ် ၶၢဝ်းလုၵ်ႈဢွၼ်ႇၵႂႃႇႁူင်းႁဵၼ်း တူၵ်းၸႂ်ၸွမ်းပေႃးသၼ်ႇ၊ ပေႃးလႆႈႁေႃႈငိူင်ႉပၢႆႈမၼ်းၸၢႆးၶႃႈဢေႃႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈထႆး ၵုမ်းၶင်တူဝ် ၸၢႆးဢွင်ႇမိူင်းသေ တေပၼ်တူတ်ႈတၢမ်ႇၵႂႃႇ ၸွမ်းၼင်ႇပၵ်းပိူင် မၢႆမီႈ၊ ၵမ်းလိုၼ်းသုတ်းတႄႉ မီးၶၢဝ်ႇယိုၼ်ယၼ်ၵႂႃႇ တႅပ်းတတ်းမႂ်ငိုၼ်း 1 မိုၼ်ႇဝၢတ်ႇ ဝႃႈၼႆ။

ၶေႃႈမုလ်း – CM108 Chaing Mai