လႅၼ်လိၼ်တႆး – ထႆး ၸႄႈဝဵင်းတႃႈၶီႈလဵၵ်း ပဵၼ်ၽေးဢုပၢတ်ႈ ရူတ်ႉၽႃႇၵၼ် မီးၵူၼ်းတၢႆယွၼ်ႉ ဢမ်ႇယွမ်း 3 ၵေႃႉယဝ်ႉ ဝႃႈၼႆ။
ဝၼ်းတီႈ 28/05/2019 ယၢမ်းၵၢင်ၶမ်ႈ 9:45 မူင်း ၵႃးလမ်းၼိုင်ႈ ႁေႃႈပိၼ်ႈၽူၼ်/ သူၼ်သဵၼ်ႈတၢင်း၊ သမ်ႉႁေႃႈဝႆးႁႅင်းသေ တမ်ၽႃႇၵူၼ်းၶီႇရူတ်ႉၶိူင်ႈ သွၼ်ႉၵၼ်မႃးၸွမ်းၵၼ် 2 ၵေႃႉ တီႈသဵၼ်ႈတၢင်းလူင် ပွၵ်ႉသၼ်သၢႆး (ၵ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ၵူၼ်းၶီႈရူတ်ႉၶိူင်ႈမႃးၸွမ်းၵၼ် 2 ၵေႃႉၼၼ်ႉ လႆႈလူႉတၢႆထင်တီႈ ဝႃႈၼႆ။
သိုပ်ႇၶၢဝ်ႇ Tachileik ဢွၵ်ႇဝႆႉဝႃႈ “ ၵႃးလမ်းၼိုင်ႈ ယွၼ်ႉသွၼ်သေ ႁေႃႈဝႆး တမ်ၽႃႇၵူၼ်းၶီႇရူတ်ႉၶိူင်ႈမႃးၸွမ်းၵၼ် 2 ၵေႃႉ လႆႈလူႉတၢႆ ထင်တီႈၵမ်းလဵဝ် ပဵၼ်ၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ။ တူဝ်ၵူၼ်းႁေႃႈၵႃးလႅၼ်ႈပၢႆႈ/လွတ်ႈဝႆႉ” ဝႃႈၼႆ။
ယူႇတီႈၸုမ်းၸွႆႈထႅမ် ပရႁိတ ၸႄႈဝဵင်းတႃႈၶီႈလဵၵ်း လႆႈၸွႆႈဢဝ်တူဝ်တၢႆ ၵူၼ်း 2 ၵေႃႉၼၼ်ႉသူင်ႇတီႈႁူင်းယႃ တႃႈၶီႈ လဵၵ်းယဝ်ႉ ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ပဵၼ်ၽေးဢုပၢတ်ႈ ရူတ်ႉတမ်ၽႃႇၵၼ် ၼႂ်းလိူၼ်မေႊၼႆႉၵူၺ်း ပဵၼ်ၵႂႃႇ 5 ပွၵ်ႈ။ မီးၵူၼ်းလူႉ တၢႆၵႂႃႇယဝ်ႉ 3 ၵေႃႉ။
ၶေႃႈမုလ်း – Tachileik News Agency