သင်ၶၸဝ်ႈလႄႈ တၵ်ႉၵႃႇ ဝဵင်းလၢႆးၶႃႈ ၶုတ်းၺႃးႁုၼ်ႇႁၢၼ်ႈၽြႃးၵဝ်ႇၵႄႇ ၼပ်ႉႁူဝ်ပၢၵ်ႇသူႇ ၼႂ်းဝၢင်းထၢတ်ႈၵွင်းမူးၵဝ်ႇ တီႈပွၵ်ႉ 3 ဝဵင်းလၢႆးၶႃႈ။

ဝၼ်းတီႈ 22/05/2019 သင်ၶၸဝ်ႈ လႄႈ တၵ်ႉၵႃႇသတ်ႉထႃး ၸႄႈဝဵင်းလၢႆးၶႃႈ ႁူမ်ႈၵၼ် ၶုတ်းဢဝ်ၽြႃးၵဝ်ႇၵႄႇ ဢၼ်မီး တီႈၵွင်းမူး(ထၢတ်ႈ) တီႈၾၢႆႇၸၢၼ်း ဝတ်ႉ/ၵျွင်းပၢင်ႇ ပွၵ်ႉ 3 ၸႄႈဝဵင်းလၢႆးၶႃး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ဝႃႈၼႆ။

ၸဝ်ႈတူၼ်ၶူး ပၼ်ႇတဝ ၸဝ်ႈၵွၼ်းဝတ်ႉ/ ၵျွင်းပၢင်ႇ ၸႄႈဝဵင်းလၢႆးၶႃး လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝၼ်းတီႈ 20 ၼၼ်ႉ ႁဝ်းၸဝ်ႈၶဝ် တင်း ၽူႈၵွၼ်းပွၵ်ႉ လႄႈ ၽူႈမီးပုၼ်းၽွၼ်း 5-6 ၵေႃႉ ၵႂႃႇတႅၵ်ႈၼႂ်းဝၢင်းၵွင်းမူးၼၼ်ႉသေ ယွၼ်ႉဝႃႈ မၼ်းပဵၼ်ၼႃႈလိၼ်သႃသၼႃ ၶွင်ၵျွင်းပၢင်ႇႁဝ်းၵုမ်းဝႆႉလႄႈ ၽွင်းမိူဝ်ႈၼၼ်ႉ ႁဝ်းၸဝ်ႈၶဝ်သမ်ႉ ၵႂႃႇၼင်ႈတၢင်း ၼိူဝ်တီႈ ၵွင်းမူးၵဝ်ႇၼၼ်ႉ လႆႈႁၼ်မုၼိၽြႃးပဵၼ်ၸဝ်ႈ ဢွၵ်ႇမႃးတီႈႁိမ်းၵွင်းမူးၼၼ်ႉ ၵမ်းၼႆႉ ႁဝ်းၸဝ်ႈၶဝ် ဢွၼ်ၵၼ်ပၢၵ်ႈ မၢၵ်ႇဢုတ်ႇ ဢၼ်လွမ်ႉႁွပ်ႈဝႆႉၼၼ်ႉသေ တူၺ်း/ ၶုတ်းတူၺ်းသေ လႆႈႁၼ်ၼႃႈၽြႃး ၵမ်းၼႆႉ ၶုတ်းလူင်းထႅင်ႈသေ လႆႈမႃး ၽြႃးဢုတ်ႇသူႇၼိုင်ႈ တေမီးမွၵ်ႈ 4 ထတ်းပၢႆ လႆႈၶုတ်းဢဝ်ဢွၵ်ႇမႃး” ဝႃႈၼႆ။

သိုပ်ႇလၢတ်ႈဝႃႈ “ ၵမ်းၼႆႉ ထိုင်မႃးဝၼ်းတီႈ 21 ၸင်ႇပၢင်းၸဝ်ႈသြႃႇၶဝ် ႁွင်ႉၽူႈယႂ်ႇၵူၼ်းလူင်ၶဝ်သေၵေႃႈ ဢုပ်ႇၵၼ်။ ထိုင်မႃး ဝၼ်းတီႈ 22 ၸင်ႇလူင်းမိုဝ်းၶုတ်း ၸွမ်းၵွင်းမူးၵဝ်ႇၵႄႇ ၼႂ်းဝၢင်းၼၼ်ႉ မီးၵွင်းမူးၵဝ်ႇၵႄႇ 10 သူႇ။ တေႃႇထိုင် ယၢမ်းလဵဝ်တႄႉ လႆႈၶုတ်းၸူင် ဢဝ်ဢွၵ်ႇမႃးၸွမ်းၵွင်းမူး ၸိူဝ်းၼၼ်ႉ တင်းမူတ်း ဢၼ်ၶုတ်းလႆႈ ပဵၼ်ၽြႃး ႁိၼ်ၶၢဝ် ၵမ်ႈၼမ်သေတႃႉ ဢၼ်ဢဝ်ငိုၼ်းႁဵတ်းဝႆႉ၊ ၶမ်းလေႃႇဝႆႉ ၵေႃႈမီး။ လိူဝ်ၼၼ်ႉ ၸဵမ်ႁုၼ်ႇႁၢင်ႈၸဝ်ႈရႁၢၼ်း ၵေႃႈပႃး တင်း မူတ်းဢမ်ႇမွၵ်ႈ 250 သူႇပၢႆၼၼ်ႉယဝ်ႉ” ဝႃႈၼႆ။

ႁုၼ်ႇႁၢင်ႈၽြႃး ဢၼ်ၶုတ်းလႆႈ တီႈၼႂ်းဝၢင်းၵွင်းမူးၵဝ်ႇ ၼႂ်းလိၼ်သႃသၽႃၼႆႉ တေပူႇၸေႃႇဢဝ်ဝႆႉ တီႈဝတ်ႉ/ ၵျွင်းပၢင်ႇ တွၼ်ႈတႃႇ ပီႈၼွင်ႉတၵ်ႉၵႃႇသတ်ႉထႃး ပေႃးတေလႆႈမႃးဝႆႈမႃးသႃ လူႇတၢၼ်းၵၼ် ဝႃႈၼႆ။

ၸဝ်ႈတူၼ်ၶူး ပၼ်ႇတဝ လၢတ်ႈဝႃႈ “ ဢွင်ႈတီႈ ဝၢင်းၵွင်းမူး ၵဝ်ႇၵႄႇၼၼ်ႉ ႁဝ်းၸဝ်ႈၶဝ် တေၵေႃႇၵွင်းမူးဝႆႉသူႇၼိုင်ႈ။ ၵူၺ်းၵႃႈ တေၵေႃႇမိူဝ်ႈလႂ် ဢၼ်ဝႃႈၼၼ်ႉတႄႉ ပႆႇႁူႉ။ ႁုၼ်ႇႁၢင်ႈၽြႃးဢၼ်ၶုတ်းလႆႈမႃးၸိူဝ်းၼႆႉ တေဢဝ်မႃးဝႆႉတီႈဝတ်ႉ ၵျွင်းပၢင်ႇ တေဢမ်ႇဢဝ်ထႃႇပၼႃႇယဝ်ႉ။ တေႃႈလဵဝ်တႄႉ တိုၵ်ႉဢဝ်ၸၢၵ်ႈ ထုၺ်ထႆဝႆႉသေ တိုၵ်ႉဢွၼ်ၵၼ် ၶုတ်းတူၺ်း ထႅင်ႈယူႇ ဝူၼ်ႉဝႃႈ တေၶုတ်းဢဝ်ဢွၵ်ႇမႃးမူတ်းမူတ်း ႁုၼ်ႇႁၢင်ႈၽြႃးၼၼ်ႉ” ဝႃႈၼႆ။

မိူဝ်ႈပူၼ်ႉမႃး 32 ပီၼၼ်ႉၵေႃႈ တီႈၼႂ်းဝၢင်းၵွင်းမူးၼႆႉၵူၺ်းၼင်ႇၵဝ်ႇ ၶုတ်းလႆႈၽြႃးလူင်သူႇၼိုင်ႈ ၼမ်ႉၼၵ်းမီး 330 ၸွႆႉ ပဵၼ် ၽြႃးတွင်း၊ ယၢမ်းလဵဝ်မီးဝႆႉတီႈၵွင်းမူးၼၢမ်ႇမိူင်းယဝ်ႉ ဝႃႈၼႆ။