လူင်ပွင်ၸိုင်ႈ၊ တပ်ႉမတေႃႇလႄႈ ၸုမ်းဢူၺ်းလီ ပွတ်းႁွင်ႇ 4 ၸုမ်း ႁႃဢွင်ႈတီႈတႃႇဢုပ်ႇဢူဝ်း/ တီႈဝႆႉဝၢင်းၸႂ်လွင်ႈႁူမ်ႇ လူမ်ႈ ယွၼ်ႉမႆႈၸႂ်လွင်ႈ ႁူမ်ႇလူမ်ႈ ႁူဝ်ပဝ်ႈ AA ၼႆသေ ဢွင်ႈတီႈလႄႈဝၼ်း ဢၼ်တေႁူပ်ႉၵၼ်ၼၼ်ႉ တိုၵ်ႉဢုပ်ႇဢူဝ်း ငူပ်ႉငီႉၵၼ်ယူႇ ဝႃႈၼႆ။

ဝၼ်းတီႈ 24/05/2019 ၽူႈၶဝ်ႈၸုမ်း လူင်ပွင်ၸိုင်ႈမိူင်းႁူမ်ႈတုမ်လႄႈ ၸုမ်းၸွမ်ၽွင်းလူင် ဢိၵ်ႇတင်း သုၼ်ၵၢင်လွင်ႈငမ်း ယဵၼ် မႄးလီၼႂ်းၸိူဝ်ႉၸၢတ်ႈ NRPC၊ ၸုမ်းၸၢတ်ႈၸိုင်ႈလုမ်ႈၾႃႉ UN ဢိၵ်ႇတင်း လၢႆလၢႆၾၢႆႇ/ ၸုမ်းၼွၵ်ႈမိူင်း တင်းလုမ်း ၽွင်းတၢင်ၼွၵ်ႈမိူင်းၸိူဝ်းၼႆႉ လႆႈႁူပ်ႉၵၼ်တီႈလုမ်းသုၼ်ၵၢင်လွင်ႈငမ်းယဵၼ် မႄးလီၼႂ်းၸိူဝ်ႉၸၢတ်ႈ NRPC ၼေႇပျီႇ တေႃႇ ဝႃႈၼႆ။

ဢူးၸေႃႇထေး ၾၢႆႇပွင်ႇၶၢဝ်ႇလုမ်းၸွမ်ၸိုင်ႈ မိူင်းႁူမ်ႈတုမ် လၢတ်ႈဝႃႈ “ တပ်ႉမတေႃႇႁဝ်းလၢတ်ႈဝႃႈ တႃႇႁႂ်ႈပဵၼ် လွင်ႈ ႁူမ်ႇလူမ်ႈလီၼၼ်ႉ ႁဝ်းဢမ်ႇပၼ်ႁႂ်ႈမီးလွင်ႈတုမ်ႉတိူဝ်ႉသင်သေပိူင်” ဝႃႈၼႆ။

(လုင်း) ၶၢႆႇသုၶ ၽူႈၶၢၼ်ပၢၵ်ႇ ၸုမ်းသိုၵ်းရၶႅင်ႇ AA လၢတ်ႈဝႃႈ “ လွင်ႈငူပ်ႉငီႉၵၼ် တႃႇတေဢုပ်ႇဢူဝ်းလႄႈ ဝၼ်းမၼ်း ၼၼ်ႉ ဢမ်ႇၸႂ်ႈလႄႈဝႃႈ လွင်ႈႁူမ်ႇလူမ်ႈႁူဝ်ပဝ်ႈႁဝ်းၵူၺ်း မၼ်းပဵၼ်ၵၢင်ၸႂ်ၸုမ်းဢူၺ်းလီႁဝ်းၶႃႈ 4 ၸုမ်းၼႆႉ” ဝႃႈၼႆ။

ၸုမ်းဢူၺ်းလီပွတ်းႁွင်ႇ 4 ၸုမ်းလႄႈ လူင်ပွင်ၸိုင်ႈ၊ တပ်ႉမတေႃႇ တင်း 3 ၾၢႆႇၼႆႉ ယိူင်းဢၢၼ်းဝႆႉ တေႁူပ်ႉၵၼ်မိူဝ်ႈ ဝၼ်းတီႈ 24 လိူၼ်ၼႆႉ ၼႆသေတႃႉ ၵူၺ်းဢမ်ႇပဵၼ်ႁူပ်ႉသေ လႆႈသုတ်ႉၶၢႆႉဢွင်ႈတီႈလႄႈ ဝၼ်းမၼ်းၵႂႃႇထႅင်ႈ ဝႃႈၼႆ။

မိူဝ်ႈဝၼ်းတီႈ 30/04/2019 ၼၼ်ႉ ၸုမ်းဢူၺ်းလီပွတ်းႁွင်ႇတင်းၸုမ်းတူဝ်တႅၼ်းလူင်ပွင်ၸိုင်ႈႁူပ်ႉၵၼ်တီႈဝဵင်းမူႇၸေႊ တီႈၼၼ်ႉ ၾၢႆႇလူင်ပွင်ၸိုင်ႈမီးၵၢင်ၸႂ်ၶႂ်ႈႁႂ်ႈၸုမ်းဢူၺ်းလီပွတ်းႁွင်ႇၶဝ်ႈပႃးမႃးၼႂ်းၶၵ်ႉၵၢၼ်လွင်ႈငမ်းယဵၼ်သေတႃႉ သွင် ၾၢႆႇ ဢမ်ႇတူၵ်းလူင်းလႆႈၸႂ်သင် လိူဝ်သေဝႃႈလႆႈၸႂ်တႃႇႁူပ်ႉဢုပ်ႇၵၼ်ထႅင်ႈ။

ၶေႃႈမုလ်း – RFA
သႅင်ၸွမ်မိူင်း(ပိၼ်ႇတႅမ်ႈ)