ၵူၼ်းဝၢၼ်ႈၼႃးပေႃ ၵိင်ႇၸႄႈဝဵင်းမိူင်းၵူၵ်း ၸႄႈတွၼ်ႈမိူင်းသၢတ်ႇၼၼ်ႉ လုၵ်ႈတင်းပေႃႈထဵင်မေႃးၵၼ် ၵေႃႉပဵၼ် လုၵ်ႈ ၸၢႆး ဢဝ်ၵွင်ႈသတ်ႉယၢမ်း ယိုဝ်းသႂ်ႇၵေႃႉပဵၼ်ပေႃႈၸဝ်ႈၵဝ်ႇ လူႉတၢႆထင်တီႈ။

ဝၼ်းတီႈ 25/05/2019 ယၢမ်းၵၢင်ၼႂ် 8 မူင်းၶိုင်ႈၼၼ်ႉ ၵေႃႉပဵၼ်လုၵ်ႈၸၢႆး ၸိုဝ်ႈႁွင်ႉ တႃႇရီ ဢႃယု 29 ပီ ၽိတ်းၵၼ်တင်း ၵေႃႉပဵၼ်ပေႃႈ ၸိုဝ်ႈႁွင်ႉ လုင်းသေႇၶျိၼ်မီ ဢႃယု 69 ပီ တီႈႁိူၼ်း ဝၢၼ်ႈၼႃးပေႃ ဝဵင်းမိူင်းၵူၵ်း ၸႄႈဝဵင်းမိူင်းသၢတ်ႇ ၸိုင်ႈ တႆးပွတ်းဢွၵ်ႇၶူင်း။ ၵေႃႉပဵၼ်လုၵ်ႈၸၢႆး ဢဝ်ၵွင်ႈသတ်ႉယၢမ်း ယိုဝ်းသႂ်ႇတီႈပုမ်ၵေႃႉပဵၼ်ပေႃႈၸဝ်ႈၵဝ်ႇသေ လႆႈလူႉတၢႆ ထင် တီႈၵမ်းလဵဝ် ဝႃႈၼႆ။

ၵႅမ်ပလိၵ်ႈလုမ်းၸႄႈမိူင်း ပလိၵ်ႈၵဵင်းတုင် လၢတ်ႈတီႈသိုဝ်ႇၶၢဝ်ႇ The Voice ဝႃႈ “ ၶႃသွင်ၵေႃႉပေႃႈလုၵ်ႈၽိတ်းမေႃးၵၼ် သေ ၵေႃႉပဵၼ်လုၵ်ႈ ဢဝ်ၵွင်ႈသတ်ႉယၢမ်းယိုဝ်းသႂ်ႇတီႈပုမ်ပေႃႈမၼ်းၵမ်းၼိုင်ႈသေ လႆႈပိၼ်ႈလူမ်ႉလူႉတၢႆၵႂႃႇထင်တီႈၵမ်း လဵဝ်။ ၵူၼ်းၵေႃႉယိုဝ်းၼၼ်ႉတႄႉ တၼ်းပၢႆႈလွတ်ႈဝႆႉ တေႃႈလဵဝ် ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉသွၵ်ႈတဝ် လမ်းတီႉ တူဝ်ၵူၼ်းယိုဝ်းၼၼ်ႉယူႇ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းၶဝ် လႆႈပိုတ်ႇလိူင်ႈ တႃႇဢဝ်လိူင်ႈ ၵေႃႉပဵၼ်ၸၢႆးတႃႇရီ ဢႃယု 29 ပီ တီႈႁူင်း ပလိၵ်ႈ ဝဵင်းမိူင်းၵူၵ်း။ မိူင်းၵူၵ်းတင်း မိူင်းသၢတ်ႇၼႆႉ ယၢၼ်ၵႆၵၼ် 38 လၵ်း၊ သင်မၼ်းၸၢႆးပၢႆႈၵႂႃႇတၢင်းမိူင်းထႆးၵေႃႈ တႃႇ တီႉလႆႈၼၼ်ႉၾၢႆႇပလိၵ်ႈမၢၼ်ႈတင်းပလိၵ်ႈထႆး ၵပ်းသၢၼ်ၵၼ်ဝႆႉယဝ်ႉ လႆႈႁူႉၸွမ်းၶၢဝ်ႇပိုၼ်ႉတီႈ ၼင်ႇၼႆ။