ၵူၼ်းမိူင်းတႆး 14 ၵေႃႉ ဢမ်ႇမီးဝတ်းဝႂ်ဢၼ်ထႆးႁဵတ်းပၼ်သင်သေ ၶဝ်ႈႁႃႁဵတ်းၵၢၼ်ၼႂ်းမိူင်းထႆးၼၼ်ႉ ၺႃးပလိၵ်ႈထႆး တီႉၺွပ်းၼႂ်းၸႄႈတွၼ်ႈလမ်းပၢင်း – တၢင်းလူင်းၵႂႃႇမိူင်းၵွၵ်ႇ။

ဝၼ်းတီႈ 17/05/2019 ယၢမ်းႁူဝ်ၶမ်ႈ မွၵ်ႈ 7 မူင်းၼၼ်ႉ ပလိၵ်ႈထႆး ၵူတ်ႇထတ်းတီႉလႆႈၵႃးလမ်းၼိုင်ႈ တီႈၸႄႈဝဵင်းငၢဝ်း ၸႄႈတွၼ်ႈလမ်းပၢင်း ၸိုင်ႈထႆး တီႉၺွပ်းလႆႈ ၵူၼ်းမိူင်းတႆး 14 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ 8 ၵေႃႉ ဢႃယုပႃႈတႂ်ႈ 18 ပီ။

ၸၢႆးတႆးထိူၼ်ႇ ၽူႈၸွႆႈထႅမ်ႁႅင်းၵၢၼ်လႄႈ လၢမ်ႈ(ပိၼ်ႇၽႃႇသႃႇ) လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ တင်းမူတ်း 14 ၵေႃႉ။ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု ဢမ်ႇတဵမ် 18 ပီ တင်းမူတ်း 8 ၵေႃႉ။ ၸၢႆး 2 ၵေႃႉ ယိင်း 6 ၵေႃႉၶႃႈ။ ၶဝ် 14 ၵေႃႉ ၼႆႉ တေၶဝ်ႈၵႂႃႇႁဵတ်းၵၢၼ် ၵုင်းထဵပ်ႈ(မိူင်းၵွၵ်ႇ)။ လုၵ်ႉတၢင်းမႄႈသၢႆမႃး။ လႆႈငိၼ်းတီႈ ပလိၵ်ႈၶဝ်ဝႃႈတႄႉ တေထုၵ်ႇသူင်ႇ တူဝ်ပွၵ်ႈၶိုၼ်းတၢင်းမႄႈသၢႆၶိုၼ်းတင်းမူတ်းၼႆဢေႃႈ” ဝႃႈၼႆ။

ၵူၼ်းမိူင်းတႆး 14 ၵေႃႉ ဢၼ်ဢၢၼ်းၶဝ်ႈၵႂႃႇႁဵတ်းၵၢၼ် တီႈမိူင်းၵွၵ်ႇသေ ၺႃးတီႉၺွပ်း ၸိူဝ်းၼၼ်ႉ ၵမ်ႈၼမ် ပဵၼ်ၵူၼ်း မိူင်းတႆးပွတ်းႁွင်ႇ၊ ပၢင်ႇလႅင်း၊ တၢင်းပၢင်လူင် ၵေႃႈပႃးၽွင်ႈ။

ၸၢႆးတႆးထိူၼ်ႇ လၢတ်ႈဝႃႈ “ ၵမ်ႈၼမ် ပဵၼ်ပီႈၼွင်ႉၸၢဝ်းတႆးဢေႃႈ ၼႂ်းၼၼ်ႉပႃး ၸၢဝ်းပဢူဝ်း 1 ၵေႃႉၶႃႈ။ ထၢမ်ၶဝ်တႄႉ ၶဝ်ဝႃႈ လႆႈပၼ် ၵႃႈၸၢင်ႈ 1 ၵေႃႉလႂ် 9,000 ဝၢတ်ႇ။ ၸဝ်ႈၵႃးဢၼ်တေႃႉသူင်ႇၶဝ်ၵေႃႈ ၺႃးတီႉဝႆႉၸွမ်းယဝ်ႉၶႃႈ” ဝႃႈၼႆ။

ၼႂ်းမိူင်းတႆးယၢမ်းလဵဝ် ၾၢႆႇသိုၵ်းလူင်ပွင်ၸိုင်ႈပိုၼ်ၽၢဝ်ႇၵိုတ်းတိုၵ်း(လုၵ်ႉ 4 လိူၼ် ၵႂႃႇပဵၼ် 6 လိူၼ်) ၾၢႆႇလဵဝ်ဝႆႉသေတႃႉ သမ်ႉထႅမ်ႁႅင်းသိုၵ်းတူင်ႉၼိုင်ယူႇၵူႈပိုၼ်ႉတီႈ၊ ၾၢႆႇၸုမ်းလူင်းလၢႆးမိုဝ်း NCA ယင်းဢမ်ႇဝႆႉဝၢင်းၸႂ် ဢၼ်ၵဵပ်းသိုၵ်းမႂ်ႇၵေႃႈ မီး၊ ၸိူဝ်းပႆႇလူင်းလၢႆးမိုဝ်း NCA ၵေႃႈ ၼင်ႇႁိုဝ် ႁႅင်းသိုၵ်းတေယႂ်ႇၼၼ်ႉ ၵဵပ်းသိုၵ်းမႂ်ႇၼင်ႇၵၼ်၊ ဢၼ်ၵူၼ်းမိူင်းတႄႉ ၵူဝ် ၽေးသိုၵ်းသိူဝ်၊ ၵူဝ်လႆႈႁဵတ်းသိုၵ်း၊ ၾၢႆႇၼိုင်ႈသမ်ႉယူႇၵပ်ႉၵိၼ်းၸႂ်ႁႃၵိၼ်လဵင်ႉတွင်ႉယၢပ်ႇလႄႈ ၸူဝ်းၵၼ်ပၢႆႈႁႃႁဵတ်း ၵၢၼ်တၢင်းမိူင်းၶႄႇ၊ မိူင်းထႆးယူႇၵူႈဝၼ်း။