သိုၵ်းတဢၢင်း တင်း သိုၵ်းလူင်ပွင်ၸိုင်ႈမၢၼ်ႈ ယိုဝ်းၵၼ်ၼႂ်းၸႄႈဝဵင်းၼမ်ႉသၼ်ႇ

တပ်ႉသိုၵ်းလူင်ပွင်ၸိုင်ႈမၢၼ်ႈ(တပ်ႉမတေႃႇ) တင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ။

Photo by – Google/ ၾၢင်ႇႁၢင်ႈသိုၵ်းတဢၢင်း

ဝၼ်းတီႈ 20/05/2019 ယၢမ်းၵၢင်ၼႂ် 5:22 ထိုင် 5:30 မူင်း တပ်ႉသိုၵ်းတဢၢင်း TNLA ပိုၼ်ၽၢဝ်ႇဝႃႈ လႆႈပဵၼ်ပၢင်တိုၵ်း တင်း တပ်ႉသိုၵ်းလူင်ပွင် ၸိုင်ႈမၢၼ်ႈ တပ်ႉမ 101 ဢၼ်ၶဝ်ႈတူင်ႉၼိုင် ႁိမ်းဝၢၼ်ႈၼမ်ႉ ၶိူဝ်း ၸႄႈဝဵင်းၼမ်ႉသၼ်ႇ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

တီႈႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း ဢွၵ်ႇဝႆႉဝႃႈ “ ယွၼ်ႉသိုၵ်းမၢၼ်ႈႁႅၼ်းသိုၵ်းၽိုတ်ႉၶဝ်ႈတူင်ႉၼိုင်လႄႈ လႆႈ ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼမ်ႉၶိူဝ်း။ လိူဝ်ၼၼ်ႉ ၼႂ်းလိူၼ်မေႊၼႆႉၵူၺ်း တပ်ႉသိုၵ်းတဢၢင်းတင်း တပ်ႉသိုၵ်း လူင်ပွင်ၸိုင်ႈမၢၼ်ႈ လႆႈပဵၼ်ပၢင်တိုၵ်းၵၼ်မႃး 2 ပွၵ်ႈယဝ်ႉ” ဝႃႈၼႆ။

ၾၢႆႇသိုၵ်းလူင်ပွင်ၸိုင်ႈပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် လုၵ်ႉသီႇလိူၼ်ပဵၼ်ၵႂႃႇႁူၵ်းလိူၼ်( 21/12/2018 – 30/6/2019) ၼႆ သေတႃႉ ၵၢၼ်တူင်ႉၼိုင်ၵၢၼ်သိုၵ်း/ ၽိူမ်ႉထႅမ်ႁႅင်းသိုၵ်းသမ်ႉ ဢမ်ႇလူတ်းယွမ်းလႄႈ ၸင်ႇၵႆႉလႆႈပဵၼ်ပၢင်တိုၵ်းၵၼ် တင်း ၸုမ်းသိုၵ်းၸၢဝ်းၶိူဝ်းၼႂ်းပိုၼ်ႉတီႈ။

ယၢမ်းလဵဝ်ႁူမ်ႈဝႃႈပဵၼ်ပၢင်တိုၵ်းၵၼ်သေတႃႉ ယင်းမီးၶၢဝ်ႇဝႃႈ ႁၢင်လိူၼ်မေႊၼႆႉ ၸုမ်းဢူၺ်းလီပွတ်းႁွင်ႇ 4 ၸုမ်း ဢၼ် ပဵၼ်တပ်ႉသိုၵ်းတဢၢင်း TNLA၊ ၶၢင် KIA၊ ၵဝ်ႈၵၢင်ႉ MNDAA လႄႈ ရၶႅင်ႇ AA တေသူင်ႇတူဝ်တႅၼ်းႁူပ်ႉၵၼ်တင်း တူဝ် တႅၼ်းလူင်ပွင်ၸိုင်ႈမၢၼ်ႈ တပ်ႉသိုၵ်းမၢၼ်ႈထႅင်ႈ ဝႃႈၼႆ။

ဢုပ်ႇဢူဝ်း ၽူႈတွႆႇႁွၵ်ႈ

SHARE