ၵူၼ်းမိူင်းၼႂ်းၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ႁိမ်း 5,000 ၵေႃႉ ၺႃးႁူၺ်းၶွၼ်ႈတုမ် ၵမ်ႉထႅမ်တပ်ႉသိုၵ်းလူင်ပွင် ၸိုင်ႈမၢၼ်ႈလႄႈ ႁႂ်ႈသိုပ်ႇႁၵ်ႉသႃမႅတ်ႇပႅင်းပိူင်ငဝ်ႈပိုင်းမိူင်း 2008 တုၵ်းယွၼ်းႁႂ်ႈမူၼ်ႉမႄး ၼႂ်းၶေႃႈမၢႆမီႈမတ်ႉတႃ (261) ၸွမ်းၼင်ႇပိူင်မူၼ်ႉမႄးမီးၼၼ်ႉ ဝႃႈၼႆ။
ဝၼ်းတီႈ 19/05/2019 ယၢမ်းၵၢင်ၼႂ် 7 မူင်းၶိုင်ႈ ၵူၼ်းမိူင်းၼႂ်းၸႄႈတွၼ်ႈလႃႈသဵဝ်ႈ လၢႆလၢႆၸႄႈဝဵင်း ၺႃးႁူၺ်းသူၼ်းတုမ် ၵမ်ႉထႅမ်ပႆတၢင်းၼႄၵၢင်ၸႂ်ၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တုၵ်းယွၼ်းႁႂ်ႈမူၼ်ႉမႄးၼႂ်းၶေႃႈမၢႆမီႈမတ်ႉတႃ (261) တၼ်းႁဵင်းတႅင်ႇတင်ႈၸွမ်ၽွင်းလူင်ၸႄႈမိူင်း။ ဢဵၼ်ႁႅင်းၵူၼ်းၶွၼ်ႈတုမ်ၵၼ် တီႈႁူင်းႁေႃၵၢင်ဝဵင်းလႃႈသဵဝ်ႈသေ တႄႇလုၵ်ႉပႆတၢင်းမႃးထိုင်တီႈ ပၢင်လဵၼ်ႈ မၢၵ်ႇၼင် တီႈပွၵ်ႉ 12 ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဝႃႈၼႆ။
ၽူႈတူင်ႉၼိုင် ၼႂ်းတူင်ႇဝူင်းတႆးၵေႃႉၼိုင်ႈ ၸႄႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပီႈၼွင်ႉတႆးႁဝ်း ဢၼ်မႃး ၶဝ်ႈႁူမ်ႈ ပၢင်ၵမ်ႉထႅမ်တပ်ႉမတေႃႇမၢၼ်ႈၼၼ်ႉ ၵူၼ်းဝၢၼ်ႈၵူၼ်းသူၼ်ႁဝ်း ၶဝ်ဢမ်ႇႁူႉတီႈပွင်ႇမၼ်းသင်၊ ၺႃးပိူၼ်ႈ ႁူၺ်းသေ မႃးၵူၺ်း။ ဢၼ်ၵႂႃႇႁူၺ်းပီႈၼွင်ႉတႆးႁဝ်းမႃးၼၼ်ႉၵေႃႈ မၼ်းၵေႃႈဢမ်ႇပဵၼ်ၽႂ် ပဵၼ်တႆးႁဝ်းတေႃႇတႆးႁဝ်း ၵူၺ်း။ ႁူဝ်ၵူၼ်း ဢၼ်ပႆတၢင်းၵမ်ႉထႅမ်တပ်ႉသိုၵ်းမၢၼ်ႈလႄႈ ႁၵ်ႉသႃႇမႅတ်ႇပႅင်းပိူင်ငဝ်ႈပိုင်းမိူင်း 2008 ၼၼ်ႉ ၵမ်ႈၼမ် ပဵၼ်ၵူၼ်းၸၢဝ်းမၢၼ်ႈ ဢၼ်လုၵ်ႉတၢင်းမိူင်းမၢၼ်ႈ လိၼ်ထုင်ႉပဵင်းၸိူဝ်းၼၼ်ႉမႃးယူႇႁႃၵိၼ်ၼႂ်းမိူင်းတႆးပွတ်းႁွင်ႇၵူၺ်း။ ပေႃးမႃးတူၺ်း ႁူဝ်ၵူၼ်းၶဝ် မီး ႁိမ်း 5,000 ၵေႃႉဝႃႈၼႆသေတႃႉ ၸၢဝ်းမၢၼ်ႈဢၼ်ယူႇၼႂ်းလႃႈသဵဝ်ႈႁဝ်းၼႆႉ ယင်းဢမ်ႇ မီးယူဝ်ႉ ႁူဝ်ၵူၼ်းၸၢဝ်းမၢၼ်ႈ ၼမ်တၼ်ႇၼႆႉ” ဝႃႈၼႆ။
မၼ်းၸၢႆး သိုပ်ႇလၢတ်ႈဝႃႈ “ ၵတ်ႉၵႃႈႁဝ်းၶႃႈ တၼ်းလႆႈႁူႉၶိုတ်းဢေႃႈ ပေႃးဢမ်ႇၼၼ် ပီႈၼွင်ႉတႆးႁဝ်း လၢႆလၢႆၸႄႈဝဵင်း တေၺႃးႁူၺ်းၼမ်လိူဝ်ၼႆႉမႃးထႅင်ႈလူးၵွၼ်ႇ။ ယွၼ်ႉဝႃႈ ႁူႉၶိုတ်းသေ ႁဝ်းၶႃႈ လႆႈၵပ်းၾူၼ်းၸူးႁႃ ၵူၼ်းႁဝ်းတင်း ၵူတ်ႉ ၶၢႆ၊ သႅၼ်ဝီ၊ သီႇပေႃႉ၊ ၵျွၵ်ႉမႄး၊ မိူင်းယႆ၊ တၢင်ႉယၢၼ်း၊ ၼွင်ၶဵဝ်လႄႈ ၼမ်ႉတူႈ ၸဵမ်ၸိူဝ်းၼႆႉဝႆႉသေ ၶဝ်ႁူႉလွင်ႈတၢင်း မၼ်းယဝ်ႉၵေႃႈ ၶဝ်ၵေႃႈဢမ်ႇမႃးၵၼ်ၼၼ်ႉၶႃႈယဝ်ႉ။ လိူဝ်ၼၼ်ႉ ၶႃႈၶဝ်ၵေႃႈဝႃႈ သင်ဝႃႈသူဢဝ်ၵွင်မွင်းလႄႈ တုင်းတႆး မႃးပူၵ်းပႆၵႂႃႇၼႆတႄႉ ႁဝ်းတေၸၼ်ဢဝ်လူင်းၵမ်းလဵဝ် မၼ်းဢမ်ႇၸႂ်ႈတီႈမၼ်းပူၵ်း တီႈမၼ်းတွႆႇ/ ႁႆႇသင်” ဝႃႈၼႆ။
ၵူၼ်းမိူင်းဢၼ်ၺႃးႁူၺ်းၵမ်ႉထႅမ် တပ်ႉသိုၵ်းမၢၼ်ႈလႄႈ ၵမ်ႉထႅမ်ပိူင်ငဝ်ႈပိုင်းမိူင်း 2008 ၼၼ်ႉ ၼိုင်ႈၵေႃႉလႆႈငိုၼ်း 5,000 ၵျၢပ်ႈလႄႈ လဵင်ႉၶဝ်ႈပႃးၼႆ ၵူၼ်းၼႂ်းပိုၼ်ႉတီႈ လႃႈသဵဝ်ႈၵေႃႉၼိုင်ႈတႄႉ လၢတ်ႈၼႄၼင်ႇၼႆ။
မိူဝ်ႈပူၼ်ႉမႃး ဝၼ်းတီႈ 15/05/2019 ယူႇတီႈသုၼ်ၵၢၼ်ၾၢႆႇႁူမ်ႇလူမ်ႈၸိူဝ်ႉၸၢတ်ႈသေ ဢွၼ်ႁူဝ် ၵူၼ်းၼႂ်းပိုၼ်ႉတီႈ ၸႄႈ ဝဵင်းတူၼ်ႈတီး ဢဵၼ်ႁႅင်း မွၵ်ႈ 200 ၵေႃႉ လုၵ်ႉတီႈၾၢႆႇၼႃႈလုမ်းၵဝ်ႇတပ်ႉမတေႃႇ၊ တီႈႁိမ်းဝတ်ႉ/ ၵျွင်းမိၼ်းၵုၼ်းၼၼ်ႉ သေ ပႆတၢင်း ထိုင်ဝၢင်းသဝ်ႁိၼ် ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
ပိူင်ငဝ်ႈပိုင်းမိူင်း မတ်ႉတႃ 261 ၼၼ်ႉ ၵဵဝ်ႇၵပ်းၵၢၼ်ထႅင်ႇတင်ႈ ၸွမ်းၽွင်းလူင်ၸႄႈမိူင်းလႄႈ တိူင်း။ ၼႂ်းပိူင်ငဝ်ႈပိုင်းမိူင်း 2008 ယၢမ်းလဵဝ်ၸွမ်ၽွင်းလူင်ၸႄႈမိူင်းလႄႈ တိူင်း တၵ်းလႆႈပဵၼ်လူင်ပွင်ၸိုင်ႈ သုၼ်ၵၢင်တႅင်ႇတင်ႈပၼ်။ လိူၵ်ႈဢဝ်ႁင်း ၵူၺ်းဢမ်ႇလႆႈ။ ဢၼ်သိုၵ်းတပ်ႉမတေႃႇ ၶႂ်ႈမႄးၼႆႉသမ်ႉ ယွၼ်ႉၼႂ်းသၽႃးမီးသိုၵ်း 25 % ယဝ်ႉလႄႈ သင်မႄးလႆႈမၢႆမတ်ႉ တႃ 261 ၸိုင် သိုၵ်းတပ်ႉမတေႃႇမၢၼ်ႈ ၸၢင်ႈပေႉပုၼ်ႈတႃႇတႅင်ႇတင်ႈၸွမ်ၽွင်းလူင်ၸႄႈမိူင်းလႄႈ တိူင်း။
