ၼွင်ႉၼမ်ႉၽိုင်ႈ တၢင်တူဝ်လုၵ်ႈႁဵၼ်းထႆး လႆႈၶဝ်ႈႁူမ်ႈၶႅင်ႇၾၢႆႇပၢႆးသၢႆႈ တီႈမိူင်း USA လႆႈႁပ်ႉသူးရၢင်းဝလ်း သၢင်ႈၸိုဝ်ႈ သဵင်ပၼ်မိူင်းထႆးလႄႈ လႆႈႁပ်ႉငိုၼ်းတိုၼ်းၵၢၼ်ႁဵၼ်း ။
ဝၼ်းတီႈ 12 – 17/05/2019 ပူၼ်ႉမႃးၼၼ်ႉ ၶူးသွၼ်လႄႈ လုၵ်ႈႁဵၼ်း ႁူင်းႁဵၼ်း ၻမ်ႊရူင်ႊရၢတ်ႊသူင်ႊ ၶေရႃႊ ၵဵင်းႁၢႆး လႆႈတၢင်တူဝ်မိူင်းထႆးသေ ၵႂႃႇၶဝ်ႈႁူမ်ႈပၢင်ၶႅင်ႇလွင်ႈပၢႆးသၢႆႈ (Science Project Com petition) တီႈပၢင်ပွႆး Intel ISEF2019 မိူင်း USA။
ပၢင်ၶႅင်ႇၸၼ်ႉလုမ်ႈၾႃႉ မီးလၢႆလၢႆၸိုင်ႈမိူင်းမႃးၶဝ်ႈၶႅင်ႇ ၶူင်းၵၢၼ်ဢၼ်ၼွင်ႉၼမ်ႉၽိုင်ႈ လႄႈ ဢူၺ်းၵေႃႉ လႆႈၶဝ်ႈၶႅင်ႇသေလႆႈႁပ်ႉရၢင်းဝလ်းၼႆႉတႄႉပဵၼ် “ ၶူင်းၵၢၼ်လုမ်းလႃးမဵတ်ႉ ၸိူဝ်ႉၽၼ်းၼႂ်းပိုၼ်ႉတီႈ ( โครงงานการพัฒนาสารเคลือบเมล็ดพันธุ์อุ้มน้ำจากยางไม้ในท้องถิ่น ) လႄႈလႆႈႁပ်ႉသူးၶိုၵ်ႉတွၼ်း Special Award တီႈ USAID from the American People ၾၢႆႇၵၢၼ်ၸွႆႈထႅမ် ပၢႆးပိူင်ၵူၼ်း လႆႈႁပ်ႉငိုၼ်းတိုၼ်း 3,000 ၻေႃႊလႃႊ ဝႃႈၼႆ။
ၼွင်ႉၼမ်ႉၽိုင်ႈ လၢတ်ႈဝႃႈ “ ဢၼ်လႆႈႁပ်ႉရၢင်းဝလ်းၼႆႉ ပဵၼ်ဢၼ်ၸူမ်းသိူဝ်းတႄႉၶႃႈဢေႃႈ ယိၼ်းၸူမ်းယႂ်ႇၼမ်ထိုင် ၶူးသွၼ်၊ ၽူႈယႂ်ႇၵူၼ်းလူင်၊ ဢူၺ်းၵေႃႉလႄႈၵူႈၵူႈၵေႃႉ ဢၼ်ၸွႆႈထႅမ် ပၼ်ၵူႈလွင်ႈလႄႈ ပၼ်ႁႅင်းၸႂ်ၶႃႈ ။ ဢၼ်ႁဝ်းၶႃႈၵႂႃႇၶႅင်ႇၼႆႉ လႆႈၶတ်းၸႂ်တႄႉတႄႉဝႃႈဝႃႈဢေႃႈ ယွၼ်ႉဝႃႈမီးၵူၼ်းၵတ်ႉၶႅၼ်ႇလၢႆမိူင်းမႃးႁူမ်ႈၶႅင်ႇၵၼ် ၾၢႆႇၼိုင်ႈၵေႃႈၽႃသႃၵႂၢမ်းလၢတ်ႈ ၵူၺ်း ၵႃႈႁဝ်းၶႃႈၵေႃႈ ဢွၼ်ၵၼ် ၶတ်းၸႂ်တဵမ်တီႈ တွၼ်ႈတႃႇမိူင်းထႆး ပိူဝ်ႈႁႂ်ႈလုမ်ႈၾႃႉႁူႉဝႃႈ ၵူၼ်းထႆးႁဝ်းမီး ၼမ်ႉၵတ်ႉပဵင်းပိူၼ်ႈယူႇ ” ဝႃႈၼႆ။
ၼွင်ႉၼမ်ႉၽိုင်ႈ ဢႃယု 18 ပီ ပဵၼ်လုၵ်ႈယိင်း ၼၢင်းၵဵင် ၸၢဝ်းတႆး ၵေႃႉပဵၼ်ပေႃႈတႄႉ လူႉသဵင်ႈ ၸဵမ်မိူဝ်ႈမၼ်းၼၢင်းလႆႈ 8 လိူၼ် ယၢမ်းလဵဝ်မၼ်းၼၢင်းႁဵၼ်းယူႇၸၼ်ႉမေႃး 6 ( မိူၼ်ၸၼ်ႉ 10 မိူင်းမၢၼ်ႈ ) တေသိုပ်ႇၶိုၼ်ႈၸၼ်ႉၸွမ် တီႈၸၼ်ႉ ၸွမ်ၵဵင်းမႆႇ ၸိုင်ႈထႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ