ၸုမ်းသႅၼ်းၽူႈၼမ်း PPST/ EAO-s NCA ဢုပ်ႇဢူဝ်းၵၼ်တီႈၵဵင်းမႂ်ႇ ၶၢဝ်းတၢင်း 5 ဝၼ်းသေ ႁႃလႆႈလၢႆးၵႄႈလွင်ႈၶွင်ႉၶမ် ၵၢၼ်ငမ်းယဵၼ်လႄႈ တိုတ်ႉတႅမ်ႈလၢႆးတၢင်းပိူင်ၾႅတ်ႊတရႄႊတႃႇဢဝ်ၵႂႃႇဢုပ်ႇဢူဝ်းလူင်ပွင်ၸိုင်ႈမိူင်းႁူမ်ႈတုမ်။

ဝၼ်းတီႈ 14-18/05/2019 ပၢင်ၵုမ်ၽူႈၼမ်းၸိၵ်းၸွမ် PPST ဢၼ်ပဵၼ်ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ လုၵ်ႉၽိုၼ်ႉ ဢၼ် လူင်းလၢႆးမိုဝ်း ၵိုတ်းတိုၵ်း ပတ်ႉပိုၼ်ႉတူဝ်ႈမိူင်း NCA ၼၼ်ႉ ဢုပ်ႇဢူဝ်းၵၼ် ပွၵ်ႈၵမ်း 4 တီႈႁူင်းႁႅမ်း ၶုမ်ႉၽူးၶမ်း ၸႄႈ ဝဵင်းၵဵင်းမႆႇ ၸိုင်ႈထႆး။

ၼၢႆးႁူင်သႃ ၵႅမ်ႁူဝ်ပဝ်ႈ ပႃႇတီႇမိူင်းမွၼ်းမႂ်ႇ (NMSP) လၢတ်ႈတီႈပၢင်သပ်းၸႅင်ႈၶၢဝ်ႇၼၼ်ႉဝႃႈ “ ဢၼ်လမ်ႇလွင်ႈ ၶၵ်ႉၵၢၼ် လွင်ႈငမ်းယဵၼ်တႄႉ မၢင်တွၼ်ႈ၊ မၢင်လႂ် မၼ်းၶၢမ်ႈပူၼ်ႉ ၸွမ်းသဵၼ်ႈတၢင်းမၼ်းယဝ်ႉ တွၼ်ႈတႃႇတေလႆႈပိူင်ၾႅတ်ႊတ ရႄႊၼၼ်ႉ လႆႈၸႂ်တူၵ်းလူင်းပိူင်မၼ်းမႃးယဝ်ႉ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ၸုမ်းယိပ်းၵွင်ႈၵၢင်ႇ လုၵ်ႉၽိုၼ်ႉ လူင်းလၢႆးမိုဝ်း NCA ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ၼၼ်ႉ တႃႇတေ ၼႄၼမ်ႉ ၼႄတူဝ် ၼႂ်း NCA လႄႈ ၼင်ႇႁိုဝ် တေၶဝ်ႈပႃး ၼႂ်းၶၵ်ႉၵၢၼ်လွင်ႈငမ်းယဵၼ် ဢၼ်လႆႈထူပ်းမႃး မၢင်တွၼ်ႈ မၢင် လႂ်ၸိူဝ်းၼၼ်ႉ လႆႈပူၼ်ႉၶၢမ်ႈမႃးသေဢမ်ႇၵႃး တႃႇတေၵေႃႇတင်ႈမိူင်းႁူမ်ႈတုမ်ၾႅတ်ႊတရႄႊ တွၼ်ႈတိုတ်ႉၶႅၼ်ႇတႅမ်ႈ ၼင်ႇႁိုဝ် ပေႃးတေလႆႈတူၵ်းလူင်းၵၼ်တင်း ၽူႈဢွၼ်ႁူဝ် လူင်ပွင်ၸိုင်ႈလႄႈ တပ်ႉမတေႃႇၼၼ်ႉ လႆႈပိုၼ်ၽၢဝ်ႇဢွၵ်ႇမႃး သေ လႆႈဢုပ်ႇဢူဝ်းတူၵ်းလူင်းၵၼ်မႃး ဝႃႈၼႆ။

ပၢင်ၵုမ် ၽူႈၼမ်း ၸိၵ်းၸွမ် PPST ဢၼ်ၸတ်းႁဵတ်းပၢင်ၵုမ်မႃး တႃႇၶၢဝ်းတၢင်း 5 ဝၼ်းၼၼ်ႉ လႆႈႁူႉဝႃႈ လႆႈဢုပ်ႇဢူဝ်း တၢင်ႇၼႄၵၼ်ဝႃႈ တေလႅၵ်ႈပဵၼ်ၵႂႃႇ PPCM ဝႃႈၼႆသေ လွင်ႈၼႆႉ တီႈၼႂ်းပၢင်ၵုမ် ၶေႃႈႁၼ်ထိုင်/ တၢင်းႁၼ်ထိုင် ပႅၵ်ႇပိူင် ၵၼ်ဝႆႉ ဝႃႈၼႆ။

လိူဝ်ၼၼ်ႉ ၵၢင်ၸႂ် မၢင်ၵေႃႉသမ်ႉ ၶႂ်ႈႁႂ်ႈပဵၼ် PPST ၵႂႃႇၶိုၼ်းမိူၼ်ၵဝ်ႇၵူၺ်း။ မၢင်ၵေႃႉသမ်ႉ ၶႂ်ႈလႅၵ်ႈပဵၼ် PPCM ယွၼ်ႉ ၼၼ်လႄႈ ၼႂ်းၵႄႈၶဝ်ဢုပ်ႇဢူဝ်းၵၼ်ၼၼ်ႉ လႆႈပႅၵ်ႇပိူင်ၵၼ်ဝႆႉ ဝႃႈၼႆ။

ထႅင်ႈတွၼ်ႈၼိုင်ႈၵေႃႈ ႁူမ်ႈတုမ် ၸိူဝ်ႉၸၢတ်ႈယၢင်းၽိူၵ်ႇ KNU ၵေႃႈ လႆႈတၢင်ႇလိၵ်ႈတႃႇတေထွၼ်ႇတူဝ်ဢွၵ်ႇ။ ၵူၺ်းၵႃႈ ၵဵဝ်ႇၵပ်းလွင်ႈၼႆႉ ပႆႇလႆႈဢုပ်ႇဢူဝ်းၵၼ်သေ လႆႈၵိုတ်းယင်ႉပၢင်ၵုမ်ဝႆႉ ပေႃးထိုင်မႃး ပၢင်ၵုမ်ထႅင်ႈၵမ်းၼိုင်ႈၼႆ တေသိုပ်ႇ ဢုပ်းၵၼ်ၵႂႃႇ ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ 2 RCSS/SSA လၢတ်ႈတီႈပၢင်သပ်းၸႅင်ႈၶၢဝ်ႇၼၼ်ႉဝႃႈ “ လွင်ႈဢၼ်ဝႃႈ ထွၼ် တူဝ်ဢွၵ်ႇၼႆၼၼ်ႉ တီႈပၢင်ၵုမ်တႄႉ ဢမ်ႇမီး။ တေႃႈလဵဝ်ၼႆႉ PPST ဢုပ်ႇဢူဝ်းၵၼ်ပႆႇယဝ်ႈတူဝ်ႈ။ ပၢင်ၵုမ် PPST တႄႉ တေလႆႈသိုပ်ႇဢူဝ်းၵၼ်ၵႂႃႇထႅင်ႈယူႇ။ လွင်ႈ PPCM ဢၼ်ဝႃႈၼၼ်ႉ တေတမ်းၸိူင်ႉႁိုဝ် တေႁဵတ်းၸိူင်ႉႁိုဝ် ဢၼ်ဝႃႈၼၼ်ႉ တေသိုပ်ႇဢူဝ်းၵၼ်ၵႂႃႇထႅင်ႈ။ တေႃႈလဵဝ်တႄႉ တိုၵ်ႉပဵၼ်တွၼ်ႈတီႈၼိုင်ႈၵူၺ်း။ ပေႃးထိုင်မႃး ပၢင်ၵုမ် ပွၵ်ႈၵမ်း 2 ၸိုင် ၸင်ႇတေတႅပ်းတတ်းၵၼ်” ဝႃႈၼႆ။

ပၢင်ၵုမ် ဢၼ်ပႆႇယဝ်ႉတူဝ်ႈ ၸုမ်းယိပ်းၵွင်ႈၵၢင်ႇ လုၵ်ႉၽိုၼ်ႉ ပွၵ်ႈၵမ်း 4 ၼႆႉ တေၶတ်းၸႂ်ႁႂ်ႈလႆႈဢုပ်ႇဢူဝ်းၵၼ်ထႅင်ႈ ၵမ်း တီႈ (2) ၼႂ်းၶၢဝ်းတၢင်း လိူၼ် 1 ၼႆႉ ဝႃႈၼႆ။

လိူဝ်ၼၼ်ႉ တီႈၼႂ်းပၢင်ၵုမ် PPST ပွၵ်ႈၵမ်းၼႆႉ ယူႇတီႈၸုမ်းၶၢင် KIO တင်း ၸုမ်းယၢင်းလႅင် KNPP ၶဝ်ႈႁူမ်ႈလဵပ်ႈႁဵၼ်း ၸွမ်း ဝႃႈၼႆ။