ပီၼႆႉ မႄႈၼမ်ႉသၢႆ ႁႅင်းႁႅတ်းလိူဝ်ၵူႈပီ

မႄႈၼမ်ႉသၢႆ လႅၼ်ၶႅၼ်ႈ မိူင်းတႆး တင်း မိူင်းထႆး ႁႅင်ႈယွမ်းလူင်းလိူဝ်ၵူႈပီ ယွၼ်ႉတၢင်းၾင်ႇမိူင်းထႆး တပ်ႉၼမ်ႉသၢႆ ၵႅတ်ႇၶဝ်ႈ တူင်ႈႁႆႈတူင်းၼႃး ဝႃႈၼႆ။

တႄႇဢဝ် ႁူဝ်လိူၼ်မေႊၼႆႉမႃး မႆႈႁႅင်းသေ ၼမ်ႉသၢႆ ဢၼ်လႆလူင်းၼႂ်းၵႄႈ လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ၼၼ်ႉ ႁႅင်ႈယွမ်းလူင်း ထိုင်တီႈဢမ်ႇမီးၼမ်ႉလႆ ၵူၼ်းယူႇၼႂ်းပိုၼ်ႉတီႈ ႁတ်းၶၢမ်ႈၵႂႃႇမႃး သေႃႉႁႃႁဵတ်းၵၢၼ်ဝႄႈလၢၼ်ႇ ဝႄႈ ၶူဝ်ငၢႆႈ ၶႂ်ႈၵႂႃႇမႃးလႆႈၵူႈတီႈ ဝႃႈၼႆ။

ၸၢႆးပီး ပေႃႈၵႃႉယူႇ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူႈပီဢမ်ႇႁႅင်ႈၸိူင်ႉၼႆၶႃႈ။ ပီၼႆ ႁႅင်ႈလူင်းဝႆႉ ထိုင်တီႈၼမ်ႉ ပေႃး ဢမ်ႇလႆၶႃႈယဝ်ႉ။ ၼႂ်းဝူင်ႈဝၢင်ႈၼႆႉ မႆႈႁႅင်းၼႃႇၵေႃႈတေပႃး။ တၢင်းႁူဝ်ၼမ်ႉသၢႆသမ်ႉ ငိၼ်းဝႃႈ ထႆးၶဝ် ၵႅတ်ႇဢဝ် ၼမ်ႉၶဝ်ႈၼႃးတၢင်းပုၼ်ႉၵေႃႈတေပႃး” ဝႃႈၼႆ။

သိုပ်ႇလၢတ်ႈဝႃႈ “ ၵၢၼ်ၵူၼ်းလၵ်ႉၶဝ်ႈဢွၵ်ႇၵေႃႈငၢႆႈၶႃႈ။ ပႆဢဝ်လၢႆဝႃးၵူၺ်း ပေႃးၽႅဝ်တၢင်းၾင်ႇထႆးၶႃႈယဝ်ႉ။ မိူဝ်ႈပူၼ်ႉ မႃး ပႆႇႁိုင်ၼၼ်ႉ လႆႈႁၼ်ၶၢဝ်ႇဢွၵ်ႇဝႆႉယူႇ တၢင်းၾင်ႇထႆးၺႃးၵူၼ်းလၵ်ႉၶဝ်ႈတၢင်းၼမ်ႉသၢႆ ဢမ်ႇပဵၼ်တၢင်းၵၢၼ်၊ ၺႃး ယိုဝ်း တၢႆ 4 ၵေႃႉ ၵွၼ်ႇလူးၼၼ်ႉ” ဝႃႈၼႆ။

ၵဵဝ်ႇၵပ်းလွင်ႈၼမ်ႉသၢႆႁႅင်ႈၼႆႉသေ ၵူၼ်းမိူင်းတႃႈၶီႈလဵၵ်း ထတ်းသၢင်ဝႃႈ ယွၼ်ႉၵူၼ်းဝၢၼ်ႈ ၵူၼ်းမိူင်းဢွၼ်ၵၼ်တႅပ်းမႆႉ ယႃႉပႃႇထိူၼ်ႇပႃႇၶိူဝ်း တၢင်းပွတ်းႁူဝ်မႄႈၼမ်ႉသၢႆလႄႈ ႁဵတ်းႁႂ်ႈတုမ်ႉတိူဝ်ႉသၽႃႇဝ သိင်ႇဝႅတ်ႉလွမ်ႉမႃး ဝႃႈၼႆ။

တႃႈၶီႈလဵၵ်း – မႄႈသၢႆ လႅၼ်လိၼ်(ထႆး – မၢၼ်ႈ) တႆး – ထႆးၼႆႉ ၼမ်ႉသၢႆၶႅၼ်ႈဝႆႉ။ ၾၢႆႇထႆး – မၢၼ်ႈ ၵၢႆႇၶူဝ်ၶၢမ်ႈၸူးတႃႇၵႃႉၶၢႆ၊ တႃႇၵူၼ်းၵႂႃႇမႃး ဝူင်ႈၵၢင်သွင်မိူင်း။ မီးသွင်တီႈ ၶူဝ်မၢႆ 1 တင်း မၢႆ 2 ၵူၼ်းၶၢမ်ႈပဵၼ်တၢင်းၵၢၼ်ၵေႃႈၼမ်၊ ဢၼ်လၵ်ႉၶၢမ်ႈ ၵေႃႈမီးၵူႈဝၼ်း။ ပဵၼ်မိူင်းပၢႆးမၢၵ်ႈမီးလႄႈ ၵူၼ်းမိူင်းမၢၼ်ႈ တူင်ႈပဵင်းၵေႃႈ မႃးႁႃႁဵတ်းၵၢၼ်လဵင်ႉတွင်ႉၼမ်။