ၼႃႈလိၼ်ၶိုၵ်ႉတွၼ်းမၢႆ (4) ႁိုဝ် တပ်ႉသိုၵ်းမိူင်းလႃး တေၸတ်းႁဵတ်းပၢင်ပွႆးယွင်ႈယေႃးဝၼ်းဢဝ်ငမ်းယဵၼ် ၶွပ်ႈတဵမ် 30 ပီ။
ပၢင်ပွႆးဝၼ်း တပ်ႉသိုၵ်းမိူင်းလႃး NDAA ဢဝ်ငမ်းယဵၼ် ၶွပ်ႈတဵမ် 30 ပီ တေၸတ်းႁဵတ်းတီႈ ဝဵင်းမိူင်းလႃး ၼႃႈလိၼ် ၶိုၵ်ႉတွၼ်းမၢႆ 4 ၸိုင်ႈတႆးပွတ်းဢွၵ်ႇၶူင်း။ တေမွၵ်ႇထိုင် ၾၢႆႇလူင်ပွင်ၸိုင်ႈ၊ တပ်ႉမ တေႃႇ၊ သၽႃးလႄႈ လူင်ပွင်ၸိုင်ႈ ၸႄႈမိူင်းတႆး ၸဵမ်ၸိူဝ်းၼႆႉ ဝႃႈၼႆ။
သိုဝ်ႇၶၢဝ်ႇ Mongla News ဢွၵ်ႇဝႆႉဝႃႈ ၸဝ်ႈၸၢႆးလိုၼ်း ႁူဝ်ပဝ်ႈလူင် ၼႃႈလိၼ်ၶိုၵ်ႉတွၼ်းမၢႆ 4 တပ်ႉသိုၵ်းမိူင်းလႃး လၢတ်ႈ ဝႃႈ “ ၼႂ်းၶၢဝ်းတၢင်း 30 ပီမႃးၼႆႉ ဢၼ်ႁဝ်းၶႃႈလႆႈမႃး ၽွၼ်းပၢင်ႈ လွင်ႈမုၼ်းလႅင်းၶိုၼ်ႈယႂ်ႇၼႆႉ မၼ်းဢမ်ႇၸႂ်ႈလႆႈမႃး ငၢႆႈ ငၢႆႈ။ ယွၼ်ႉၼၼ် ပေႃးထိုင်မႃး ဝၼ်းၵေႃႇတင်ႈငမ်းယဵၼ် ၶွပ်ႈတဵမ် 30 ပီၸိုင် ပဵၼ်သုၼ်ႇလီတွၼ်ႈတႃႇႁဝ်းၶႃႈ တေလႆႈပို တ်ႇ ၼႄလွင်ႈငဝ်းလၢႆးမုၼ်းလႅင်းၶိုၼ်ႈယႂ်ႇ ၼႂ်းပိုၼ်ႉတီႈႁဝ်းၶႃႈၵႂႃႇ” ဝႃႈၼႆ။
တေႃႈလဵဝ် ယူႇတီႈၽူႈမီးပုၼ်ႈၽွၼ်း ၼႂ်းၼႃႈလိၼ်ၶိုၵ်ႉတွၼ်း မၢႆ 4 ၸႄႈဝဵင်းမိူင်းလႃး ဢွၼ်ၵၼ်ႁၢင်ႈႁႅၼ်း တႃႇႁဵတ်းပွႆး ဝၼ်းၵေႃႇတင်ႈငမ်းယဵၼ် ၶွပ်ႈတဵမ် 30 ပီ။ လိူဝ်ၼၼ်ႉ တီႈၼႂ်းပၢင်ပွႆး ၶွပ်ႈတဵမ် 30 ပီၼႆႉ တေၼႄၾၢင်ႁၢင်ႈသိုၵ်း၊ တၢင်း ၵႃႈ၊ ႁွင်ႉၵႂၢမ်းလႄႈ လဵၼ်ႈဢဵၼ်ႁႅင်း ၸိူဝ်းၼႆႉ ဝႃႈၼႆ။
တပ်ႉသိုၵ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းတင်းတပ်ႉသိုၵ်းလူင်ပွင်ၸိုင်ႈ မၢၼ်ႈမႃး ၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ်။
ၸုမ်းမိူင်းလႃးၼႆႉ တႄႇၵိုတ်းသိုၵ်းဢဝ်ငမ်းယဵၼ် ၸွမ်းတပ်ႉသိုၵ်းလူင်ပွင်ၸိုင်ႈမၢၼ်ႈ မိူဝ်ႈ 30/06/1989 ။ တပ်ႉၶႄႇၵဝ်ႈ ၵၢင်ႉ (ၵူဝ်းၵၢင်ႉ) ၵိုတ်းဢွၼ်တၢင်းလႄႈ လႆႈၼႃႈလိၼ်ၶိုၵ်ႉတွၼ်းမၢႆ (1)၊ ဝႃႉတၢမ်းမႃးလႄႈ လႆႈမၢႆ (2)၊ တႆး (SSPP) လႆႈမၢႆ (3)၊ မိူင်းလႃး လႆႈပဵၼ်ၵႂႃႇမၢႆ (4) ။
မိူဝ်ႈပီ 1989 ၼၼ်ႉ တပ်ႉၸုမ်းၼႂ်းပႃႇတီႇၶွမ်ႊမိဝ်ႊၼိတ်ႊမၢၼ်ႈ CPB ၽိုၼ်ႉဝၢႆႇၽၢတ်ႇဢွၵ်ႇ ၵေႃႇတင်ႈတပ်ႉၽႂ်တပ်ႉ မၼ်း။ ပဵၼ်မႃးၸုမ်းၶႄႇၵဝ်ႈၵၢင်ႉ MNDAA၊ ဝႃႉ UWSA၊ ၶၢင် NDAK ၸုမ်းမိူင်းလႃး NDAA – ESS။
