ၵႃးႁပ်ႉၸၢင်ႈတၢင်ႇၵူၼ်း လမ်းၼိုင်ႈ ပိၼ်ႈတူၵ်းတၢင်း ၼိူဝ်သဵၼ်ႈတၢင်း လူင်မိူင်းႁူမ်ႈတုမ် တႃႈၶီႈလဵၵ်း – ၵဵင်းတုင်လႄႈ တူၼ်ႈတီး ၵူၼ်းမႃးၸွမ်းၵႃး တင်းမူတ်း 8 ၵေႃႉ ပႃးၵူၼ်းႁေႃႈ လူႉတၢႆၵႂႃႇ 5 ၵေႃႉ မၢတ်ႇၸဵပ်း 3 ၵေႃႉ။
ဝၼ်းတီႈ 12/05/2019 ယၢမ်းၵၢင်ၼႂ် 6 မူင်း ၵႃးႁပ်ႉၸၢင်ႈတၢင်ႇၵူၼ်း မၢၼ်ႇလူင်ႇဢွၼ်ႇ(ရူတ်ႉတူႈ) ၵူၼ်းႁေႃႈၵႃး ၸိုဝ်ႈ ႁွင်ႉ သီႇႁႃႉ (ႁွင်ႉ) သီႇႁႃႉသူၺ်ႇ ဢဝ်ရူတ်ႉ ပိၼ်ႈတူၵ်းတၢင်းၵႂႃႇ တီႈၾၢႆႇၸဵင်ႇၸၢၼ်းဝၼ်းဢွၵ်ႇ ယၢၼ်ၵႆ မိူင်းပဵင်း မွၵ်ႈ 5 လၵ်း ၼိူဝ်သဵၼ်ႈတၢင်း တႃႈၶီႈလဵၵ်း- တူၼ်ႈတီး တီႈပွၵ်ႉပဵင်းသၢၼ်း ၸႄႈဝဵင်းမိူင်းပဵင်း ၸႄႈတွၼ်ႈ မိူင်း သၢတ်ႇ ၸိုင်ႈတႆး ပွတ်းဢွၵ်ႇၶူင်း ဝႃႈၼႆ။
ယူႇတီႈႁွင်ႈၵၢၼ်ၾၢႆႇ ၵၢပ်းသိုပ်ႇတိတ်းတေႃႇ (ပြန်/ဆက်) ဢွၵ်ႇဝႆႉဝႃႈ “ ၵႃးမၢၼ်ႇလူင်ႇၼႆႉ ႁပ်ႉၵူၼ်း/ တၢင်ႇၵူၼ်းမႃး လုၵ်ႉ တႃႈၶီႈလဵၵ်း တေၵႂႃႇတၢင်း တူၼ်ႈတီး ၼႂ်းၵႃးၼၼ်ႉ မီးၵူၼ်းၶီႇမႃးၸွမ်း 7 ၵေႃႉ ပႃးၵူၼ်းႁေႃႈ 1 ၵေႃႉ။ ၼႂ်းၼၼ်ႉ လႆႈလူႉ တၢႆၵႂႃႇ 5 ၵေႃႉ၊ မၢတ်ႇၸဵပ်း 3 ၵေႃႉ။ ၵူၼ်းမၢတ်ႇၸဵပ်းၼၼ်ႉ လႆႈသူင်ႇယူတ်းယႃတူဝ်တီႈဝႆႉတီႈႁူင်းယႃ ဝဵင်းမိူင်းပဵင်း” ဝႃႈၼႆ။
ရူတ်ႉတူႈၼႆႉ ပိၼ်ႈတူၵ်းတၢင်းသေ တူၵ်းလူင်းၵႂႃႇၼႂ်းမႄႈၼမ်ႉ။ လိုၵ်ႉ မွၵ်ႈ 50 ထတ်း ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႇပလိၵ်ႈမိူင်းပဵင်း လႆႈပိုတ်ႇလိူင်ႈဝႆႉတီႈႁူင်းပလိၵ်ႈၸႄႈဝဵင်းမိူင်းပဵင်းယဝ်ႉ ဝႃႈၼႆ။
