ၸွမ်းပွၵ်ႉယွမ်ႇၼႂ်းၸႄႈဝဵင်းတူၼ်ႈတီး ႁွင်ႈၵၢၼ်ၾၢႆႇၾႆးၾႃႉ တတ်းၾႆး ဝၼ်း 3 ပွၵ်ႈ လႄႈ ၵူၼ်းမိူင်းယၢပ်ႇၽိုတ်ႇ။

တႄႇဢဝ်လိူၼ်မေႊ 2019 ၼႆႉမႃး ၾၢႆႇၾႆးၾႃႉ ၸတ်းၶၢဝ်းယၢမ်းပဵၼ် 3 တွၼ်ႈသေ ပၼ်ၾႆးၾႃႉ တႃႇၼႂ်း 22 ပွၵ်ႉ ၼႂ်းၸႄႈဝဵင်းတူၼ်ႈတီး။

ၼၢင်းၸၢမ်ၽူၺ်း ၽူႈႁၢပ်ႇၵၢၼ်ၸုမ်းၶၢဝ်ႇၽူႈတွႆႇႁွၵ်ႈ လၢတ်ႈဝႃႈ “ ၾႆးတီႈလုမ်းႁဝ်းၶႃႈၼႆႉ မွတ်ႇၵူႈဝၼ်းယဝ်ႉၶႃႈ။ ၼိုင်ႈ ဝၼ်းလႂ် မွတ်ႇ 3 ပွၵ်ႈ။ ၵူၺ်းၵႃႈ ဝူင်ႈၼိုင်ႈလႄႈဝူင်ႈၼိုင်ႈ တေမွတ်ႇဢမ်ႇမိူၼ်ၵၼ် တေပၼ်ႇပုတ်ႈၵၼ်သေမွတ်ႇ မိူၼ် ၸိူင်ႉၼင်ႇ ပွၵ်ႉၼႆႉ မွတ်ႇ 10 မူင်း ၵၢင်ၼႂ် ထႅင်ႈပွၵ်ႉၼိုင်ႈသမ်ႉ တေမွတ်ႇ 12 မူင်းၵၢင်ဝၼ်းၸိူင်ႉၼၼ်။ တီႈတူၼ်ႈတီး ၼႆႉတႄႉ ၼိုင်ႈဝၼ်း တိုၼ်းဝႃႈ မွတ်ႇ 3 ပွၵ်ႈၵူႈတီႈယဝ်ႉ။ ၵူၺ်းၼႃႇ ၶၢဝ်းယၢမ်းတႄႉ တေဢမ်ႇမိူၼ်ၵၼ် ပွၵ်ႉလႄႈပွၵ်ႉ ၶႃႈ။ မိူၼ်မိူဝ်ႈၼႆႉ ၾႆးၾႃႉမႃး 8 မူင်းၶိုင်ႈၵၢင်ၼႂ် 10 မူင်းၵၢင်ၼႂ်ၵေႃႈ ၶိုၼ်းမွတ်ႇ။ ယဝ်ႉၵေႃႈ ဝၢႆးဝၼ်း 1 မူင်းမႃး ထိုင် 7 မူင်း ၵၢင်ၶမ်ႈ။ ၵၢင်ၶမ်ႈ 9 မူင်းမႃးၶိုၼ်း ႁဵတ်းၼၼ်။ ၶဝ်ဢမ်ႇမီးပိူင်တၢႆလႄႈ ႁဵတ်းၵၢၼ်ၵေႃႈယၢပ်ႇၶႃႈ” ဝႃႈၼႆ။

ယွၼ်ႉပိူဝ်ႈၾႆးၾႃႉမွတ်ႇ ဢမ်ႇမႅၼ်ႈၶၢဝ်းယၢမ်းလႄႈ ၵၢၼ်ၵေႃႈလူႉ။ တွၼ်ႈတႃႇၵူၼ်းႁဵတ်းၵၢၼ် ယူႇၼႃႈၶွမ်ႊၽိဝ်ႊတိူဝ်ႊ ယူႇတႃႇသေႇၼႆ ပဵၼ်ဢၼ်ယၢပ်ႇၽိုတ်ႇတႄႉတႄႉ။ ပေႃးပဵၼ်ၵူၼ်းႁဵတ်းၵၢၼ်ပၢႆးမၢၵ်ႈမီး၊ ႁူင်းၸၢၵ်ႈယႂ်ႇၸိူဝ်းၼၼ်ႉ ယိင်ႈၶႅၼ်းတေယၢပ်ႇ ဝႃႈၼႆ။

ၵူၼ်းမိူင်း ပွၵ်ႉသျၢၼ်းမျႃႉတႃႇသီႇ ဝဵင်းတူၼ်ႈတီး လၢတ်ႈဝႃႈ “ တေႃႈလဵဝ်ၼႆႉ ၾႆးၾႃႉ ဢမ်ႇမႃးမၢၼ်ႇယဝ်ႉ တေႇဢဝ်လိူ ၼ်ၼႆႉ မႃး။ ၼိုင်ႈဝၼ်းလႂ် မွတ်ႇ 2-3 ပွၵ်ႈ။ မၢင်ပွၵ်ႈ ၾႆးမႃး 9 မူင်း 10 မူင်းၵၢင်ၶိုၼ်း ၽွင်းၶၢဝ်းၼၼ်ႉ ႁဝ်းတေၸႂ်ႉဢီႈသင် ယဝ်ႉ။ လူဝ်ႇၼွၼ်းၵူၺ်းယဝ်ႉ ၶၢဝ်းၼၼ်ႉ။ ၵမ်းၼႆႉ ပေႃးၼႃႈမိူင်းလႅင်းမႃး ၽွင်းလူဝ်ႇၸႂ်ႉၾႆးႁုင်တူမ်ႈသမ်ႉမွတ်ႇ။ ပေႃးၵၢင် ဝၼ်း သမ်ႉၶိုၼ်းမႃး။ ပေႃးထိုင်ႁူဝ်ၶမ်ႈ လူဝ်ႇႁုင်တူမ်ႈသမ်ႉမွတ်ႇထႅင်ႈ ၵၢင်ၶိုၼ်းသမ်ႉမႃး ပဵၼ်ဢၼ်ယၢပ်ႇၽိုတ်ႇ တွၼ်ႈတႃႇႁဝ်းၶႃႈတႄႉတႄႉ” ဝႃႈၼႆ။

ယူႇတီႈၾၢႆႇၾႆးၾႃႉ ၸႄႈဝဵင်းတူၼ်ႈတီး လႆႈပိုၼ်ၽၢဝ်ႇဝႆႉဝႃႈ တႄႇဢဝ်ဝၼ်းတီႈ 3 လိူၼ်မေႊၼႆႉမႃး ၾႆးၾႃႉ ဢၼ် ပၼ်ယူႇ ၼႂ်းၸႄႈဝဵင်းတူၼ်ႈတီးၼၼ်ႉ တေပၼ်ႇပုတ်ႈၵၼ်သေမွတ်ႇ ယွၼ်ႉဝႃႈ တေႃႈလဵဝ်ၼႆႉ ပဵၼ်ၶၢဝ်းမႆႈ ၼမ်ႉႁႅင်ႈ ႁႅင်းၾႆးၾႃႉ လူတ်းယွမ်းသေ ပၼ်ဢမ်ႇၵုမ်ႇလႆႈလႄႈ တေပၼ်ႇပုတ်ႈ ၸတ်းၶၢဝ်းယၢမ်းသေ ပၼ်ၵႂႃႇ ဝႃႈၼႆ။