ၾႆးမႆႈႁၢၼ်ႉၶၢႆၼမ်ႉမၼ်း တီႈပွၵ်ႉဝဵင်းသႃႇ ၸႄႈဝဵင်းၼမ်ႉၶမ်း ၾႆးႁုပ်ႇပႃး ၵႃးလမ်းၼိုင်ႈ လႄႈ ရူတ်ႉၶိူင်ႈ 3 လမ်း။ ဢိၵ်ႇ ႁိူၼ်းတင်းလင် ၼိုင်ႈမူတ်းလူႉသုမ်း မွၵ်ႈၶၼ်ငိုၼ်း 70 သႅၼ်ပျႃး။
မိူဝ်ႈဝၼ်းတီႈ 10/05/2019 ယၢမ်းၵၢင်ဝၼ်း မွၵ်ႈ 12 မူင်းၼၼ်ႉ ၾႆးလုၵ်ႉႁုပ်ႇမႆႈ တီႈႁၢၼ်ႉၶၢႆၼမ်ႉမၼ်း မၢႆတိူဝ်ႉ (ၸၢဝ်း ၶႄႇ) တီႈပွၵ်ႉဝဵင်းသႃႇ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။ ထိုင်မႃး ယၢမ်းဝၢႆးဝၼ်း မွၵ်ႈ 3 မူင်း ၾႆးၸင်ႇမွတ်ႇ ဝႃႈၼႆ။
ၸၢႆးထုၼ်းလူႇ ၽူႈၵွၼ်းပွၵ်ႉဝဵင်းသႃႇ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ပဵၼ်ၸဝ်ႈၶွင်ႁၢၼ်ႉၶၢႆမၼ်းလၢတ်ႈတႄႉ ၶဝ်လႆႈ လူႉသုမ်း ၵႂႃႇ 60 သႅၼ်ပၢႆ။ ၶဝ်လၢတ်ႈဝႃႈ ၼမ်ႉမၼ်းဢၼ်ၾႆႈမႆႈၵႂႃႇၼၼ်ႉ ပဵၼ်ၼမ်ႉမၼ်းတိုၵ်ႉ ဢဝ်မႃးၸုပ်ႈတၢင်းလင် ၼႆႉၵူၺ်း၊ ၼမ်ႉမၼ်းၵဝ်ႇတႄႉ ၶၢႆမူတ်းၵႂႃႇယဝ်ႉၼႆဝႃႇ။ ၼမ်ႉမၼ်းဢၼ်ၼႆႉ ဢဝ်ဢွၵ်ႇထၢင်ယင်းပႆႇ မူတ်းသေ လႆႈမႆႈၵႂႃႇ။ ၶူဝ်းၶွင် ဢၼ်မႆႈပႃးၵႂႃႇၸွမ်းၾႆးၼၼ်ႉ ၵႃး1 လမ်း၊ ရူတ်ႉၶိူင်ႈ 3 လမ်း၊ ၼမ်ႉမၼ်း၊ ႁၢၼ်ႉၶၢႆၼမ်ႉမၼ်း လႄႈ ႁိူၼ်းလင် ၼိုင်ႈယဝ်ႉၵေႃႈ ႁွင်ႈၵဵပ်းၶူဝ်းဢၼ်ၼိုင်ႈ။ ၵူၺ်းၵႃႈ ႁိူၼ်းလႄႈ တီႈႁွင်ႈၵဵပ်းၶွင်ၼၼ်ႉ မၼ်းပဵၼ်မၢၵ်ႇဢုတ်ႇ ၵေႃႇဝႆႉလႄႈ ၾႆးဢမ်ႇမႆႈမူတ်း မႆႈတီႈဢၼ်မီးမႆႉမၼ်းၵူၺ်း။ ၶဝ်လၢတ်ႈဝႃႈတႄႉ မိူဝ်ႈၽွင်း လုတ်ႇၼမ်ႉမၼ်းသႂ်ႇ ထၢင်ၼၼ်ႉ ၾႆးၼႆႉ လုၵ်ႉႁုပ်ႇမႆႈမႃးသေ ၸင်ႇမႆႈၶိုၼ်ႈမႃး” ဝႃႈၼႆ။
ၵဵဝ်ႇၵပ်းလွင်ႈၾႆးမႆႈ တီႈႁၢၼ်ႉၶၢႆၼမ်ႉမၼ်းၼၼ်ႉ ၵူၼ်းဝၢၼ်ႈ ၸိူဝ်းယူႇႁိမ်းၼၼ်ႉ ဢိၵ်ႇပႃးပလိၵ်ႈၾၢႆႇၶႄၾႆး ၼႂ်းၸႄႈ ဝဵင်းၼမ်ႉၶမ်း လႆႈဢွၼ်ၵၼ်မႃးၸွႆႈၶႄၾႆးႁူတ်းမွတ်ႇၵႂႃႇ မိူဝ်ႈယၢမ်းဝၢႆးဝၼ်းႁိမ်း 3 မူင်း။ လွင်ႈၵူၼ်းမၢတ်ႇၸဵပ်းလူႉ တၢႆ တႄႉ ဢမ်ႇမီး ဝႃႈၼႆ။
ႁၢၼ်ႉၶၢႆၼမ်ႉမၼ်း တီႈပွၵ်ႉဝဵင်းသႃႇၼႆႉ ၸဝ်ႈၶွင်မၼ်း ၸိုဝ်ႈႁွင်ႉ ၸၢႆးမၢႆတိူဝ်ႉ(ၸၢဝ်းၶႄႇ) လႄႈ တေႃႇမထူႉ(ၸၢဝ်းၶၢင်)။ ပွၵ်ႉဝဵင်းသႃႇၼႆႉ မီးၾၢႆႇၸၢၼ်းဝဵင်းၼမ်ႉၶမ်း ဝႃႈၼႆ။
မိူဝ်ႈဝၼ်းတီႈ 07/05/2019 ယၢမ်းၵၢင်ၼႂ် 4 မူင်း ၾႆးမႆႈႁၢၼ်ႉၶၢႆၾူၼ်း(ႁိူၼ်း)၊ ႁၢၼ်ႉၶၢႆၶူဝ်း တင်းမူတ်း 3 လင် တီႈႁိမ်း ၵၢတ်ႇ ပွၵ်ႉ 5 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ မႆႈပႃးၵူၼ်း 2 ၵေႃႉ ၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ