ၵူၼ်းဝၢၼ်ႈပွၵ်ႉၵွင်းလၢင်း ၼမ်ႉလၼ်ႈၵေႃႉၼိုင်ႈ ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆ။
ဝၼ်းတီႈ 10/05/2019 ယၢမ်းၵၢင်ၶမ်ႈ 8 မူင်းၶိုင်ႈၼၼ်ႉ ၸၢႆးသူဝ်းလၢႆႇ ဢႃယု 45 ပီ ပဵၼ်ၵူၼ်းပွၵ်ႉၵွင်းလၢင်း ဝဵင်းၼမ်ႉ လၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၺႃးၵူၼ်းႁၢႆႉၶဝ်ႈယိုဝ်းတီႈႁိူၼ်းမၼ်းၸၢႆး၊ မၼ်းၸၢႆး တိူဝ်ႉမၢတ်ႇၸဵပ်း ႁၢဝ်ႈႁႅင်းသေလႆႈလူႉတၢႆၽွင်းၵႂႃႇႁူင်းယႃ။
ၵူဝ်ႇသေႃႇၺီႇၺီႇ ၸုမ်းၸွႆႈထႅမ် ပရႁိတ Dear Ranger ၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈ ဢၼ်ၺႃး ယိုဝ်းၼၼ်ႉ ၸုမ်းႁဝ်းၶႃႈၸွႆႈသူင်ႇ ႁူင်းယႃလႃႈသဵဝ်ႈ။ ၵူၺ်းၵႃႈ ထိုင်ပွတ်းတၢင်းၵူၺ်း မၼ်းၸၢႆးလႆႈလူႉသဵင်ႈၸွမ်းတၢင်း ပႅတ်ႈ။ ၵဵဝ်ႇၵပ်းလွင်ႈၵၢၼ်ယိုဝ်းၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ဢမ်ႇလႆႈႁူႉ” ဝႃႈၼႆ။
ၵူၼ်းမိူင်းၼမ်ႉလၼ်ႈ ၽူႈၸၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဢၼ်မႃးယိုဝ်း ၵူၼ်းဝၢၼ်ႈၵွင်းလၢင်းတၢႆၼၼ်ႉ ထၢင်ႇတႄႉ လႅပ်ႈပဵၼ်ၶဝ်ၼင်ႇၵၼ်ၵူၺ်း။ မိူဝ်ႈပႆႇပဵၼ်ယိုဝ်းၵၼ်ၼၼ်ႉ လႆႈငိၼ်းၶဝ်ၽိတ်းမေႃးၵၼ်ၼႂ်းႁိူၼ်း။ ၶဝ်တေ ဢုပ်ႇဢူဝ်း ၵၼ် ဢမ်ႇလႅပ်ႈပဵၼ်ၵၢၼ်လႄႈ ၸင်ႇလႆႈဢဝ်ၵွင်ႈယိုဝ်းၵၼ်တၢႆ ႁိုဝ်ဢမ်ႇႁူႉ ၶဝ်ယိုဝ်းၵၼ် ယဝ်ႉသေ ဢွၵ်ႇၵႂႃႇ တၢင်းလင် ႁိူၼ်း” ဝႃႈၼႆ။
ၼႂ်းပိုၼ်ႉတီႈၼမ်ႉလၼ်ႈ ၸႄႈဝဵင်းသီႇပေႃႉၼႆႉ မီးၸုမ်းသိုၵ်းလူင်ပွင်ၸိုင်ႈမၢၼ်ႈ၊ ၸုမ်းယိပ်းၵွင်ႈၵၢင်ႇလႄႈ ၸုမ်းပျီႇတူႉ ၸိတ်ႉ ၸဵမ်ၸိူဝ်းၼႆႉ တူင်ႉၼိုင်ၵႂႃႇမႃးတႃႇသေႇ ဝႃႈၼႆ။
ပူၼ်ႉမႃး မိူဝ်ႈပီ 2018 လိူၼ်ဢေႃႊၵတ်ႊသ်ၼၼ်ႉၵေႃႈ မီးၵူၼ်းႁၢႆႉ 2 ၵေႃႉ ဢမ်ႇႁူႉၸၵ်းၾၢႆႇ ၶဝ်ႈယိုဝ်းသင်ၶတႆး တီႈၼမ်ႉ လၼ်ႈမႃးယဝ်ႉပွၵ်ႈၼိုင်ႈ ဝႃႈၼႆ။
ၼႂ်းၸႄႈဝဵင်းသီႇပေႃႉၼႆႉ ၵႆႉမီးလွင်ႈပိုတ်းယိုဝ်း ၶႃႈႁႅမ်ၵူၼ်းမိူင်းတၢႆမႃးသေႇသေႇ။ ၵဵဝ်ႇၵပ်းလွင်ႈၼႆႉ တေႃႇထိုင်ယၢမ်းလဵဝ် ပဵၼ်ၸုမ်းလႂ် ၊မူႇလႂ်၊ ၵေႃႉလႂ် ၼမ်ႉမိုဝ်းၽႂ်ႁဵတ်းဢၼ်ဝႃႈၼၼ်ႉ ၸဝ်ႈၼႃႈတီႈပလိၵ်ႈၶဝ် ဢမ်ႇလမ်းတီႉၺွပ်းလႆႈမႃး သေ ပွၵ်ႈ ဝႃႈၼႆ။
