မိူဝ်ႈၼႆႉ ဝၼ်းတီႈ 10/05/2019 ယၢမ်းၵၢင်ဝၼ်းၼႆႉ ၾႆးမႆႈပမ်ႉၼမ်ႉမၼ်း ၶွင်မၢႆတိူဝ်ႉ (ၸၢဝ်းၶႄႇ) တီႈပွၵ်ႉဝဵင်းသႃႇ ၾၢႆႇၸၢၼ်းၼမ်ႉၶမ်း ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

ၸၢႆးၸၢမ်ႇမိၼ်ႉ ၵူၼ်းပွၵ်ႉဝဵင်းသႃႇ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၶႃႈတိုၵ်ႉမီးတီႈၾႆးမႆႈၼႆႉယူႇ တိုၵ်ႉၸွႆႈၵၼ် ႁူတ်းၾႆးယူႇၶႃႈ။ တိုၵ်ႉမႆႈယူႇၶႃႈတေႃႈလဵဝ်။ မႆႈတႄႉမႆႈဝႃႈၼၼ်ႉၶႃႈယဝ်ႉ။ လွင်ႈၵူၼ်းတၢႆလႄႈ မၢတ်ႇၸဵပ်းတႄႉဢမ်ႇမီး ၶႃႈ။ ၵဵဝ်ႇၵပ်းလွင်ႈၾႆးမႆႈၼႆႉ ယူႇတီႈၸဝ်ႈၶွင်မၼ်းဝႃႈတႄႉ ၶဝ်လုတ်ႇၼမ်ႉမၼ်း ဢွၵ်ႇထၢင်သေ ၾႆးႁုပ်ႇမႆႈၶိုၼ်ႈမႃး ၼႆဝႃႇ” ဝႃႈၼႆ။

တေႃႈလဵဝ် ယူႇတီႈၵူၼ်းဝၢၼ်ႈ ပွၵ်ႉဝဵင်းသႃႇ လႄႈ ရူတ်ႉၶႄၾႆး ၼႂ်းၸႄႈဝဵင်းၼမ်ႉၶမ်း တိုၵ်ႉ ဢွၼ်ၵၼ်ၸွႆႈၶႄၾႆးယူႇသေ တႃႉ ႁႅင်းၾႆးၼႆႉ ႁႅင်းၼႃႇလႄႈ ၶႄယင်းပႆႇလႆႈ။ တိုၵ်ႉမႆႈၼႂ်းဝၢင်းၶၢႆၼမ်ႉမၼ်းၼၼ်ႉယူႇ။ ႁိမ်းႁွမ်းတႄႉ ဢမ်ႇႁၼ်ၾႆး လၢမ်းမႆႈၼင်ႇၵဝ်ႇ ဝႃႈၼႆ။

ၵဵဝ်ႇၵပ်းလွင်ႈၾႆးမႆႈၼႆႉ ၵႃႈၶၼ်လူႉသုမ်းတေမီးၵႃႈႁိုဝ် ဢၼ်ဝႃႈၼၼ်ႉ ပႆႇႁူႉ တေႃႈလဵဝ် ၸဵမ်ၵူၼ်းဝၢၼ်ႈ၊ ပလိၵ်ႈၶႄၾႆး တိုၵ်ႉဢွၼ်ၵၼ်ၸွႆႈၶႄ/ ႁူတ်းၾႆးၵၼ်ယူႇ ဝႃႈၼႆ။

မိူဝ်ႈဝၼ်းတီႈ 07/05/2019 ယၢမ်းၵၢင်ၼႂ် 4 မူင်း ၾႆးမႆႈႁၢၼ်ႉၶၢႆၾူၼ်း(ႁိူၼ်း)၊ ႁၢၼ်ႉၶၢႆၶူဝ်း တင်းမူတ်း 3 လင် တီႈႁိမ်း ၵၢတ်ႇ ပွၵ်ႉ 5 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ မႆႈပႃးၵူၼ်း 2 ၵေႃႉ ၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ။