ဢွၼ်ႇၸၢႆး 2 ၵေႃႉ ႁေႃႈရူတ်ႉၶိူင်ႈဝႆးသေ ပဵၼ်ၽေးဢုပၢတ်ႈ ရူတ်ႉလူမ်ႉသေ လႆႈလူႉတၢႆ တင်း 2 ၵေႃႉ တီႈမိူင်းၵိုင် ဝႃႈၼႆ။
ဝၼ်းတီႈ 08/05/2019 ယၢမ်းႁူဝ်ၶမ်ႈ မွၵ်ႈ 5 မူင်းၼၼ်ႉ ၸၢႆးမေႇထႃႇ(ႁွင်ႉ) ၸၢႆးဝႃႉတင်း ၸၢႆးလႃႉမိၼ်းထႅတ်ႉ 2 ပီႈၼွင်ႉ လႆႈပဵၼ်ၽေးဢုပၢတ်ႈ ရူတ်ႉလူမ်ႉ တီႈဝၢၼ်ႈလွႆၵူႇတဝ်ႉ ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၼၢင်းယိင်း ၵေႃႉပဵၼ်ပီႈၼၢင်း ၽူႈတၢႆ 2 ၵေႃႉ လၢတ်ႈတီႈၽူႈတွႆႇႁွၵ်ႈဝႃႈ“ ပဵၼ်ၼွင်ႉၸၢႆးလႄႈ လၢၼ်ၸၢႆးၶႃႈႁဝ်းဢေႃႈ။ ၶဝ်ဢွၼ်ၵၼ် ၵႂႃႇဢႅဝ်ႇ/လႄႇၶႃႈဢေႃႈ။ လႅပ်ႈတေႁေႃႈဝႆးၶႃႈယူဝ်ႉ။ ၸၢႆးမေႇထႃႇတႄႉ လႆႈလူႉသဵင်ႈမိူဝ်ႈဝႃးၶႃႈ။ မိူဝ်ႈ ၼႆႉ ၵၢင်ၼႂ် 1 မူင်းၶိုင်ႈပၢႆၼၼ်ႉ ၸၢႆးလႃႉမိၼ်းထႅတ်ႉ လႆႈသဵင်ႈၵႂႃႇၶႃႈ။ မိူဝ်ႈၼႆႉ ယၢမ်းၵၢင်ဝၼ်း ယူႇတီႈပေႃႈ မႄႈပီႈၼွင်ႉ ၸိူဝ်ႉ ၶိူဝ်းသေ ဢွၼ်ၵၼ်ပူၼ်ႉၶၢပ်ႈတူဝ် ၵေႃႉပဵၼ်ၸၢႆးလႃႉမိၼ်းထႅတ်ႉဢွၼ်တၢင်းၶႃႈဢေႃႈ။ တွၼ်ႈတႃႇၶၢပ်ႈတူဝ် ၸၢႆးမေႇ ထႃႇတႄႉ ပႆႇပူၼ်ႉၶႃႈ။ တိုၵ်ႉပႂ်ႉပေႃႈမၼ်းတိုၵ်ႉတေလုၵ်ႉလႃႈသဵဝ်ႈ မႃးမိူင်းၵိုင် တေပူၼ်ႉဝၼ်းလႂ် ယင်းပႆႇႁူႉၶႃႈ” ဝႃႈၼႆ။
ၸၢႆးမေႇထႃႇ(ႁွင်ႉ) ၸၢႆးဝႃႉၼႆႉ ဢႃယုလႆႈ 23 ပီ။ ၸၢႆးလႃႉမိၼ်းထႅတ်ႉသမ်ႉ ဢႃယု လႆႈ 18 ပီ ပဵၼ်ၵူၼ်းဝၢၼ်ႈ ပွၵ်ႉ 1 ၸႄႈဝဵင်းမိူင်းၵိုင် ဝႃႈၼႆ။
တေႃႈလဵဝ် ၶၢပ်ႈတူဝ်ၸၢႆးလႃႉမိၼ်းထႅတ်ႉတႄႉ ယူႇတီႈပေႃႈမႄႈၸိူဝ်ႉၶိူဝ်းပီႈၼွင်ႉသေ လႆႈပူၼ်ႉၶၢပ်ႈတူဝ်ၵႂႃႇမိူဝ်ႈၼႆႉ ယၢမ်းၵၢင်ဝၼ်းၼႆႉယဝ်ႉ ဝႃႈၼႆ။
ၵူၼ်းမိူင်းၵိုင် လၢတ်ႈဝႃႈ “ၸဵမ်ႁေႃႈရူတ်ႉ ႁေႃႈၵႃး ၵႂႃႇလႂ်မႃးလႂ်ၵေႃႈယဝ်ႉ ႁႂ်ႈဢွၼ်ၵၼ် ႁေႃႈလွႆးလွႆး ယႃႇႁေႃႈဝႆး တူၺ်း သဵၼ်ႈတႃႈသၢႆတၢင်းၵၼ်လီလီ။ ပေႃးႁေႃႈရူတ်ႉၶိူင်ႈၼႆၵေႃႈႁႂ်ႈဢွၼ်ၵၼ်သႂ်ႇမၢၵ်ႇႁူဝ်ႁႄႉၽေး။ ၽေးဢုပၢတ်ႈ ဢၼ် ဝႃႈၼၼ်ႉ ဢမ်ႇႁူႉ မၼ်းတေပဵၼ်မိူဝ်ႈလႂ် ႁႂ်ႈဢွၼ်ၵၼ်ဝႆႉသတိၵၼ်သေၵမ်း” ဝႃႈၼႆ။