ၸွမ်းၼင်ႇၶေႃႈပိုၼ်ၽၢဝ်ႇ ၸွမ်ၸိုင်ႈဢၼ်ပွႆႇပၼ်ၵူၼ်းတူၵ်းၶွၵ်ႈမိူဝ်ႈဝၼ်းတီႈ 7/5/2019 ၼၼ်ႉသေ ၵူၼ်းတူၵ်းၶွၵ်ႈ ၸိူဝ်းပူၼ်ႉလွတ်ႈဢွၵ်ႇၶွၵ်ႈတွင်ႇလေးလူင်း ၸႄႈဝဵင်းယွင်ႁူၺ်ႈမႃးၼၼ်ႉ ပႃးၵူၼ်းသိုၵ်း RCSS/SSA 5 ၵေႃႉ ဝႃႈၼႆ။
ဢၼ်ၸွမ်ၸိုင်ႈဢူးဝိၼ်းမိၼ်ႉ ပွႆႇပၼ်ၵူၼ်းတူၵ်းၶွၵ်ႈ ပွၵ်ႈၵမ်းသၢမ်ၼႆႉ မိူင်းႁူမ်ႈတုမ် ပတ်းပိုၼ်ႉ ပွႆႇပၼ် 6520 ၵေႃႉ။ ၼႂ်းၼၼ်ႉ ၶွၵ်ႈတွင်ႇလေးလူင်း ၸႄႈဝဵင်းယွင်ႁူၺ်းၸိုင်ႈတႆးပွတ်းၸၢၼ်းလွတ်ႈမႃး 160 ၵေႃႉ။ တီႈၶွၵ်ႈ ၵဵင်းတုင် ၸိုင်ႈ တႆးပွတ်းဢွၵ်ႇသမ်ႉ 83 ၵေႃႉလႄႈ တီႈၶွၵ်ႈ မိူင်းသၢတ်ႇၸိုင်ႈတႆး ပွတ်းဢွၵ်ႇ 61 ၵေႃႉ ဝႃႈၼႆ။
ဢူးၺုၼ်ႉလုၼ်ႇ ၵႅမ်ၽူႈၸီႉသင်ႇ ၶွၵ်ႈတွင်ႇလေးလူင်း လၢတ်ႈတီႈၽူႈတွႆႇႁွၵ်ႈဝႃႈ “ ယႃႇပေႁႂ်ႈပဵၼ်ဢမုၶတီးၸိူင်ႉၼႆ ထႅင်ႈ၊ မိူဝ်းၼႃႈမႃး ပေႃးလႆႈၺႃးတူတ်ႈတၢမ်ႇ ယွၼ်ႉဢမုၶတီးၸိူင်ႉၼႆထႅင်ႈၼႆတႄႉ တေလႆႈၺႃးတူတ်ႈတၢမ်ႇ ဢၼ် သုင်သုတ်း ၸွမ်းၼင်ႇမၢႆမီႈ မတ်ႉတႃမီးဝႆႉ ဢၼ်ဝႃႈၼၼ်ႉၵေႃႈ လႆႈသပ်းလႅင်းပၼ်ၶဝ်ယူႇ။ ပေႃးဢွၵ်ႇၶွၵ်ႈၵႂႃႇ တႃႇႁႃ ၵိၼ် လဵင်ႉတွင်ႉလႆႈၼၼ်ႉၵေႃႈ လႆႈသွၼ်ပၼ်ၵၢၼ်ႁႃၵိၼ်လဵင်ႉတွင်ႉၶဝ်။ ယႃႇႁႂ်ႈလႆႈမီးထႅင်ႈ ဢမုၶတီးၸိူဝ်းၼႆႉ ႁႂ်ႈၶတ်းၸႂ်ႁႃၵိၼ်လဵင်ႉတွင်ႉသိုဝ်ႈသိုဝ်ႈယူဝ်းယူဝ်းၼၼ်ႉၵေႃႈ လႆႈသင်ႇလၢတ်ႈၶဝ်ၵႂႃႇယူႇ။ တႃႇတေပွၵ်ႈမိူဝ်းႁိူၼ်း ၼၼ်ႉၵေႃႈ ႁဝ်းၶႃႈလႆႈဢွၵ်ႇပၼ်ၵႃႈၶၢဝ်းတၢင်း ၶဝ်ယူႇ။ ႁဝ်းၶႃႈလႆႈၵႂႃႇသူင်ႇၶဝ်ထိုင်တီႈတႃႈလူတ်ႉၾႆး၊ တႃႈလူတ်ႉၵႃး” ဝႃႈၼႆ။
ယူႇတီႈလူင်ပွင်ၸိုင်ႈဢူးဝိၼ်းမိၼ်ႉ ပွႆႇၵူၼ်းတူၵ်းၶွၵ်ႈပွၵ်ႈၵမ်း 3 ႁူဝ်ၵူၼ်း 6,520 ၵေႃႉၼႆႉ ၵမ်ႈၼမ်တေပဵၼ်ၵူၼ်း တူၵ်းၶွၵ်ႈဢၼ်ၺႃးတီႉ ၵဵဝ်ႇၵပ်းလူၺ်ႈ လိူင်ႈယႃႈမဝ်းၵမ် တင်းၼမ် ဝႃႈၼႆ။
ၸၢႆးဝုၼ်း ဢၼ်ပူၼ်ႉလွတ်ႈတၢမ်ႇၶွၵ်ႈတီႈ တွင်ႇလေးလူင်း လွတ်ႈဢွၵ်ႇမႃးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၸႂ်သိူဝ်း ၶႃႈဢေႃႈ မိူဝ်ႈ ဝၼ်းသိုၼ်းၼၼ်ႉ ၾၢႆႇၸဝ်ႈၼႃႈတီႈၶဝ် မႃးလၢတ်ႈဝႆႉဝႃႈ သူတေလႆႈဢွၵ်ႇယဝ်ႉၵူၺ်း၊ ၵဵဝ်ႇၵပ်းမတ်ႉတႃ (ပုဒ်မ15၊ 16 ) ဢၼ်ၺႃးတီႉၼၼ်ႉ။ ထိုင်မႃး မိူဝ်ႈဝၼ်းတီႈ 6 ၶဝ်ၵေႃႈမႃးလၢတ်ႈထႅင်ႈၵမ်းၼိုင်ႈ မိူဝ်ႈၽုၵ်ႈသူပွၵ်ႈ မိူဝ်း ၵၼ်လႆႈ ယဝ်ႉ။ ၶႃႈႁဝ်းလႆႈ ယူႇၼႂ်းၶွၵ်ႈၼႆႉ 3 ပီပၢႆ 3 လိူၼ်၊ ၶႃႈႁဝ်းတႄႉ ဢမ်ႇမီးတၢင်းၽိတ်းသင်ၶႃႈ ၵႂႃႇႁဵတ်းၵေႃႉ ပိူၼ်ႈ ၵူၼ်းၵႃႉၶၢႆသူႇသမ်းၵိၼ်ယႃႈမဝ်းၵမ်သေ ၺႃးယေးၺွပ်းပႃးၵူၺ်းၶႃႈ” ဝႃႈၼႆ။
ဝၢႆးဝၼ်း 3 မူင်းၼၼ်ႉ ယူႇတီႈၽူႈမီးပုၼ်ႈၽွၼ်းၶဝ် ဢဝ်ၵူၼ်းတူၵ်းၶွၵ်ႈ တၢင်ႇၵႃးၵႂႃႇသူင်ႇတီႈ တႃႈလူတ်ႉၾႆးဝဵင်း ယွင်ႁူၺ်ႈ ၸႄႈတွၼ်ႈတူၼ်းတီး။ လုၵ်ႉတီႈၶွၵ်ႈတွင်ႇလေးလူင်းသေ ဢၼ်လႆႈဢွၵ်ႇၶွၵ်ႈမႃး ၸၢႆး 123 ၵေႃႉ ၊ ယိင်း 38 ၵေႃႉ တင်းမူတ်း 161 ၵေႃႉ ဝႃႈၼႆ။
ပူၼ်ႉမႃး မိူဝ်ႈလိူၼ် April ဝၼ်းတီႈ 17 ၸွမ်ၸိုင်ႈဢူးဝိၼ်းမိၼ်ႉ ပိုၼ်ၽၢဝ်ႇပွႆႇပၼ်ၵူၼ်းတူၵ်းၶွၵ်ႈ 9,535 ၵေႃႉ၊ လိူၼ် April ဝၼ်းတီႈ 26 ပွႆႇပဵၼ်ထႅင်ႈ 6,948 ၵေႃႉလႄႈ ဝၼ်းတီႈ 7 လိူၼ်မေႊၼႆႉ ပွႆႇပၼ်ထႅင်ႈ 6,520 ၵေႃႉ။ တင်းသဵင်ႈ ပွႆႇပၼ်ယဝ်ႉ 23,003 ၵေႃႉ။ ၼႂ်းၼၼ်ႉ ပႃးၵူၼ်းၼွၵ်ႈမိူင်း 16 ၵေႃႉ။ လုၵ်ႈၸုမ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း 23 ၵေႃႉ ၼႆယဝ်ႉ။
