ၼႂ်းၸိုင်ႈတႆးပွတ်းၸၢၼ်း လၢႆလၢႆတီႈ ၵူၼ်းမိူင်းၶၢတ်ႇၼမ်ႉၵိၼ်/ၸႂ်ႉ ၽွင်းၶၢဝ်းမႆႈၼႆႉ မီးဝၢၼ်ႈၵူၼ်း 50 ဝၢၼ်ႈပၢႆ ႁူပ်ႉ လွင်ႈယၢပ်ႇၽိုတ်ႇ လိူဝ်ႁႅင်း။

ဝၢၼ်ႈၵူၼ်း ႁူဝ်ၵူၼ်း 1,000 ပၢႆ ႁူပ်ႉလွင်ႈယၢပ်ႇၽိုတ်ႇလိူဝ်ႁႅင်း လွင်ႈၼမ်ႉၵိၼ်/ၸႂ်ႉ ၽွင်းၶၢဝ်းမႆႈၼႆႉ မိူၼ်ၼင်ႇ ၼႂ်းၸႄႈ ဝဵင်းမိူင်းၼၢႆး၊ လွႆလႅမ်၊ ၵၢတ်ႇလေႃႉ၊ ယွင်ႁူၺ်ႈ၊ ယႂႃႇငၢၼ်ႇလႄႈ ပၢင်းတရႃႉ ၸိူဝ်းၼႆႉ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈလဵဝ် ၼႆႉ ၵူၼ်းမိူင်းႁဝ်း ဢၼ်ႁူပ်ႉလွင်ႈယၢပ်ႇၽိုတ်ႇၼမ်ႉၵိၼ်/ၸႂ်ႉၼႆႉ တၢင်းဝၢၼ်ႈယေး ဝၢၼ်ႈၵုင်းလူင်လႄႈ ဝၢၼ်ႈလွႆၶဵဝ်။ တွၼ်ႈတႃႇ ဝၢၼ်ႈယေးၼၼ်ႉ ၶႃႈႁဝ်းၶပ်းၶိုင်ပၼ်ယူႇ။ ႁဝ်းၶႃႈ ႁွင်ႉၾၢႆႇႁွင်ႈၵၢၼ်မုၼ်းလႅင်း ဝၢၼ်ႈဢိူင်ႈ (ကျေးလက်ဖွံ ဖြိုးရေး) ၶဝ် တေႃႇပၼ်ၶိုၼ်းလွတ်ႇၼမ်ႉ လုၵ်ႉတီႈၼမ်ႉႁူးသေ တေႃႉသူင်ႇၵႂႃႇ ယွၼ်ႉဝႃႈ မၼ်းမီးလွတ်ႇၼမ်ႉၵဝ်ႇ ဝႆႉယူႇ ယဝ်ႉ ယွၼ်ႉ မၼ်းၵွႆသေ ႁႂ်ႈၾၢႆႇမုၼ်းလႅင်းၶဝ် လႅၵ်ႈပၼ်သႂ်ႇလွတ်ႇမႂ်ႇ။ ၼွင်ၵဝ်ႇဢၼ်ၵဵပ်းၼမ်ႉဝႆႉၼၼ်ႉၵေႃႈ မၼ်းဢမ်ႇ ပဵၼ်ၵၢၼ် ဢမ်ႇၸႂ်ႉလႆႈယဝ်ႉသေ တေၶိုၼ်းႁဵတ်းမႂ်ႇပၼ်ထႅင်ႈ” ဝႃႈၼႆ။

မၼ်းၸၢႆး သိုပ်ႇလၢတ်ႈဝႃႈ “ဝၢၼ်ႈဢၼ်ယၢပ်ႇၽိုတ်ႇၼမ်ႉလိူဝ်ႁႅင်း ပဵၼ်ဝၢၼ်ႈၵုင်းလူင် ဢၼ်တင်ႈယူႇ ၼိူဝ်ၵုင်း။ မိူဝ်ႈပီၵၢႆ ယၢမ်ႈၶုတ်းၼမ်ႉမေႃႇပၼ် ယူႇသေတႃႉၼမ်ႉဢမ်ႇဢွၵ်ႇလႄႈ ပီၼႆႉၶုတ်းထႅင်ႈ 2 ႁူး၊ ၼမ်ႉဢွၵ်ႇႁူးလဵဝ်ၵူၺ်း”ဝႃႈၼႆ။

“ၵူၼ်းဝၢၼ်ႈလႆႈတဵၵ်းတဵၵ်းလိုဝ်ႈလိုဝ်ႈဢေႃႈ။ ၼမ်ႉၼႆႉယၢပ်ႇၽိုတ်ႇၼႃႇၶႃႈ။ ယွၼ်ႉဝႃႈၼမ်ႉမေႃႇၼၼ်ႉ မၼ်းဢမ်ႇလဵင်ႉ ပေႉလႆႈတႃႇၵူၼ်းဝၢၼ်ႈ။ ၵဵဝ်ႇၵပ်းလွင်ႈၼႆႉ ၶႃႈတၢင်ႇဝႆႉတီႈႁွင်ႈၵၢၼ်ၾၢႆႇမုၼ်းလႅင်းၶဝ်ဝႆႉယဝ်ႉ။ လိူဝ်ၼၼ်ႉ လႆႈငိၼ်းဝႃႈ မိူဝ်ႈၽုၵ်ႈမိူဝ်ႈႁိုဝ်းၼႆႉ ၽွင်းလူင်မိူင်းတႆးၵေႃႈတေမႃး ၶႃႈတေတၢင်ႇပႃးတီႈၽွင်းလူင်မိူင်းတႆးထႅင်ႈ။ တေလႆႈတေႃႇလွတ်ႇ ၼမ်ႉသေ ဢဝ်တီႈၼမ်ႉႁူးမႃးလဵင်ႉၼႂ်းဝၢၼ်ႈၵုင်းလူင်ၼၼ်ႉ ဝၢႆးၼၼ်ႉ တီႈဝၢၼ်ႈလွႆၶဵဝ်ၵေႃႈ တေသိုပ်ႇတေႃႇပၼ်ၵႂႃႇ ၵမ်းလဵဝ်ယဝ်ႉ” ဝႃႈၼႆ။

တေႃႈလဵဝ် လင်ႁိူၼ်း ၵူၼ်းဝၢၼ်ႈဢၼ်ၶၢတ်ႇၼမ်ႉၵိၼ်/ၸႂ်ႉၼၼ်ႉ မိူၼ်ၼင်ႇ ဝၢၼ်ႈယေး လင်ႁိူၼ်း 50-60 လင်၊ ဝၢၼ်ႈ ၵုင်းလူင် လင်ႁိူၼ်း 100 ပၢႆလႄႈ ဝၢၼ်ႈလွႆၶဵဝ် လင်ႁိူၼ်း 25 လင် ႁူပ်ႉလွင်ႈယၢပ်ႇၽိုတ်ႇ လိူဝ်ႁႅင်း လွင်ႈၼမ်ႉၵိၼ်ၼမ်ႉ ၸႂ်ႉ ၽွင်းၶၢဝ်းမႆႈၼႆႉ မႃးၵူႈပီ ဝႃႈၼႆ။

ၽူႈလဵပ်ႈႁဵၼ်းႁၵ်ႉသႃသိင်ဝႅတ်ႉလွမ်ႉၸိုင်ႈတႆး လၢတ်ႈဝႃႈ “ ယွၼ်ႉပႃႇမႆႉမိူင်းတႆးမူၺ်ႉလႄႈ ၾိင်ႈၾႃႉရႃႇသီႇၵေႃႈ ႁႅင်ႈလႅင်ႉမႃးတိၵ်းတိၵ်း။ ၼႂ်းၸိုင်ႈတႆးပွတ်းၸၢၼ်း တီႈဢၼ်ယၢမ်ႈမီးၼမ်ႉလိူင်ႇၼမ်ၵေႃႈ ႁူပ်ႉပၼ်ႁႃၼမ်ႉႁႅင်ႈမႃး။ ဢၼ်မႆႈၵေႃႈမႆႈႁႅင်းလိူဝ်ၵူႈပီ” ဝႃႈၼႆ။