ၵူၼ်းႁၢႆႉ 2 ၵေႃႉ ၶဝ်ႈၸူၼ် ႁၢၼ်ႉၶၢႆၶမ်း တီႈပွၵ်ႉၵၢတ်ႇ ဝဵင်းၵေးသီး လႆႈၶမ်းၵႂႃႇ 8 ၵျၢပ်ႈလႄႈ ငိုၼ်း 10 သႅၼ်ပျႃး ဝႃႈၼႆ။
ဝၼ်းတီႈ 03/05/2019 ယၢမ်းႁူဝ်ၶမ်ႈ မွၵ်ႈ 5 မူင်းပၢႆၼၼ်ႉ မီးၽူႈၸၢႆး 2 ၵေႃႉ မႃးထၢမ်ၶၢႆ ႁုၼ်ႇႁၢင်ႈၽြႃးသူႇၼိုင်ႈ တီႈ ႁၢၼ်ႉ ၶၢႆၶမ်း လုင်းၸၢႆးၶမ်းလူႇ လႄႈ ၼၢင်းၶိၼ်ႇငူၺ်ႇၶဝ် တီႈပွၵ်ႉၵၢတ်ႇ ၸႄႈဝဵင်းၵေးသီးသေ ၸူၼ်ဢဝ်ၶမ်းၶဝ်ၵႂႃႇပႃး ဝႃႈၼႆ။
ၸၢႆးၸၢမ်ႇမိူင်း ၽူႈတႅၼ်းသၽႃး ၸႄႈမိူင်း ၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းၸဝ်ႈၶွင်ႁၢၼ်ႉၶမ်း ၶႆႈၼႄဝႃႈ ၵူၼ်း 2 ၵေႃႉၼၼ်ႉ မႃးထၢမ်ၶၢႆႁုၼ်ႇႁၢင်ႈၽြႃးသေ ယွၼ်းငိုၼ်း 300 သႅၼ်ပျႃး။ ၵမ်းၼႆႉ ၸဝ်ႈႁၢၼ်ႉၶမ်းၼၼ်ႉ သမ်ႉဝႃႈ ႁဝ်းၶႃႈ ဢမ်ႇမီးငိုၼ်း တေႃႈလဵဝ် ၶၼ်ၶဝ်ႈၵၢပ်ႇၵေႃႈ ဢမ်ႇပဵၼ်ၵၢၼ်၊ ၵူၼ်းဢၼ်မႃးၸူၼ်ၼၼ်ႉ သမ်ႉဝႃႈ ၶႃႈ လူဝ်ႇငိုၼ်းၼႃႇဢိူဝ်ႈၼႆႉ တႃႇတေလဵင်ႉၵၼ်။ ပေႃးၼႆၵေႃႈ ဢဝ်ပၼ်သေ 100 သႅၼ်ပျႃးလႄႈ ၼႆသေ ၸူၵ်းၵွင်ႈဢွၵ်ႇၼႄ ၸဝ်ႈႁၢၼ်ႉၶမ်း။ မိူၼ်ဝႃႈ ဢဝ်ၵွင်ႈၵမ်ႉပႃး ၵူၺ်းၵႃႈ ၵူၼ်းၸူၼ်ၼၼ်ႉ သမ်ႉလၢတ်ႈထႅင်ႈဝႃႈ မဵဝ်းသိုၵ်းၼႆႉ ဢမ်ႇပႃးၵွင်ႈ မိူဝ်းၼႆတႄႉ မိူၼ်တင်းဝႃႈၺႃးတၢမ်ႇတၢႆၵူၺ်းၶႃႈယဝ်ႉ ၼႆထႅင်ႈ၊ မိူၼ်ဝႃႈ ၸႂ်ႉလၢႆးဢူၼ်ႈဢွၼ်ႇသေၸူၼ်ၼၼ်ႉၶႃႈယဝ်ႉ” ဝႃႈၼႆ။
ၵူၼ်းၸူၼ် 2 ၵေႃႉၼၼ်ႉ လႆႈငိုၼ်းၵႂႃႇ 10 သႅၼ်ပျႃးလႄႈ ၶမ်း 8 ၵျၢပ်ႈ၊ ၶမ်း 1 ၵျၢပ်ႈလႂ် 1,060,000 ပျႃး (ၶၼ်ၶမ်းတီႈၵေး သီး) ႁူမ်ႈၵၼ်တင်းမူတ်း တေမႅၼ်ႈငိုၼ်းယူႇ မွၵ်ႈ 100 သႅၼ်ပျႃး(ငိုၼ်းမၢၼ်ႈ) ဝႃႈၼႆ။
ၸၢႆးၸၢမ်ႇမိူင်း လၢတ်ႈဝႃႈ “ ဢၼ်ၶဝ်ဝႃႈ ဢဝ်ၵွင်ႈငႃသေ ၸူၼ်တႄႉ ဢမ်ႇၸႂ်ႈ။ လွင်ႈဢၼ်ဝႃႈ ဢဝ်ၽြႃးမႃးထၢမ်ၶၢႆၼၼ်ႉ တႄႉ ၸႂ်ႈယူႇ ပေႃးၶဝ်လႆႈငိုၼ်း လႆႈၶမ်းယဝ်ႉၵေႃႈ ၽြႃးဢၼ်ၶဝ်ဢဝ်မႃးထၢမ်ၶၢႆၼၼ်ႉ ဢမ်ႇဝႆႉပၼ်ၸဝ်ႈၶွင်ႁၢၼ်ႉ သင် ဢဝ်ၵႂႃႇၶိုၼ်းမူတ်း” ဝႃႈၼႆ။
“ၵူၼ်းၸူၼ် 2 ၵေႃႉၼၼ်ႉ ၶီႇၵႃးမႃးၸူၼ်၊ ပဵၼ်ၵႃးသီၶၢဝ်၊ လႅပ်ႈတေဢမ်ႇ ၸႂ်ႈၵူၼ်း ၼႂ်းသိုၵ်း ၶဝ်တေၽၢမ်းဝႃႈပဵၼ်သိုၵ်း ၼႆသေ ၸူၼ်ယွၵ်ႇႁႂ်ႈပိူၼ်ႈၵူဝ်ၶဝ် သင်ပဵၼ်သိုၵ်းတႄႉ ပိူၼ်ႈမီးပိူင်မၼ်း တေဢမ်ႇလႃႈလီႈႁဵတ်း။ ထႅင်ႈၾၢႆႇၼိုင်ၵေႃႈ ပေႃးပဵၼ်သိုၵ်းယူဝ်းယူဝ်းဢွၼ်ႇတႄႉ ဢမ်ႇလႅပ်ႈမီးၵႃးႁေႃႈယူဝ်ႉ” ၵူၼ်းမိူင်းပိုၼ်ႉတီႈ ၵေးသီးတႄႉ လၢတ်ႈၼႄၼင်ႇၼႆ။
ထိုင်ယၢမ်းလဵဝ် ၵူၼ်း 2 ၵေႃႉၼၼ်ႉ ပဵၼ်ၽႂ် ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ပႆႇႁူႉ။ ယူႇတီႈၸဝ်ႈၶွင်ႁၢၼ်ႉၶမ်း လႆႈ ၸႅင်ႈၵႂၢမ်းတီႈႁူင်းပလိၵ်ႈၸႄႈဝဵင်းၵေးသီးဝႆႉယဝ်ႉ ဝႃႈၼႆ။
