RCSS မွပ်ႈဢၢပ်ႈယႃႈဢႆႊ 30 ၵီႊလူဝ်ႊ ပၼ်ၸဝ်ႈၼႃႈတီႈမၢၼ်ႈ တီႈၸႄႈဝဵင်းမိူင်းတူၼ် ယဝ်ႉတူဝ်ႈလီငၢမ်း ဝႃႈၼႆ။
မိူဝ်ႈၼႆႉ ဝၼ်းတီႈ 08/05/2019 ယၢမ်းၵၢင်ဝၼ်း 11 မူင်း ထိုင် 12 မူင်းၶိုင်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA မွပ်ႈဢၢပ်ႈ ယႃႈဢႆႊ 30 ၵီႊလူဝ်ႊ ပၼ်ၾၢႆႇၸဝ်ႈၼႃႈတီႈမၢၼ်ႈ တီႈႁူင်းႁေႃးပလိၵ်ႈ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။
ၽူႈမီးပုၼ်ႈၽွၼ်း ၼႂ်း RCSS ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ယႃႈမဝ်းၵမ်ၼႆႉ ပဵၼ်ဢၼ်တီႉလႆႈမိူဝ်ႈ ဝၼ်းတီႈ 26/03/2019 ၼၼ်ႉၵူၺ်း။ ပၢင်ဢၢပ်ႈယႃႈဢႆႊတင်းၼမ် 30 ၵီႊလူဝ်ႊၼႆႉ လႆႈၸတ်းႁဵတ်းၵႂႃႇတီႈမိူင်းတူၼ် ယဝ်ႉတူဝ်ႈလီ ငၢမ်းယဝ်ႉၶႃႈ။ တီႈပၢင်မွပ်ႈယႃႈမဝ်းၵမ်ပၼ်ၾၢႆႇၸဝ်ႈၼႃႈတီႈမၢၼ်ႈၼၼ်ႉ ၸဝ်ႈသိုၵ်းၸၢႆးႁၢၼ် ၽူႈၸတ်းၵၢၼ်ႁွင်ႈၵၢၼ် ၾၢႆႇၽဵဝ်ႈမူၺ်ႉယႃႈမဝ်းၵမ် မွၵ်ႇလၢတ်ႈၶေႃႈၵႂၢမ်း လွင်ႈလႆႈဢၢပ်ႈပၼ်တီႈ လူင်ပွင်ၸိုင်ႈၵႂႃႇ” ဝႃႈၼႆ။
တီႈပၢင်ၵႅဝ်ႈ မွပ်ႈပၢင်ယႃႈဢႆႊ 30 ၵီႊလူဝ်ႊ တီႈမိူင်းတူၼ်ၼၼ်ႉ ယူႇတီႈၾၢႆႇလူင်ပွင်ၸိုင်ႈသမ်ႉ ၽူႈၵွၼ်းပလိၵ်ႈၸႄႈ တွၼ်ႈလႄႈ ပလိၵ်ႈၸႄႈဝဵင်း လႆႈႁပ်ႉဢဝ် ဝႃႈၼႆ။
တၢင်းၾၢႆႇ RCSS သမ်ႉ ၸဝ်ႈသိုၵ်းလူင်တိုၼ်းၶိူဝ်း CEC ဢွၼ်ႁူဝ်ၶဝ်ႈႁူမ်ႈလႄႈ ၸဝ်ႈသိုၵ်းၸၢႆႁၢၼ် ၽူႈၸတ်းၵၢၼ်ႁွင်ႈ ၵၢၼ်ၾၢႆႇၽဵဝ်ႈမူၺ်ႉယႃႈမဝ်းၵမ် မုၵ်ႉၸုမ်း မွၵ်ႇလၢတ်ႈၶေႃႈၵႂၢမ်း လွင်ႈလႆႈမွပ်ႈပၼ်တီႈလူင်ပွင်ၸိုင်ႈၼၼ်ႉ ဝႃႈၼႆ။
တီႈပၢင်ၵႅဝ်ႈၼၼ်ႉ မီးၸဝ်ႈၼႃႈတီႈႁွင်ႈၵၢၼ်ၾၢႆႇလူင်ပွင်ၸိုင်ႈ ၶဝ်ႈႁူမ်ႈ မွၵ်ႈ 50 ပၢႆ ဝႃႈၼႆ။
