ပလိၵ်ႈတႃႈၶီႈလဵၵ်း တီႉလႆႈၵူၼ်းၸူၼ်ႁၢၼ်ႉၶမ်း ထႅင်ႈၵေႃႉၼိုင်ႈ ဢၼ်ၶဝ်ႈၸူၼ်ႁၢၼ်ႉၶၢႆၶမ်းၼၢင်းၼၢင်းဝုၼ်းၵႅဝ်ႈ မိူဝ်ႈႁၢင် လိူၼ်မတ်ႉၶျ်ပူၼ်ႉမႃးၼႆႉၼၼ်ႉ ဝႃႈၼႆ။
ဝၼ်းတီႈ 4/5/2019 ၽူႈၵွၼ်းၸႄႈတွၼ်ႈတႃႈၶီႈလဵၵ်း ပိုၼ်ၽၢဝ်ႇဝႃႈ တီႉၺွပ်းလႆႈတူဝ်ၵူၼ်းၸူၼ်ထႅင်ႈၵေႃႉၼိုင်ႈ ၸိုဝ်ႈ ႁွင်ႉ ဢၢႆႈၶမ်းတၢၼ်း ပလိၵ်ႈၶဝ်ႈၵူတ်ႇထတ်း တီႈႁိူၼ်းမၼ်းၸၢႆး ထူပ်းႁၼ် မၢၵ်ႇၵွင်ႈလႄႈၶူဝ်းၶမ်း ဢၼ်ပဵၼ်လၵ်းထၢၼ် ဢၼ်လႆႈၸူၼ်ဢဝ်မႃး ဝႃႈၼႆ။
တေႃႇထိုင်ယၢမ်းလဵဝ် ယူႇတီႈပလိၵ်ႈတီႉ ၺွပ်းၵုမ်းၶင်လႆႈတူဝ်ၵူၼ်းႁၢႆႉဢၼ်ၶဝ်ႈၸူၼ်ႁၢၼ်ႉၶၢႆၶမ်းၼၼ်ႉယဝ်ႉ 2 ၵေႃႉ။ မိူဝ်ႈဝၼ်းတီႈ 2/5/2019 ၼၼ်ႉၵေႃႈ တီႉလႆႈၵေႃႉၼိုင်ႈ ပဵၼ်ၵူၼ်းၸၢဝ်း ထႆး ဝႃႈၼႆ။
မိူဝ်ႈဝၼ်းတီႈ 29/03/2019 ၼၼ်ႉ ၵူၼ်းၸူၼ်ႁူၵ်းၵေႃႉ ၶဝ်ႈၸူၼ် ႁၢၼ်ႉၶၢႆၶမ်း ၼၢင်းၼၢင်းဝုၼ်းၵႅဝ်ႈ ဢၼ်ပိုတ်ႇဝႆႉႁိမ်း သဵၼ်ႈတၢင်းလူင်မိူင်းႁူမ်ႈတုမ် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၵူၼ်းၸူၼ်ႁူၵ်းၵေႃႉ ၼႆႉ ၶီႈၵႃးမႃးလမ်းၼိုင်ႈ သေ ဢဝ်ၵွင်ႈငႃ ၸဝ်ႈၶွင် ၸူၼ်ဢဝ်ၶမ်းၵႂႃႇ မွၵ်ႈၶၼ်ငိုၼ်း 3 ႁဵင်သႅၼ်ပျႃး။ မိူဝ်ႈၽွင်းၶဝ်ႈၸူၼ်ၼၼ်ႉ ဢဝ်ၸိူၵ်ႈမတ်ႉ မိုဝ်း ၸဝ်ႈၶွင်ႁၢၼ်ႉလႄႈ ၵူၼ်းႁဵတ်းၵၢၼ်တီႈႁၢၼ်ႉၶၢႆၶမ်းဝႆႉ ဝႃႈၼႆ။
ယၢမ်းလဵဝ် ပလိၵ်ႈတီႉလႆႈၵူၼ်းၸူၼ် 2 ၵေႃႉယဝ်ႉ ၸိူဝ်းၵိုတ်း 4 ၵေႃႉၼၼ်ႉတႄႉ တိုၵ်ႉပၢႆႈလွတ်ႈဝႆႉယူႇ လႆႈႁူႉၼင်ႇၼႆ။
