ဝၢင်းႁေႃၶမ်းမိူင်းထႆး ၸတ်းႁဵတ်းပၢင်ၶိုၼ်ႈႁၢင်ႈႁေႃပၼ် ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 10 တီႈမိူင်းၵွၵ်ႇ ၸိုင်ႈထႆး။
ဝၼ်းတီႈ 4 -6 /05/2019 ဝၢင်းႁေႃၶမ်းၸၵ်ႇၵရီႊ (ပီႈၼွင့်ၸိူဝ့်ႁိူဝ်ႇငိူၼ်ႈၶိူဝ်းၶႆႇသႅင်ၽၼ်းၶမ်း) မိူင်းထႆးၸတ်း ႁဵတ်းပၢင်ပွႆးယုၵ့်ယွင်ႈ ၸဝ်ႈမုၼ်ယႂ်ႇၶုၼ်ႁေႃၶမ်းထႆး “ ၽရႃႊပၢတ်ႊသူမ်ႊၻဵတ်ႊ ၽရႃႊပႃႊရႃႊမိၼ်ႊ ထရရႃႊမႃႊထိပ်ႊ ပေႃႊၻီႊသီႊသိၼ်ႊမႁႃဝၶျိရႃႊလူင်ႊၵွၼ်ႊ မႁိသွၼ်ႊၽူႊမီႊၽူၼ်ႊ ရၢတ်ႊၶျဝရၢင်ႊၵုၼ်ႊ ၵိတိသီႊရိသူမ်ႊပုၼ်ႊ ဢၻုၼ်ႊယၻဵတ်ႊ သယၢမ်ႊမိၼ်ထရႃႊ ထိပဵတ်ႊရၢတ်ႊဝရူဝ်ႊ ၻူမ်ႊပေႃႊရူမ်ႊ မၼၢတ်ႊထႃႊပေႃႊၽိတ်ႊ ၽရႃႊဝၶျိရၵလၢဝ့်ၸဝ်ႈယူႇႁူဝ် ” ပဵၼ်ၶုၼ်ႁေႃၶမ်း တူၼ်ထူၼ်ႈ 10 ၼႂ်းၶိူဝ်းႁေႃၶမ်း ၸၵ်ႇၵရီႊ ။
ၵွၼ်ႇတေၸတ်းႁဵတ်းပၢင်ပွႆးၶိုၼ်ႈႁၢင်ႈႁေႃၼႆ့ ၽူႈမီးပုၼ်ႈၽွၼ်းၼႂ်းလူင်ပွင်ၸိုင်ႈ ဢွၼ်ၵၼ်ၵႂႃႇ တၵ်းဢဝ်ၼမ့်ထွတ်ႈမျၢတ်ႈ ၵူႈတီႈၼႂ်းၸိုင်ႈထႆး 107 တီႈ ၼႂ်း 77 ၸႄႈတွၼ်ႈ ပိူဝ်ႈဢဝ်မႃးသုၵ်ႈလၢင့် ဢၢပ်ႇၼႂ်းဝၼ်းၸဝ်ႈ ၶိုၼ်ႈႁေႃ၊ ၸဝ်ႈၶိုၼ်ႈၼင်ႈႁၢင်ႈႁေႃမိူဝ်ႈဝၼ်းတီႈ 4 ၊ ဝၼ်းတီႈ 5 ၼၼ့် ၸဝ်ႈလႆႈမၵ်းမၼ်ႈ ပၼ်တၼ်းႁဵင်းၶိူဝ်း ႁေႃၶမ်းတွၼ်ႈၵၢင်ၶမ်ႈ ၸဝ်ႈလူင်းမိူင်း ၵူၼ်းမိူင်းပႂ့်ႁပ့်တွၼ်ႈၵိုၼ်းၶွၼ်ႈၼႂ်းဝဵင်းလူင်မိူင်းၵွၵ်ႇ ၊ ဝၼ်းတီႈ 6 ၸဝ်ႈလူင်းႁၢင်ႈႁေႃသေ ႁူပ့်ၵူၼ်းဝၢၼ်ႈၵူၼ်းမိူင်းလႄႈ ၽူႈယႂ်ႇၵူၼ်းလူင်လုမ်းၽွင်းတၢင် ၶႅၵ်ႇၼွၵ်ႈမိူင်း ၸိူဝ်းၼႆ့ ။
မိူဝ်ႈဝၼ်းတီႈ 01/05/2019 ၼၼ့် ၸဝ်ႈမုၼ်ယႂ်ႇၶုၼ်ႁေႃၶမ်းထႆး ပိုၼ်ၽၢဝ်ႇ လႆႈၵူပ်ႉၵူႈသွၼ်ႈမိင်ႈၵၼ်တင်းၸွမ် သိုၵ်းလူင်ယိင်း ၼၢင်းသုထိၻႃႊ ဝၶျီရႃလူင်းၵွၼ်း ၼ ဢယုတ့်ထယႃး ပဵၼ်တၢင်းၵၢၼ် ၸွမ်းၼင်ႇၾိင်ႈ ထုင်း ႁေႃ ၶမ်းထႆးယဝ်ႉသေ မၵ်းမၼ်ႈပဵၼ် သူမ်ႊၻဵတ်ႊၽရႃႊၼၢင်းၸဝ်ႈ သုထိၻႃႊၽတ်ႊၶျရသုထႃႊၽိမူၼ်ႊလၵ်ႊၽရႃႊ ပေႃႊရူမ်ႊရႃႊၶျိၼီႊ (ၼၢင်းၶၢင်းႁူဝ် ၶုၼ်ႁေႃၶမ်းပႃးတီႈ 10 ) ၼႆယဝ့် ။
ၶုၼ်ႁေႃၶမ်းထႆး တူၼ်မႂ်ႇၼႆ့ ပဵၼ်လုၵ်ႈၸၢႆး ၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းယၻဵတ်ႇ ( ပႃးတီႈ 9 ) ဢၼ် ၼွၼ်းၽႄးသဵင်ႈမုၼ်ၵႂႃႇ မိူဝ်ႈဝၼ်း တီႈ 13/10/2016 ။ ၽွင်းဢႃယုၸဝ်ႈလႆႈ 89 ပီ၊ ဢႃယုၽိသိၵ်ႈ ၶိုၼ်ႈႁၢင်ႈၸၢမ်ႇႁေႃၽွင်း ငမ်းဝၢၼ်ႈမိူင်း လႆႈ 70 ပီ ။
ၶိူဝ်းႁေႃၶမ်းၸၵ်ႇၵရီႊၼႆ့ ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 1 ပဵၼ် ၽရႃႊပၢတ်ႊသူမ်ႊ ၻဵတ်ႊၽရႃႊ ၽုတ့်ထယွတ်ႊၾႃ့ၸူႊလႃႊလူၵ်ႊမႁႃရၢၶျ်ႊ ၶိုၼ်ႈႁၢင်ႈႁေႃမိူဝ်ႈပီ 1782 ၊ ၶိူဝ်းႁေႃၶမ်းၸၵ်ႇၵရီႊၼႆ့ ၽွင်းငမ်းဝၢၼ်ႈမိူင်းထႆးမႃး မီးၶၢဝ်းတၢင်း 237 ပီ ယဝ့် ။
