ပလိၵ်ႈၾၢႆႇၶႄၾႆး ၸႄႈဝဵင်းသီႇပေႃႉ ၸတ်းႁဵတ်း ပၢင်ၵႅဝ်ႈၼႄၾၢင်ႁၢင်ႈ လၢႆးၶႄၾႆးလႄႈ ၶိူင်ႈၸႂ်ႉတိုဝ်း တႃႇႁူတ်းၾႆး မၢႆတွင်းဝၼ်းၸုမ်းၵႅတ်ႇၶႄၾႆးၼႂ်းမိူင်းမၢၼ်ႈ ၶွပ်ႈတဵမ် 73 ပီ။
ဝၼ်းတီႈ 05/05/2019 ယၢမ်းၵၢင်ဝၼ်း 10 မူင်း ထိုင် 11 မူင်းပၢႆ ယူႇတီႈ ၸုမ်းၵႅတ်ႇၶႄၾႆး သီႇပေႃႉ ၸတ်းႁဵတ်း ပၢင်ၵႅဝ်ႈ ၼႄၾၢင်ႁၢင်ႈလၢႆးၶႄၾႆးလႄႈ ၶိူင်ႈၸႂ်ႉတိုဝ်းတႃႇႁူတ်းၾႆး တီႈလုမ်းၵႅတ်ႇၶႄၾႆး ၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ။
ၸၢႆးလၢဝ်သႅင် ၵႅမ်ၸုမ်းၶႄၾႆး ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၾၢႆႇၸဝ်ႈၼႃႈတီႈၶဝ် ၼႄၵႂႃႇ လၢႆးႁႄႉၵင်ႈ ၾႆး၊ လၢႆးၵႅတ်ႇၶႄၾႆး၊ လၢႆးႁူတ်းၾႆး ၼႄၵႂႃႇၵူႈလွင်ႈလွင်ႈၶႃႈ။ ၼွၵ်ႈလိူဝ်ၼၼ်ႉ ၼႄပႃးၶိူင်ႈၸႂ်ႉတိုဝ်း လွင်ႈတႃႇတေၵႅတ်ႇ ၶႄၾႆး ၸဵမ်ၸိူဝ်းၼႆႉ။ လိူဝ်ၼၼ်ႉ သပ်းလႅင်းၼႄပႃး ၼင်ႇႁိုဝ် ၾႆးတေဢမ်ႇမႆႈၼၼ်ႉ တေလႆႈႁဵတ်းၸိူင်ႉႁိုဝ်” ဝႃႈၼႆ။
သိုပ်ႇလၢတ်ႈဝႃႈ “ ယွၼ်ႉဝႃႈ ၶၢဝ်းယၢမ်းၼႆႉ ၸၢင်ႈပဵၼ်ၾႆးမႆႈငၢႆႈ မိူၼ်ၼင်ႇ ၾႆးၾႃႉသျွတ်ႉဝႃႇ ၸဵမ်ၸိူဝ်းၼႆႉ။ မိူဝ်ႈၽွင်း ႁဝ်း တင်ႈၶဝ်ႈၽၵ်းဝႆႉ၊ တင်ႈၼမ်ႉဢုၼ်ႇဝႆႉႁႃႉ ၸိူဝ်းၼႆႉ ၾႆးၾႃႉသမ်ႉမွတ်ႇၵႂႃႇသေ ႁဝ်းလိုမ်းပိၵ်ႉၼဵၼ်ၾႆး၊ ၽိူဝ်ႇၾႆးမႃး ၸၢင်ႈသျွတ်ႉငၢႆႈ၊ ၼင်ႇႁိုဝ်တေဢမ်ႇပဵၼ်ၼၼ်ႉ လႆႈသပ်းလႅင်း ၼႄၵႂႃႇ ႁႂ်ႈၵူၼ်းမိူင်း ပေႃးတေ လႆႈဝႆႉၾၢင်ႉၵၼ်” ဝႃႈၼႆ။
ၼႂ်းပၢင်ၵႅဝ်ႈၼႆႉ မီးၵူၼ်းမိူင်း၊ ၽူႈတႅၼ်းသၽႃးသီႇပေႃႉ၊ ၽူႈတႅၼ်းသၽႃးၼမ်ႉသၼ်ႇ၊ ပႃႇတီႇၵၢၼ်မိူင်းလႄႈ ႁွင်ႈၵၢၼ် လူင်ပွင်ၸိုင်ႈ ၸိူဝ်းၼႆႉ ၶဝ်ႈႁူမ်ႈ 150 ပၢႆ ဝႃႈၼႆ။
ပေႃးထိုင်မႃး ဝၼ်းၸုမ်းၵႅတ်ႇၶႄၾႆးမိူင်းမၢၼ်ႈၸိုင် ၼႂ်းၸႄႈဝဵင်းသီႇပေႃႉၼႆႉ ယူႇတီႈၾၢႆႇပလိၵ်ႈၶႄၾႆးၶဝ် ၸတ်းႁဵတ်း မႃး ပၢင်ၵႅဝ်ႈ ၼႄၾၢင်ႁၢင်ႈလၢႆးၶႄၾႆးလႄႈ ၶိူင်ႈၸႂ်ႉတိုဝ်းတႃႇၶႄၾႆးမႃးၵူႈပီ ဝႃႈၼႆ။
