ၵေႃႁူမ်ႈသၢင်ႈၵူၼ်းၼုမ်ႇတႆး (Tai Youth Network) ပိုၼ်ၽၢဝ်ႇႁပ်ႉၵူၼ်းၼုမ်ႇ တႃႇၶဝ်ႈလဵပ်ႈႁဵၼ်း ပၢင်သွၼ်ယုၵ်ႉမုၼ်း/ ပူၵ်းပွင် ၼမ်ႉၵတ်ႉၽူႈဢွၼ်ႁူဝ် တႃႇၶၢဝ်းတၢင်း 2 လိူၼ် တေၸတ်းႁဵတ်းတီႈဝဵင်းလႃႈသဵဝ်ႈ ဝႃႈၼႆ။
ပၢင်သွၼ်ၼႆႉ TYN တေဢွၼ်ႁူဝ်ၸတ်းႁဵတ်း တင်ႈတႄႇ ဝၼ်းတီႈ 20 လိူၼ်မေႊ ထိုင် 20 လိူၼ်ၵျုၼ်ႊၵျုႊ 2019 တႃႇၶၢဝ်း တၢင်း 2 လိူၼ် (60 ဝၼ်း) ယူႇတီႈၵေႃႁူမ်ႈသၢင်ႈၵူၼ်းၼုမ်ႇတႆး ဢွၼ်ႁူဝ်သေ ၸတ်းႁဵတ်းၵႂႃႇ ဝႃႈၼႆ။
ၸၢႆးၼေႃႇသႅင် ၽူႈၸတ်းၵၢၼ်ပၢင်သွၼ် လၢတ်ႈတီႈၽူႈတွႆႇႁွၵ်ႈဝႃႈ “ ပၢင်သွၼ်ၼႆႉ ပဵၼ်ပၢင်သွၼ်ယုၵ်ႉမုၼ်း ၼမ်ႉၵတ်ႉ ၽူႈဢွၼ်ႁူဝ်ၵူၼ်းၼုမ်ႇ ယိူင်းဢၢၼ်း တႃႇၵိူတ်ႇဢွၵ်ႇထႅင်ႈ ၽူႈဢွၼ်ႁူဝ်ၵူၼ်းၼုမ်ႇဢၼ်မႂ်ႇထႅင်ႈၶႃႈ” ဝႃႈၼႆ။
သိုပ်ႇလၢတ်ႈဝႃႈ“ တေႃႈလဵဝ် ႁဝ်းၶႃႈ လႆႈႁပ်ႉသဵၼ်ႈမၢႆ ၵူၼ်းၼုမ်ႇၵမ်ႈၽွင်ႈၶႃႈယဝ်ႉ ဢၼ်ပၼ်သဵၼ်ႈမၢႆမႃး။ မိူၼ်ၼင်ႇ တၢင်းသီႇပေႃႉ၊ ၵေးသီးၵေႃႈ ပၼ်မႃးဝႆႉၵမ်ႈၽွင်ႈယဝ်ႉၶႃႈ။ ယွၼ်ႉဝႃႈ ႁဝ်းၶႃႈ တိုၵ်ႉလႆႈပိုၼ်ၽၢဝ်ႇ ၼႂ်းၶၢဝ်းတၢင်း 2-3 ဝၼ်းၼႆႉၵူၺ်းလႄႈ ယုမ်ႇယမ်ဝႃႈ တေမီးၵူၼ်းၼုမ်ႇႁဝ်း တေသူင်ႇသဵၼ်ႈမၢႆမႃးထႅင်ႈယူႇၶႃႈ။ တီႈပၢင်သွၼ်ၼႆႉ ႁဝ်းၶႃႈ တေႁပ်ႉ ၵူၼ်းၼုမ်ႇ တႃႇ 20 ၵေႃႉၶႃႈ” ဝႃႈၼႆ။
ပၢင်သွၼ်ယုၵ်ႉမုၼ်းၼမ်ႉၵတ်ႉၽူႈဢွၼ်ႁူဝ်ၵူၼ်းၼုမ်ႇ တႃႇၶၢဝ်းတၢင်း 2 လိူၼ်ၼႆႉ။ လွင်ႈၵိၼ်၊ လွင်ႈယႅမ်ႉ၊ လွင်ႈၵႂႃႇမႃး တီႈယူႇတၼ်းသဝ်းတႄႉ ယူႇတီႈၵေႃ ႁူမ်ႈသၢင်ႈၵူၼ်းၼုမ်ႇတႆး တေဢဝ်ပုၼ်ႈၽွၼ်းပၼ်မူတ်း ဝႃႈၼႆ။
လွင်ႈႁပ်ႉၵူၼ်းၼုမ်ႇ မႃးၶိုၼ်ႈပၢင်သွၼ်ယုၵ်ႉမုၼ်းၼမ်ႉၵတ်ႉၽူႈဢွၼ်ႁူဝ်ၵူၼ်းၼုမ်ႇၼႆႉသမ်ႉ တေလႆႈပဵၼ်ၵူၼ်းၼုမ်ႇ ၸိူဝ်းမေႃလၢတ်ႈ၊ မေႃတႅမ်ႈ၊ မေႃဢၢၼ်ႇ လိၵ်ႈတႆးလႄႈ လိၵ်ႈမၢၼ်ႈ၊ တေလႆႈပဵၼ်ၵူၼ်းႁူႉမေႃပွင်ႇၸႂ် ၽႃသႃဢိင်းၵလဵတ်ႈ ဢိတ်းဢွတ်း။ လိူဝ်ၼၼ်ႉ တေႁပ်ႉၵူၼ်းၼုမ်ႇ သႅၼ်းဢႃယု 16 ထိုင် 35 ပီ ၵူၼ်းၼုမ်ႇဢၼ်မႃးၶိုၼ်ႈႁွတ်ႈၼၼ်ႉ တေလႆႈ ပဵၼ် ၵူၼ်းၼုမ်ႇဢၼ်ၶဝ်ႈၸႂ် တူင်ႉၼိုင်ၼႂ်းတူင်ႇဝူင်း ၸိူဝ်းၼႆႉ။
ၼႂ်းပၢင်သွၼ် တႃႇၶၢဝ်းတၢင်းသွင်လိူၼ်ၼႆႉ တေပူင်သွၼ်ပၼ်ၵႂႃႇ ၵဵဝ်ႇလူၺ်ႈ လၢႆးဢွၼ်ႁူဝ် လႄႈ လၢႆးၵႄႈလိတ်ႈ လွင်ႈ ၶွင်ႈၶမ်ပၼ်ႁႃ၊ လွင်ႈငမ်းယဵၼ်၊ သၽႃႇဝ ၾိင်ႈတိုၼ်းပဵၼ် လႄႈ လိၼ်ႁႆႈၼႃး၊ သုၼ်ႇလႆႈသုၼ်ႇပဵၼ်ၵူၼ်း၊ ၶေႃႈပိုၼ်ၽၢဝ်ႇ ၸိုင်ႈမိူင်းလုမ်ႈၾႃႉ လွင်ႈလူၺ်ႈ ၵူၼ်းၼင်ႇၵၼ်တူၺ်းထိုင်ၵၼ်၊ သုၼ်ႇလႆႈသုၼ်ႇပဵၼ် ၸၢႆးယိင်းၽဵင်ႇပဵင်း၊ ပိူင်ၾႅတ်ႊၻ ရႄႊ၊ တီႇမူဝ်ႇၶရေႇၸီႇ လႄႈ ပိူင်ဢုပ်ႉပိူင်ႇ ၽွင်းငမ်းလီ၊ လၢႆးသူၼ်းႁူၺ်း သူၼ်းတုမ်၊ လၢႆးၸတ်းၵၢၼ်မုၵ်ႉၸုမ်း၊ ၵၢၼ် လုမ်း၊ ငဝ်ႈၶၢမ်ႇပိုၼ်ႉ လၢႆးၸတ်းၵၢၼ် ငိုၼ်းတွင်း၊ လွၵ်းလၢႆးတမ်းဝၢင်း ၽႅၼ်ၵၢၼ်၊ ငဝ်ႈၶၢမ်ႇပိုၼ်ႉ ၶွမ်ႊၽိဝ်ႊတိူဝ်ႊ၊ လၢႆး ဢွၼ်ႁူဝ် ဢုပ်ႇဢူဝ်း လႄႈ လၢႆးၵပ်းသိုပ်ႇတိတ်းတေႃႇ ၵူၼ်းမိူင်း ၸဵမ်ၸိူဝ်းၼႆ။
သင်ဝႃႈ မီးၽူႈလႂ်ၽႂ် သူၼ်ၸႂ် တႃႇၶဝ်ႈလဵပ်ႈႁဵၼ်း ပၢင်သွၼ် ၶၢဝ်းတၢင်းသွင်လိူၼ်ၼႆၸိုင် ၵပ်းသိုပ်ႇတိတ်းတေႃႇလႆႈတီႈ ၸၢႆးၼေႃႇသႅင် မၢႆၾူၼ်း 09-776799803၊ ၸၢႆးၶုၼ်သႅင် မၢႆၾူၼ်း 09- 790718355၊ မၢႆၾူၼ်းလုမ်း 09- 402278589 လႆႈယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ