RCSS ဢွၵ်ႇၶေႃႈပိုၼ်ၽၢဝ်ႇ ယိၼ်းလီႁပ်ႉတွၼ်ႈ ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ(တပ်ႉမတေႃႇ) သိုပ်ႇယိုတ်ႈၶၢဝ်း ယၢမ်း ၵိုတ်းတိုၵ်းထႅင်ႈ 2 လိူၼ် (တႃႇၶၢဝ်းတၢင်း 60 ဝၼ်း) ဝႃႈၼႆ။

ဝၼ်းတီႈ 02/05/2019 ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢွၵ်ႇၶေႃႈပိုၼ်ၽၢဝ်ႇ ၵဵဝ်ႇ လူၺ်ႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇသိုပ်ႇယိုတ်ႈၶၢဝ်းယၢမ်းၵိုတ်းတိုၵ်းၵႂႃႇထႅင်ႈ 2 လိူၼ်။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ လုမ်းၵပ်းသၢၼ် RCSS တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်သိုၵ်း မၢၼ်ႈၶဝ် ပိုၼ်ၽၢဝ်ႇဝႃႈ ၵိုတ်းသိုၵ်းတိူဝ်းမႃးထႅင်ႈ 2 လိူၼ်ၼၼ်ႉ တၢင်းႁဝ်းၶႃႈ ယိၼ်းလီႁပ်ႉတွၼ်ႈယူႇ။ ၵၢၼ်ပၢႆးမိူင်း ဢၼ်တေသိုပ်ႇၵႂႃႇထႅင်ႈတၢင်းၼႃႈၼႆႉ မၼ်းယဝ်ႉတီႈၵၢၼ်ဢုပ်ႇဢူဝ်းၵၼ်ၵူၺ်း။ တီႈတႄႉမၼ်း မၼ်းဢမ်ႇၸႂ်ႈဝႃႈ တႃႇ 2 လိူၼ်ၵူၺ်း တၢင်းလီၸႂ်ဝႃႈ ပဵၼ်ၶၢဝ်းယၢဝ်းၼႆ ယိင်ႈၶႅၼ်းလီ။ ယၢဝ်းလႆႈၵႃႈႁိုဝ်ၵေႃႈ လီလႆႈၵႃႈၼၼ်ႉ လွင်ႈဢၼ်ၵိုတ်း တိုၵ်းၵၼ်ၼႆႉ” ဝႃႈၼႆ။

ၶေႃႈပိုၼ်ၽၢဝ်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢွၵ်ႇဝႆႉၼၼ်ႉ တင်းမူတ်း မီး 4 ၶေႃႈ။ ၶွင်ႇသီႇဢဝ်ၶိုၼ်းၸိုင်ႈတႆး (RCSS) ယိၼ်းလီႁပ်ႉတွၼ်ႈၶေႃႈပိုၼ်ၽၢဝ်ႇ လုမ်းၽူႈပွင်ၵၢၼ်ၾၢႆႇၵႅတ်ႇၶႄ ဢၼ်ဝႃႈတိူဝ်း ယိုတ်ႈၶၢဝ်းယၢမ်းၵိုတ်းတိုၵ်းထႅင်ႈ 2 လိူၼ် (တေႃႇထိုင် 30 June 2019) ၼႂ်းတိူင်းသိုၵ်း 5 တိူင်း။

ၶၢဝ်းတၢင်း 4 လိူၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ NRPC လႄႈ ၾၢႆႇတပ်ႉမတေႃႇၶဝ်ပိၼ်ႇပၢႆႇဢုပ်ႇဢူဝ်းၵၼ်မႃး လၢႆပွၵ်ႈ လၢႆၵမ်းၼၼ်ႉ ပဵၼ်လွင်ႈၵမ်ႉၸွႆႈ လွင်ႈငမ်းယဵၼ်လႄႈ လွင်ႈပိၼ်ႇပၢႆႇယုမ်ႇယမ်တေႃႇၵၼ်ၼၼ်ႉတႄႉတႄႉဝႃႈဝႃႈ။

ၶၢဝ်းတၢင်း 2 လိူၼ် ဢၼ်လႆႈတိူဝ်းယိုတ်ႈ ၵၢၼ်တူင်ႉၼိုင်ၵၢၼ်သိုၵ်းၼႆႉ ၸၢင်ႈပဵၼ်ၶၢဝ်းယၢမ်းတႃႇၵူႈၸုမ်းပွင်သၢင်ႈ လွင်ႈငမ်းယဵၼ် ႁႂ်ႈထိုင်တီႈယိူင်းမၢႆ။

ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး RCSS တေႁူမ်ႈမိုဝ်းတင်းၵူႈမူႇၵူႈၸုမ်းသေ ႁဵတ်းသၢင်ႈၵႂႃႇ။ တႃႇၵေႃႇသၢင်ႈမိူင်းႁူမ်ႈ တုမ်၊ တႃႇသၢင်ႈလွင်ႈငမ်းယဵၼ်ႁႂ်ႈထိုင်တီႈ ၸဵမ်ၸိူဝ်းၼႆႉ။

တိူင်းသိုၵ်း ဢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ၵိုတ်းတိုၵ်းမႃးၼၼ်ႉ ပဵၼ်တိူင်းသိုၵ်း ၸဵင်ႇႁွင်ႇဝၼ်းဢွၵ်ႇ၊ တိူင်းသိုၵ်း ပွတ်းႁွင်ႇ၊ တိူင်းသိုၵ်းဝၼ်းဢွၵ်ႇၵၢင်၊ တိူင်းသိုၵ်းဝၼ်းဢွၵ်ႇလႄႈ တိူင်းသိုၵ်းသၢမ်ၸဵင်ႇ ၸိူဝ်းၼႆႉ။