ၸဝ်ႈပေႃႈသိလ်ထမ်းဝုၼ်းၸုမ့် သင်ႇလၢတ်ႈဝႃႈ ၼႂ်းၶၢဝ်းတၢင်း 3 လိူၼ်ၼိုင်ႈပွၵ်ႈ ႁႂ်ႈသင်ၶၸဝ်ႈလွတ်ႈႁေႃးဝၢၼ်း ပရိတ်ႈ၊ ၼႃႈထမ်ႈမိူင်းၵႅတ်ႇတီႈၸဝ်ႈၵမ်ထမ်း ၽႃဝၼႃ၊ ႁႂ်ႈတၵ့်ၵႃႇသတ့်ထႃးသူင်ႇၶဝ်ႈ၊ ၼမ့်၊ တၢင်းၵိၼ် 1 လိူၼ် 1 ပွၵ်ႈ ဝႃႈၼႆ ။

ဝၼ်းတီႈ 28/04/2019 ၸဝ်ႈပေႃႈသိလ်ထမ်းဝုၼ်းၸုမ့် ယေႃးတူဝ်ၶဝ်ႈတိုဝ်းၵမ်သိလ်ထမ်း တီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ  ၸိုင်ႈတႆးပွတ်းဢွၵ်ႇ ၊ ၽွင်းမၼ်းၸဝ်ႈတေၶဝ်ႈတိုဝ်းၵမ်ၼၼ့် သင်ႇလၢတ်ႈဝႆ့ဝႃႈ – ၼႂ်းၶၢဝ်းတၢင်း 3 ပီ 3 လိူၼ် 3 ဝၼ်း ၼႆ့ ႁႂ်ႈသင်ၶၸဝ်ႈ ဢွၼ်ၵၼ်လွတ်ႈႁေႃး ဝၢၼ်းပရိတ်ႈၼႃႈထမ်ႈ သၢမ်လိူၼ် လႂ်ၼိုင်ႈပွၵ်ႈ။

ၸဝ်ႈသုၶမ်း တၢင့်ယၢၼ်း တႅမ်ႈဝႆ့တီႈ FB မၼ်းၸဝ်ႈဝႃႈ –  ၽွင်းၶၢဝ်းၸဝ်ႈပေႃႈသိလ်ထမ်းဝုၼ်းၸုမ့် တိုဝ်းၵမ် ၼႂ်းထမ်ႈၼၼ့် ၽိတ်ႈမွၵ်ႇထိုင်သင်ၶၸဝ်ႈၵူႈတီႈ မႃးႁူမ်ႈၵၼ်လွတ်ႈႁေႃးဝၢၼ်းပရိတ်ႈ၊ တႃႇသူင်ႇမၢၵ်ႇၶဝ်ႈတဝ်ႈ ၼမ့်ၼၼ့် ႁႂ်ႈၽူႈမီးပုၼ်ႈၽွၼ်းသူင်ႇပၼ်ၼိုင်ႈလိူၼ်လႂ်ၼိုင်ႈပွၵ်ႈ ၽူႈဢၼ်ဢမ်ႇၵဵဝ်ႇၶွင်ႈတေဢမ်ႇလႆႈၵႂႃႇ၊ ပေႃးၸဝ်ႈမီးသင်တေၶႂ်ႈမွၵ်ႇလၢတ်ႈၼႆ တေတႅမ်ႈလိၵ်ႈဝႆ့ပၼ်တီႈၵႂႃႇသူင်ႇမၢၵ်ႇမႆ့တၢင်းၵိၼ်ၼၼ့်၊ လိၵ်ႈပွမ်ဢၼ်ဝႃႈ ၸဝ်ႈဝုၼ်းၸုမ့်ၼွၼ်းၾၼ် ႁႂ်ႈသိုပ်ႇသူင်ႇပၼ်ၵၼ်ဢၼ်ဝႃႈၸိူဝ်းၼၼ့်  တိုၼ်းဢမ်ႇၸႂ်ႈလွင်ႈတႄ့မၼ်းလႃးလႃး၊ ၼင်ႇႁိုဝ်တေမီးၵႂႃႇမႃးငၢႆႈလူမ်တီႈထမ်ႈမိူင်းၵႅတ်ႇၼၼ့်  ယူႇတီႈသင်ၶၸဝ်ႈတုၵ်းယွၼ်း ႁႂ်ႈလူင်ပွင်ၸိုင်ႈ သိူဝ်ႇပၼ် သဵၼ်ႈတၢင်း ၸဵမ်ၸိူဝ်းၼႆ့။

ၸဝ်ႈၶူးပၺႃၽေႃးၵ ၸၼ့်ၸွမ်ပုတ့်ထ ဝဵင်းလူင်တူၼ်ႈတီးၵေႃႈယၢမ်ႈလၢတ်ႈတီႈ ၽူႈတွႆႇႁွၵ်ႈဝႃႈ – “ ၵူႈတီႈတီႈ ၸဵမ်ၼွၵ်ႈ မိူင်းၼႂ်းမိူင်း ဢၼ်ၶႂ်ႈယႃ့ၸိုဝ်ႈသဵင်ၶူးဝႃးၸဝ်ႈ မီးၼမ်ၼႃႇလႄႈ တေလၢတ်ႈသင် ၊ တေတႅမ်ႈသင်၊ ၵဵဝ်ႇၵပ်းၸဝ်ႈ ႁႂ်ႈဝူၼ့် ထတ်းတူၺ်းလီလီၵွၼ်ႇ ” ဝႃႈၼႆ။

ၸဝ်ႈၺႃႇၼသီရိ (ၸဝ်ႈသီရိဢွၼ်ႇ) လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၼႂ်းသင်ၶမိူင်းတႆး မိူင်းႁူမ်ႈတုမ် ဢၼ်တိုဝ်းၵမ်လႆႈ မိူၼ်ၸဝ်ႈႁဝ်းၼႆ့ ပႆႇႁၼ်မီးၽႂ် ၵွပ်ႈၼၼ်လႄႈ ၼႂ်းတႆးႁဝ်းၼႆ့ မီးၸဝ်ႈဢၼ်တိုဝ်းၵမ်လီ ၸိူင်ႉၼႆ ပဵၼ်ဢၼ်လီဢဝ်ၵုင်ႇ မုၼ်ႁူမ်ၸူမ်းတႄ့ ” ဝႃႈၼႆ။

ၸဝ်ႈပေႃႈသိလ်ထမ်းဝုၼ်းၸုမ်ႉၼႆ့ တင်ႈတႄႇဝႃသႃၸဝ်ႈလႆႈ 26 ၼၼ်ႉ တိုဝ်းၵမ်သိလ် ၼႂ်းထမ်ႈၽွင်းၶၢဝ်းၼႂ်းဝႃႇ မႃးတေႃႇထိုင်ယၢမ်းလဵဝ် ၊ မိူဝ်ႈပီ2010/04/18 ၶဝ်ႈတိုဝ်းၵမ်သိလ်ၼႂ်းထမ်ႈရၢတ်ႉၶျၶိုၵ်ႊ ဢိူင်ႇဝၢၼ်ႈဢွၼ်ႉ ၸႄႈဝဵင်းငၢဝ်း ၸႄႈတွၼ်ႈလမ်းပၢင်း ( ถ้ำราชคฤห์ บ้านแม่แก้ หมู่ที่5 ตำบลบ้านอ้อน อำเภองาว จังหวัดลำปาง) တႃႇၶၢဝ်းတၢင်း 3 ပီ 3လိူၼ် 3 ဝၼ်း မၼ်းၸဝ်ႈဢွၵ်ႇထမ်ႈမိူဝ်ႈဝၼ်းတီႈ 21/07/2013။ ဝၢႆးဢွၵ်ႇထမ်ႈ ယဝ်ႉ ဢွၵ်ႇၶၢဝ်းတၢင်းပိုၼ်ၽႄႈ သႃသၼႃ မိူင်းတႆး၊ မိူင်းမၢၼ်ႈ၊ မိူင်းထႆး၊ မိူင်းပူႊတၢၼ်ႊ၊ မိူင်းသိင်ႇၶပူဝ်ႊ၊ မိူင်းမလေႊသျိူဝ်ႊ ၸိူဝ်းၼႆ့သေ ၶဝ်ႈတိုဝ်း ၵမ်သိလ်ၼႂ်းထမ်ႈၶိုၼ်း တႃႇၶၢဝ်းတၢင်း 3 ပီ 3လိူၼ် 3 ဝၼ်း တီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸႄႈတွၼ်ႈမိူင်းသၢတ်ႇ ။