ၾၢႆႇပၢႆးယူႇလီၾၢင့် ႁႂ်ႈၵူၼ်းမိူင်းၾၢင့်ယူႇၾၢင့်ၵိၼ် ၽွင်းၶၢဝ်းမႆႈ

ၶၢဝ်းမႆႈပီ 2019 ၼႆ့ မိူင်းႁူမ်ႈတုမ်မၢၼ်ႈ ပဵၼ်မိူင်းဢၼ်ႁႅင်းလူမ်းမႆႈသုင်သုတ်း ၼႂ်းၸဵင်ႇၸၢၼ်းဝၼ်းဢွၵ်ႇ ၵုၼ်ၶဵဝ် ဢေးသျိူဝ်ႊ။ ၾၢႆႇပၢႆးယူႇလီၵေႃႈ ၾၢင့်တိူၼ်ႁႂ်ႈၵူၼ်းမိူင်းၾၢင့်ယူႇၵိၼ် ၵႂႃႇမႃး။

ဝၼ်းတီႈ 25/04/2019 ၸၢႆးယီႈလူၼ်း မေႃယႃ ၾၢႆႇၵပ်းသၢၼ် တီႈႁူင်းယႃမိူင်းၵွၵ်ႇတီႈၼိုင်ႈ မွၵ်ႇလၢတ်ႈၾၢင့် ထိုင်ၵူၼ်းဝၢၼ်ႈၵူၼ်းမိူင်း ၸဵမ်လဵၵ့်ယႂ်ႇၼုမ်ႇထဝ်ႈယူႇမိူင်းထႆးၵေႃႈလီ ၊ မိူင်းတႆးၵေႃႈယဝ့်- ၽွင်းၶၢဝ်းမႆႈၼႆ့ယွၼ်း ႁႂ်ႈပီႈၼွင့်ႁဝ်းၶႃႈ ဢွၼ်ၵၼ်ဝႆ့ၾၢင့်သတိ ယွၼ့်ဝႃႈမၼ်းမႆႈႁႅင်းၼႃႇ ဢၼ်လီတိူဝ်းဝႆ့ၾၢင့်သတိၼႆ့သမ့် မိူၼ်ၼင်ႇ ၵူၼ်းဢႃယုယႂ်ႇ၊ ၵူၼ်းထဝ်ႈ၊ လုၵ်ႈဢွၼ်ႇ၊ ၵူၼ်းမီးတၢင်းပဵၼ်လိူတ်ႈသုင်လႄႈ ၵူၼ်းပီးၸိူဝ်းၼႆ့။ ပေႃးတေဢွၵ်ႇလႅတ်ႇၼႆ ႁႂ်ႈတႃးၶရိမ်ႊႁႄ့လႅတ်ႇ၊ ၵင်ႈၸွင်ႈ၊ တိုဝ်းမၢၵ်ႇႁူဝ်၊ တိုဝ်းမၢၼ်ႇတႃႁႄ့လႅတ်ႇ၊ ပေႃးပဵၼ်လႆႈႁႂ်ႈငိူင့်ဝႄႈ ၵၢၼ်ဢွၵ်ႇလႅတ်ႇ၊ တၢင်ႇလႅတ်ႇ ၸိူဝ်းၼႆ့ ဝႃႈၼႆ။

ပီၼႆ့တီႈဝဵင်းတူၼ်ႈတီး ဢၼ်မီးၼိူဝ်ၼႃႈၼမ့်ပၢင်ႇလၢႆႇ သုင် 4000 – 5000 ထတ်းၼၼ့်ၵေႃႈ မႆႈလိူဝ်ၵူႈပီပီထိုင်တီႈလႆႈပိုတ်ႇၽတ့်လူမ်းဝႃႈၼႆ။

ၸၢႆးယီႈလူၼ်း သိုပ်ႇလၢတ်ႈထႅင်ႈဝႃႈ “ ပီၼႆ့တေလႆႈဝႃႈ မႆႈႁႅင်းဝႆ့ၶႃႈဢေႃႈ ၵူႈမိူင်းမိူင်းယဝ့် ၵွပ်ႈၼၼ်လႄႈ ႁဝ်းၶႃႈ ထုၵ်ႇလီဢွၼ်ၵၼ် ဝႆ့ၾၢင့်သတိၼမ်ၼမ်ဢေႃႈ ပီႈၼွင့်ႁဝ်းၸိူဝ်းလႆႈၸႂ်ၵိၼ်လဝ်ႈၼၼ့် ႁႂ်ႈတိူဝ်းဝႆ့သတိ ယွၼ့်ဝႃႈ ၾိင်ႈၾႃ့ၼႆ့ မၼ်းမႆႈယူႇယဝ့်သမ့်မႃးၵိၼ်လဝ်ႈထႅင်ႈၼႆတႄ့ တေႁဵတ်းႁႂ်ႈၸႂ်သၼ်ႇ၊ ႁိူဝ်ႇဢွၵ်ႇ၊ ႁူဝ်မဝ်းသေ ၸၢင်ႈပိၼ်ႈလူ့မ် ထိုင်တီႈလိုမ်းတူဝ် ဢမ်ႇသၢင်ႇထုၵ်ႇၸၢင်ႈထိုင်သၢႆၸႂ်လႆႈၵွပ်ႈၼၼ်လႄႈ ႁႂ်ႈၾၢင့်သတိပေႃးပဵၼ် လႆႈႁႂ်ႈငိူင့်လွင်ႈၵိၼ်လဝ်ႈ” ဝႃႈၼႆ။

 ၸိူင့်ၼၼ်ၼင်ႇၵဝ်ႇ ႁွင်ႈၵၢၼ်ၾၢႆႇပၢႆးယူႇလီမိူင်းထႆးၵေႃႈ ဢွၵ်ႇၾၢင့်သတိထိုင်ၵူၼ်းဝၢၼ်ႈၵူၼ်းမိူင်းဝႃႈ ၽွင်းၶၢဝ်းမႆႈၼႆ့ ၵူၼ်းဝၢၼ်ႈၵူၼ်းမိူင်းထုၵ်ႇလီဢွၼ်ၵၼ်ဝႆ့ၾၢင့်သတိတၢင်းပဵၼ် (Heat stroke ) ပေႃးပဵၼ်ယဝ့်တေမီးၾၢင်ႁၢင်ႈ တႃလပ်းသိင်ႇ၊ ၸႂ်သၼ်ႇ၊ ထူၺ်ၸႂ်ဝႆး၊ ႁူဝ်ၸႂ်တဵၼ်ႈဝႆး၊လိုမ်းတူဝ် ထိုင်တီႈၸၢင်ႈလူ့တၢႆလႆႈ ၵွပ်ႈၼၼ်ႁႂ်ႈဢွၼ်ၵၼ်ငိူင့်ဝႄႈၵၢၼ်ၵိၼ်လဝ်ႈ လႄႈတၢၵ်ႇလႅတ်ႇ ၼႆယဝ့် ။

ၾၢႆႇၾိင်ႈၾႃ့မိူင်းမၢၼ်ႈတႄ့ပိုၼ်ၽၢဝ်ႇဝႃႈ ပဵၼ်ယွၼ့်ပႃႇမႆ့မူၺ့်၊ ဢမ်ႇႁူမ်ႈၵၼ်ႁၵ့်သႃ သိင်ႇဝႅတ့်လွမ့်လႄႈ ၸင်ႇလႆႈပဵၼ်ၾိင်ႈၾႃ့လႅၵ်ႈလၢႆႈလိူဝ်ႁႅင်း ဝႃႈၼႆ။