RCSS သူင်ႇၽိုၼ်လိၵ်ႈဢဝ်ၵုင်ႇမုၼ် ၼႂ်းဝၼ်းၵိူတ်ႇ SSA ၶွပ်ႈတဵမ် 55 ပီ

RCSS/SSA ယိုၼ်ႈလိၵ်ႈဢဝ်ၵုင်ႇမုၼ်ၸွမ်း SSA ဢၼ်လႆႈၵေႃႇတင်ႈမႃး ၶွပ်ႈတဵမ် 55 ပီ။ ပႃးဝႆႉဝႃႈ သွင်တပ်ႉသိုၵ်းတႆး တေသၢင်ႈလွင်ႈၽွမ်ႉႁူမ်ႈၼင်ႇယိူင်းဢၢၼ်း သင်ၶၸဝ်ႈလႄႈ ၵူၼ်းမိူင်း ဝႃႈၼႆ။

ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ယိုၼ်ႈၽိုၼ်လိၵ်ႈ ဢဝ်ၵုင်ႇမုၼ် ထိုင်ၼႂ်းဝၼ်းၵိူတ်ႇ တပ်ႉသိုၵ်းၸိုင်ႈတႆး ၶွပ်ႈတဵမ် 55 ပီ ဢၼ်ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၼ်ၸတ်းႁဵတ်းတီႈ ငဝ်ႈငုၼ်းဝၢၼ်ႈႁႆး ဝႃႈၼႆ။

ၼႂ်းၽိုၼ်လိၵ်ႈ ဢၼ်ၶွင်ႇသီႇဢဝ်ၶိုၼ်းၸိုင်ႈတႆး ယိုၼ်ႈထိုင် ၼႂ်းဝၼ်းၵိူတ်ႇ တပ်ႉသိုၵ်းၸိုင်ႈတႆး ၶွပ်ႈတဵမ် 55 ပီၼၼ်ႉ တင်းမူတ်း မီး 3 ၶေႃႈ။ ၼႂ်းၼၼ်ႉ ၼႂ်းၶေႃႈတီႈ 3 တႅမ်ႈဝႆႉဝႃႈ ပုၼ်ႈတႃႇ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈၸိုင်ႈတႆး၊ ၵၢၼ်ပိၼ်ႇ ပၢႆႇၸွႆႈထႅမ်ၵၼ်၊ ၵၢၼ်ပူၵ်းပွင်၊ ၵၢၼ်ၵေႃႇတင်ႈ မိူင်းႁူမ်ႈတုမ်ၾႅတ်ႊတရႄႊ ပုၼ်ႈတႃႇႁႂ်ႈၸဵဝ်းထိုင် ၶေႃႈယိူင်းဢၢၼ်းလူင် ဢၼ်ၸဝ်ႈသင်ၶ ပေႃႈမႄႈၵူၼ်းမိူင်း တုၵ်းယွၼ်းၼၼ်ႉ ပုၼ်ႈတႃႇၶေႃႈမုင်ႈမွင်း ၸိူဝ်ႉၸၢတ်ႈတႆး တေၸဵဝ်းပဵၼ်မႃးၼၼ်ႉ တေႁူမ်ႈၵၼ် ၵေႃႇသၢင်ႈၵၢၼ်ၽွမ်ႉႁူမ်ႈၵႂႃႇ ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ 2 RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ပႃးဝႆႉ ၼႂ်းၶေႃႈတီႈ 3 ၼၼ်ႉ ပုၼ်ႈတႃႇ ၵၢၼ်ၽွမ်ႉႁူမ်ႈၸိူဝ်ႉၸၢတ်ႈၸိုင်ႈတႆး၊ ၵၢၼ်ပိၼ်ႇပၢႆႇၸွႆႈထႅမ်ၵၼ်၊ ၵၢၼ်ပူၵ်းပွင်၊ ၵၢၼ်ၵေႃႇတင်ႈ မိူင်းႁူမ်ႈတုမ် ၾႅတ်ႊတရႄႊၼၼ်ႉ တေႁူမ်ႈၵၼ်သေႁဵတ်းသၢင်ႈၵႂႃႇ ဢၼ်ၼႆႉၶေႃႈၼိုင်ႈ။ ထႅင်ႈၶေႃႈၼိုင်ႈတႄႉ ဢၼ်သင်ၶၸဝ်ႈလႄႈ ၵူၼ်း မိူင်းမုင်ႈမွင်းၼၼ်ႉ ႁဝ်းၶႃႈ တင်းသွင်ၾၢႆႇ တေႁဵတ်းသၢင်ႈၵႂႃႇ ၽႂ်းၽႂ်းသေ ႁႂ်ႈပေႃးႁွတ်ႈထိုင်တီႈယိူင်းမၢႆ” ဝႃႈၼႆ။

ၸဝ်ႈသိုၵ်း ၸၢႆးသူႉ ၽူႈၶၢၼ်ပၢၵ်ႇၵေႃႈ လၢတ်ႈတီႈသင်ၶၸဝ်ႈလႄႈ ပေႃႈမႄႈၵူၼ်းမိူင်းဝႃႈ ၼင်ႇႁိုဝ် တေၵိုတ်းတိုၵ်းတေႃႇ ၵၼ်လႆႈၼၼ်ႉ တပ်ႉသိုၵ်းတႆးတင်း 2 ၾၢႆႇ လႆႈထွႆထွၼ်ဢွၵ်ႇပိုၼ်ႉတီႈႁင်းၽႂ်မၼ်းယဝ်ႉ ဝႃႈၼႆ။

ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းလူင် ၸၢႆးငိုၼ်း လၢတ်ႈဝႃႈ “ မိူၼ်ဢၼ်လၢတ်ႈၵႂႃႇတီႈၼႂ်းပၢင်ၵႅဝ်ႈၼၼ်ႉၶႃႈယဝ်ႉ တပ်ႉသိုၵ်း 2 တပ်ႉ လႆႈထွႆထွၼ်တင်း 2 ၶႃႈယဝ်ႉ။ လႆႈဢုပ်ႇဢူဝ်းငူပ်ႉငီႉၵၼ်မႃးၶႃႈယဝ်ႉ။ ဝၢႆးလင် ဝၼ်းတီႈ 20 ၼႆႉမႃး တင်းသွင်ၾၢႆႇ ဢမ်ႇမီးလွင်ႈပိုတ်းယိုဝ်းၵၼ်ယဝ်ႉ လႆႈၵိုတ်းယိုဝ်းၵၼ်ယဝ်ႉ” ဝႃႈၼႆ။

ၼႂ်းႁူဝ်ပီၼႆႉမႃး တပ်ႉသိုၵ်း SSPP တင်း RCSS လႆႈပဵၼ်ပၢင်တိုၵ်းၵၼ် ၵဵဝ်ႇလူၺ်း ႁိမ်ၼႃႈတီႈၵၼ်သေ ၵူၼ်းမိူင်းၼပ်ႉ ႁူဝ်ႁဵင် လႆႈဢွၼ်ၵၼ်ပၢႆႈယၢၼ်ႁိူၼ်းတီႈယူႇတၼ်းသဝ်းၽႂ်မၼ်း။ တေႃႈလဵဝ် ပၢင်တိုၵ်းၼိမ်သဝ်းယဝ်ႉၼႆလႄႈ ၵူၼ်းမိူင်း လႆႈဢွၼ် ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းမူတ်းယဝ်ႉ ဝႃႈၼႆ။