ၵူၼ်းႁဵတ်းၵၢၼ်ၼႂ်းၶူင်ႇႁိူဝ်းမိၼ် ၼႂ်းၸိုင်ႈတႆး ၵဵပ်းငိုၼ်းတီႈၵူၼ်းဢွၵ်ႇၶၢဝ်းတၢင်းလိူဝ်ႁႅင်း

ၵူၼ်းႁဵတ်းၵၢၼ် ၼႂ်းဝၢင်းႁိူဝ်းမိၼ် တႃႈၶီႈလဵၵ်း တင်း လႃႈသဵဝ်ႈ ၵဵပ်းငိုၼ်း တီႈၵူၼ်းဢွၵ်ႇတႃႈပႆတၢင်း လိူဝ်ႁႅင်း၊ ၵူၼ်းဢွၵ်ႇတႃႈပႆတၢင်း ထူပ်းတၢင်းယၢပ်ႇၽိုတ်ႇ။

ၸၢႆးယွတ်ႈ ၵူၼ်းဢွၵ်ႇတၢင်း လုၵ်ႉလႃႈသဵဝ်ႈ-တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ တီႈဝၢင်းႁိူဝ်းမိၼ် လႃႈသဵဝ်ႈၼၼ်ႉ ၵူၼ်းႁဵတ်းၵၢၼ်ၶဝ် ယွၼ်းငိုၼ်းၵႃႈတေႃႉထူင်ၶူဝ်း ၼိုင်ႈထူင်လႂ် ၼိုင်ႈႁဵင်ပျႃး။ ယဝ်ႉၵေႃႈ လႆႈသဵင်ႈထႅင်ႈ တီႈၶိူင်ႈၸၢၵ်ႈ ၵူတ်ႇထတ်း Security Scan ထႅင်ႈ ၼိုင်ႈၵေႃႉလႂ် ၼိုင်ႈႁဵင်ပျႃး။ ႁဝ်းသွင်ၵေႃႉၽူဝ်မေးလႆႈပၼ် တင်းမူတ်း 4 ႁဵင်ပျႃး။ လိူဝ်ၼၼ်ႉ လႆႈမႃး ပၼ်တီႈဝၢင်းႁိူဝ်းမိၼ် တႃႈၶီႈလဵၵ်း မိူဝ်ႈၽွင်းၵႂႃႇလိူၵ်ႈဢဝ်ထူင်ၶူဝ်းၼၼ်ႉ ၶဝ်ယွၼ်းၶႃႈႁဝ်းထႅင်ႈ 1 ႁဵင်ပျႃး” ဝႃႈၼႆ။

လွင်ႈဝႃႈၵၢၼ်ၵဵပ်းငိုၼ်းၼႆႉ ဢမ်ႇၼမ်ၼႆသေတႃႉၵေႃႈ ဢၼ်ၶဝ်ယွၼ်းၼၼ်ႉ မၼ်းဢမ်ႇၶဝ်ႈပဵၼ် တၢင်းၵၢၼ် ၵဵဝ်ႇၵပ်း လွင်ႈၼႆႉ ၶႂ်ႈႁႂ်ႈၽူႈမီးပုၼ်ႈၽွၼ်းၶဝ် လူင်းၵူတ်ႇထတ်း ပၼ်သေၵမ်း ၸၢႆးယွတ်ႈ တုၵ်းယွၼ်းၼင်ႇၼႆ။

ၼၢင်းမျႃႉ ႁႅင်းၵၢၼ်ယၢၼ်မိူင်း ဢၼ်လုၵ်ႉမိူင်းထႆးတေမိူဝ်းမိူင်းထႆး လၢတ်ႈဝႃႈ “ ၶဝ်ဝႃႈ ၵူၼ်းမိူင်းတေဢမ်ႇႁူႉသင်သေ သႂ်ႇႁူဝ်ၶေႃႈ သေဢၼ်ဢၼ်သေ ၵဵပ်းငိုၼ်း။ ထူင်ၶူဝ်း မၢင်ဢၼ် ထူင်လဵၵ်ႉလဵၵ်ႉဢွၼ်ႇၵူၺ်းၵေႃႈ ၶဝ်ၵဵပ်း။ ပေႃးပဵၼ် ၼွၵ်ႈမိူင်းတႄႉ ပိူၼ်ႈတေၵဵပ်း တီႈၸင်ႈၼမ်ႉၼၵ်းၶူဝ်းၶွင်ႁဝ်း သင်မၼ်းလိူဝ်ၼႆၵေႃႈ ႁဝ်းၶႃႈ တေလႆႈပၼ်ငိုၼ်းၼၼ်ႉ ၵူၺ်း။ ၵူၺ်းၵႃႈ ၼႂ်းမိူင်းတႆးႁဝ်းၶႃႈတႄႉ လႆႈပၼ်ၵူႈဢၼ်ၶႃႈယဝ်ႉ။ ၼိုင်ႈတီႈလႂ် လႆႈပၼ် ၼိုင်ႈႁဵင်ပျႃး၊ ၼိုင်ႈဝၼ်းလႂ် ၵူၼ်းၵႂႃႇမႃး ၼပ်ႉႁူဝ်ပၢၵ်ႇၵေႃႉ ၶဝ်တေလႆႈငိုၼ်းၼမ်ၵႃႈႁိုဝ်။ လွင်ႈပၼ်ႁႃၼႆႉ ၸဝ်ႈၼႃႈတီႈၶဝ် ႁူႉယူႇလႄႈ ပွႆႇပၼ်မၼ်း ႁဵတ်းၵႂႃႇႁႃႉၵေႃႈဢမ်ႇႁူႉ။ ၵဵဝ်ႇၵပ်းလွင်ႈၼႆႉ သင်ပဵၼ်လႆႈ ၶႂ်ႈႁႂ်ႈမီးလွင်ႈၵူတ်ႇ ထတ်းဢဝ်လိူင်ႈယူႇ”ဝႃႈၼႆ။

ၼၢင်းၶျႄႇရီႇ ၵူၼ်းၶၢႆ ဝႂ်ၶိူင်ႈမိၼ် တီႈတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ တီႈတႄႉမၼ်း ၼႂ်းဝႂ်ၶိူင်ႈမိၼ်ၼၼ်ႉ မၼ်း ပေႃးပႃးၶွၼ်ႇဝႆႉမူတ်းယဝ်ႉၶႃႈ။ ဢမ်ႇလူဝ်ႇလႆႈပၼ်တီႈလႂ်ထႅင်ႈယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ ယူႇတီႈၵူၼ်းဢွၵ်ႇတႃႈပႆတၢင်းၶဝ် မိူဝ်ႈသိုဝ်ႉဝႂ်ၶိူင်ႈမိၼ်ၼၼ်ႉ ပေႃးသႂ်ႇပႃးၶွၼ်ႇတီႈလူင်ပွင်ၸိုင်ႈယဝ်ႉ။ ၵဵဝ်ႇလူၺ်ႈလွင်ႈ ၵၢၼ်ၵဵပ်းငိုၼ်း တီႈၼႂ်းဝၢင်းႁိူဝ်းမိၼ်ၼၼ်ႉ မၼ်းယူႇတီႈၽူႈမီးၸၼ်ႉၶဝ်ၵူၺ်း။ ၵၢၼ်ၵဵပ်းငိုၼ်းၼႆႉ ဢမ်ႇ ၶဝ်ႈပဵၼ်တၢင်းၵၢၼ် ထုၵ်ႇႁၢမ်ႈမႃးယဝ်ႉၵမ်းၼိုင်ႈ။ ယူႇတီႈၾၢႆႇၸဝ်ႈၼႃႈတီႈၶဝ် ဢမ်ႇဢဝ်လိူင်ႈထိုင်တီႈလႄႈ တိုၵ်ႉသိုပ်ႇ မီးထႅင်ႈယူႇ” ဝႃႈၼႆ။

ၽွင်းၶၢဝ်းသွၼ်းၼမ်ႉ ပီၼႆႉ ယူႇတီႈလူင်ပွင်ၸိုင်ႈမိူင်းထႆး ပၼ်ၶႂၢင်ႉႁႅင်းၵၢၼ် မိူင်းႁူမ်ႈတုမ်၊ မိူင်းလၢဝ်းလႄႈ မိူင်းၵမ်ႇ ပူးၶျႃး ပွၵ်ႈမိူဝ်းသူႇၸႂ်းႁိူၼ်းယေးၽႂ်မၼ်း တႄႇဢဝ် ဝၼ်းတီႈ 5 ထိုင် 30 လိူၼ်ဢေႊပရိူဝ်ႊ။ ၵူၺ်းၵႃႈ ၽၵ်းတူ ၶဝ်ႈဢွၵ်ႇ ပဵၼ်တၢင်းၵၢၼ် တၢင်းမိူင်းႁူမ်ႈတုမ် ဢၼ်ႁႅင်းၵၢၼ် ပွၵ်ႈၶဝ်ႈ/ဢွၵ်ႇလႆႈတႄႉ လႅၼ်လိၼ် မျႃႉဝတီႇ – မႄႈသွတ်ႇလႄႈ တႃႈ ၶီႈလဵၵ်း – မႄႈသၢႆ ဝႃႈၼႆ။