ႁူင်းႁဵၼ်းၸၼ်ႉဢွၼ်ႇ တီႈဝၢၼ်ႈတႃႈတူၺ် (တာတွေ) ၸႄႈဝဵင်းမူႇၸေႊ ၺႃးၵူၼ်းသွၵ်ႈတဝ်လၵ်ႉၶူဝ်းၶွင် ၼႂ်းႁူင်းႁဵၼ်း ၽွင်းဢိုတ်းႁဵၼ်း ၶၢဝ်းသွၼ်းၼမ်ႉ။
ႁူင်းႁဵၼ်းၸၼ်ႉဢွၼ်ႇ ဝၢၼ်ႈတႃႈတူၺ်ၼႆႉ ယၢၼ်ၵႆဝဵင်းမူႇၸေႊ 50 လၵ်း ၺႃးၵူၼ်းလၵ်ႉၶဝ်ႈသွၵ်ႈတဝ် ႁွင်ႈယူႇသဝ်း ၶူးသွၼ်/ မေႃသွၼ် သွၵ်ႈတဝ်ဢဝ်ၵႂႃႇ ၶွင်ၵိၼ်ယႅမ်ႉ ၶူဝ်းၶွင် ၶူးသွၼ်ၶဝ်ၵႂႃႇ။
ၶူးသွၼ် တေႃႇတႄးတႄး ဝၢၼ်ႈတႃႈတူၺ် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်းဝၼ်းတီႈ 22 ၼၼ်ႉ ႁဝ်းၶႃႈ ပွၵ်ႈမႃးတီႈ မူႇ ၸေႊသေ ၽႅဝ်ႁွတ်ႈမႃးတီႈဝၢၼ်ႈ ဝႃႈတေမႃးတိတ်းသဵၼ်ႈမၢႆလုၵ်ႈႁဵၼ်းၽူႈဢွင်ႇပူၼ်ႉၸၼ်ႉၼႆသေ လႆႈႁၼ်ၽၵ်းတူ ႁွင်ႈလိုဝ်ႈသဝ်း ၶူးသွၼ် ၺႃးယႃႉၵွႆ။ လိူဝ်ၼၼ်ႉ ၼႂ်းႁွင်ႈႁဵၼ်းၵေႃႈ တဝ်ႈပီႊယႃႊမၢၵ်ႇမိူဝ်ဝႆႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ပဵၼ်ၽႂ် ၸုမ်းလႂ် မႃးၶဝ်ႈသွၵ်ႈတဝ်ဢၼ်ဝႃႈၼၼ်ႉ ယူႇတီႈၽူႈမီးပုၼ်ႈၽွၼ်း ၼႂ်းဝၢၼ်ႈၵေႃႈ လၢတ်ႈဝႃႈ ဢမ်ႇလႆႈႁူႉၸွမ်း ဝႃႈၼႆ။
ၶူးသွၼ်တေႃႇတႄးတႄး လၢတ်ႈဝႃႈ “ ၶူဝ်းၶွင်ၼႂ်းႁူင်းႁဵၼ်းတႄႉ ၶဝ်ဢမ်ႇဢဝ်သင်ၵႂႃႇ။ ၵူၺ်းၵႃႈ ၶဝ်သမ်ႉ မႃးသွၵ်ႈတဝ် ၼႂ်းႁွင်ႈသဝ်းၶူးသွၼ် ပေႃးလူႉလႅဝ်မၢၵ်ႇမိူဝ်ၵႂႃႇမူတ်း။ တႃႇတေၵိၼ်ၵေႃႈဢမ်ႇမီးသင်ယဝ်ႉ။ ၵဵဝ်ႇလူၺ်ႈလွင်ႈပဵၼ်ၸိူင်ႉၼႆ ႁဝ်းၶႃႈ ၶူးသွၼ် တႄႉ မႆႈၸႂ်၊ ဢမ်ႇမီးလွင်ႈႁူမ်ႇလူမ်ႈတွၼ်ႈတႃႇႁဝ်းၶႃႈ” ဝႃႈၼႆ။
တေႃႈလဵဝ် ႁိမ်းၸႄႈဝဵင်းမူႇၸေႊၼႆႉ သိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းၶၢင် KIA ၵေႃႈ ပဵၼ်ပၢင်တိုၵ်းၵၼ်။ လိူဝ် ၼၼ်ႉ ၼႂ်းၸႄႈဝဵင်းၼမ်ႉၶမ်းၵေႃႈ သိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း TNLA ၵေႃႈ လႆႈပဵၼ်ပၢင်တိုၵ်း ၵၼ်ထႅင်ႈ ဝႃႈၼႆ။
