ၾႆးမႆႈႁိူၼ်းလင်ၼိုင်ႈ တီႈဝၢၼ်ႈၼႃးပၢင်ႇ ဢိူင်ႇႁႃႈဝၢၼ်ႈ ၸႄႈဝဵင်းၵေးသီး မႆႈပႃးလုၵ်ႈဢွၼ်ႇ ဢႃယု 9 ၶူပ်ႇ တင်းတူဝ် တေႃႈလဵဝ် လႆႈယူတ်းယႃတူဝ်ဝႆႉတီႈႁူင်းယႃ ၵေးသီးႁိုင်ၼၢၼ်းလိူၼ်ပၢႆယဝ်ႉ ယင်းပႆႇႁၢႆၶႅၼ်း။ ပေႃႈမႄႈယၢပ်ႇၵိၼ်းၸႂ်။
ဝၼ်းတီႈ 24/04/2019 ဝၼ်းမိူဝ်ႈၼႆႉ ၸၢႆးလူး ၵေႃႉပဵၼ်ပေႃႈဢၼ်လုမ်းလႃး ၼွင်ႉၼူၼ်းပၢင်ႇ ယူႇတီႈႁူင်းယႃၵေးသီး ၼၼ်ႉ လၢတ်ႈၼႄၽူႈတွႆႇႁွၵ်ႈဝႃႈ ၼွင်ႉၼူၼ်းပၢင်ႇ ၶႅၼ်းၸိုၼ်ႈမႃးယဝ်ႉသေတႃႉ ပႆႇၸၢင်ႈလူင်းႁူင်းယႃလႄႈ ယၢပ်ႇ ၽိုတ်ႇ ၵႃႈယူတ်းယႃ တႃႇၵိၼ်တႃႇယူႇ လိူဝ်ႁႅင်း ဝႃႈၼႆ။
ၸၢႆးလူး လၢတ်ႈဝႆႉဝႃႈ “ ၼွင်ႉၼူၼ်းပၢင်ႇတႄႉ ယူႇလီၶိုၼ်ႈ မႃးယဝ်ႉၶႃႈ။ ပဵၼ်ႁွႆးၸဵပ်းႁွႆးယဵၼ်းဝႆႉ ပႆႇႁၢႆ။ ယၢမ်းလဵဝ်ၼႆႉ ၶႃႈ ႁဝ်းၵေႃႈ ဢမ်ႇၵိုတ်းလိူဝ်သင်ယဝ်ႉၶႃႈ ၾႆးမႆႈ ၵႂႃႇမူတ်းယဝ်ႉ။ လွင်ႈတေၵိၼ်တေယႅမ်ႉၵေႃႈ ဢမ်ႇၵိုတ်းလိူဝ်သင်ယဝ်ႉ။ ယွၼ်းတၢင်းၸွႆႈထႅမ် တီႈပီႈၼွင်ႉ ႁဝ်းၶႃႈ ၵေႃႉဢိတ်းၵေႃႉဢွတ်း ၵမ်ႉၸွႆႈထႅမ်ၽွင်ႈၶႃႈ၊ ၵႃႈယူတ်းယႃၵေႃႈ လႆႈသဵင်ႈၸၢႆႇ ယူႇၵူႈဝၼ်းၶႃႈ ၼိုင်ႈဝၼ်း 4-5 ႁဵင်။ မၢင် ဝၼ်း ၽႅဝ်မိုၼ်ႇ၊ မိုၼ်ႇပၢႆၵေႃႈလႆႈသဵင်ႈၶႃႈ” ဝႃႈၼႆ။
ၼွင်ႉၼူၼ်းပၢင်ႇၼႆႉ လႆႈယူတ်းယႃတူဝ်ဝႆႉတီႈႁူင်းယႃ ၵေးသီး မီးၶၢဝ်းတၢင်းလိူၼ်ပၢႆယဝ်ႉ။ ၵေႃႉ ပဵၼ်ၼၢႆး ၸိုဝ်ႈႁွင်ႉ ပႃႈ ယဵၼ်ႇတႄႉ ၾႆးႁုပ်ႈမႆႈယူႇ ၵူၺ်းဢမ်ႇတၼ်းပဵၼ်ႁႅင်း တေႃႈလဵဝ်တႄႉ ၶႅၼ်းလီၶိုၼ်ႈမႃးယဝ်ႉ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 22/03/2019 ယၢမ်းၵၢင်ၶိုၼ်း မွၵ်ႈ 2 မူင်းၼၼ်ႉ ၾႆးမႆႈႁိူၼ်း ၸၢႆးလူး လႄႈ ၼၢင်းသူၺ်ႇၸိင်ႇ တီႈ ဝၢၼ်ႈၼႃးပၢင်ႇ ဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းသေ ၵေႃႉပဵၼ်ၼၢႆး ၸိုဝ်ႈႁွင်ႉ ၼၢႆးယဵၼ်ႇလႄႈ လၢၼ်ယိင်းၼွင်ႉၼူၼ်းပၢင်ႇ ဢႃယု 9 ၶူပ်ႇ ထုၵ်ႇၾႆးမႆႈတင်းသွင် ၼၢႆးလၢၼ်။
ၸၢႆးလူး လၢတ်ႈဝႃႈ “ ၾႆးၼႆႉ မၼ်းတႄႇမႆႈမႃးတီႈ သွင်ႇၾႆးဢွၼ်တၢင်း ယဝ်ႉၵေႃႈ ၸင်ႇလၢမ်းမႆႈႁိူၼ်း။ မႆႈႁိူၼ်း တင်းလင် သေဢမ်ႇၵႃး မႆႈပႃးၶဝ်ႈၵိၼ်တင်းမူတ်းၶႃႈယဝ်ႉ တေႃႈလဵဝ် တႃႇတေၵိၼ် တေယူႇတႄႉ ဢမ်ႇမီးယဝ်ႉ” ဝႃႈၼႆ။
ၽွင်းၾႆးမႆႈ ႁိူၼ်းလႄႈ မႆႈပႃးၼွင်ႉၼူၼ်းပၢင်ႇ ၶႃၼၢႆးလၢၼ်ၼၼ်ႉ ၸၢႆးလူးတင်းၼၢင်းသူၺ်ႇၸိင်ႇ ၶႃၽူဝ်မေးသမ်ႉ ၸင်ႇႁႃၶဝ်ႈၵႂႃႇႁဵတ်းၵၢၼ်တီႈမိူင်းထႆး ယင်းပႆႇလႆႈငိုၼ်းတွင်းသင်၊ မိူဝ်ႈလႆႈငိၼ်းၶၢဝ်ႇၼႅတ်ႈပွၵ်ႈမိူဝ်းၶိုၼ်းႁိူၼ်းလႄႈ ၸင်ႇလႆႈယၢပ်ႇၽိုတ်ႇငိုၼ်းတွင်းတႃႇယူတ်းယႃၵၼ် ဝႃႈၼႆ။
သင်ဝႃႈ ၽူႈမီးၼမ်ႉၸႂ်ၸေႇတၼႃႇ ၶႂ်ႈၵမ်ႉထႅမ်ၸွႆႈၸိုင် ၵပ်းသိုပ်ႇလႆႈတီႈမၢႆၾူၼ်း ၵေႃႉပဵၼ်ၸၢႆးလူး ပေႃႈၼွင်ႉၼူၼ်း ပၢင်ႇ မၢႆၾူၼ်း(မၢၼ်ႈ) 09267043658 လႆႈယူႇ ၼႆယဝ်ႉ။
