ႁွင်ႈၵၢၼ်ၾၢႆႇႁႅင်းၵၢၼ်လူင်ပွင်ၸိုင်ႈမိူင်းထႆးလႄႈ ၾၢႆႇတူင့်ၼိုင်လွင်ႈႁႅင်းၵၢၼ်ႁူပ့်ထူပ်းဢုပ်ႇဢူဝ်းၵၼ် တႃႇႁူမ်ႈ ၵၼ်ၵႄႈလိတ်ႈပၼ်ႁႃ ႁႅင်းၵၢၼ်လႄႈ ယုၵ့်မုၼ်းၸၢတ်ႈပၢၼ်ႁႅင်းၵၢၼ်။

ဝၼ်းတီႈ 19/04/2019 ၸဝ်ႈၼႃႈတီႈႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆးလႄႈ ၸဝ်ႈၼႃႈတီႈၽူႈမီးပုၼ်ႈၽွၼ်းၾၢႆႇႁႅင်းၵၢၼ်ယၢၼ်မိူင်း ႁူပ့်ထူပ်းဢုပ်ႇဢူဝ်းၵၼ် တီႈမိူင်းၵွၵ်ႇ ၸိုင်ႈထႆး။ တီႈၼႂ်းပၢင်ၼၼ့် ယူႇတီႈ ၸုမ်းတူင့်ၼိုင်ၾၢႆႇႁႅင်းၵၢၼ်ယၢၼ်မိူင်း လႆႈဢဝ်ႁူဝ်ၶေႃႈဢၼ်ႁႅင်းၵၢၼ်ယၢၼ်မိူင်း ထုၵ်ႇလီလႆႈႁပ့်လႄႈ ပၼ်ႁႃ ဢၼ်လႆႈႁူပ့် ထူပ်းၸိူဝ်းၼႆ့မႃးၶဝ်ႈဢုပ်ႇ မိူၼ်ၼင်ႇလွင်ႈထတ်းထွင်ၵူၼ်းၵိုၵ်းမိူင်း၊ လွင်ႈၼႃႈၵၢၼ်ဢၼ်ႁႄ့ႁၢမ်ႈ  ႁႅင်းၵၢၼ်ႁဵတ်း၊ ႁႂ်ႈႁႅင်းၵၢၼ် ၸိူဝ်းဢၼ်ယိပ်းဝႂ် CI ၼၼ့် ႁဵတ်းဝႂ်ၶပ်းၶီႇလႆႈ၊ လွင်ႈႁႂ်ႈတိူဝ်းပၼ်ဢႃယုဢႃသၢၵ်ႈ   ႁႅင်းၵၢၼ်ယၢၼ်မိူင်း၊ ၵၢၼ်ဢွၵ်ႇဝႂ်ၶႂၢင့်ပၼ်ၽူႈႁဵတ်းၵၢၼ်တူင်ႇဝူင်းၵူၼ်း ၸိူဝ်းၼႆ့။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈႁႅင်းၵၢၼ်ယၢၼ်မိူင်း HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁဝ်းၶႃႈၵဵပ်းႁွမ် ၶေႃႈမုလ်း ပၼ်ႁႃဢၼ်ႁႅင်းၵၢၼ်ယၢၼ်မိူင်းလႆႈႁူပ့်ထူပ်းယူႇယၢမ်းလဵဝ်လႄႈ တႃႇႁႂ်ႈႁႅင်းၵၢၼ်ယၢၼ်မိူင်း လႆႈႁပ့်သုၼ်ႇ လႆႈသုၼ်ပဵၼ် ၼင်ႇဢၼ်ထုၵ်ႇလႆႈႁပ့်ၼၼ့်သေ မႃးတၢင်ႇယိုၼ်ႈထိုင် ၾၢႆႇႁွင်ႈၵၢၼ်လူင်ၾၢႆႇ ႁႅင်းၵၢၼ်  မိူင်းထႆးၼႆ့ဢေႃႈ” ဝႃႈၼႆ။

တီႈၼႂ်းမိူင်းၸိုင်ႈထႆးၼႆႉ မီးႁႅင်းၵၢၼ်ယၢၼ်မိူင်းဢၼ်လုၵ်ႉမႃးတၢင်းမိူင်းလၢဝ်း၊ ၵမ်ႊပူႊၶျႃႊလႄႈ မိူင်းႁူမ်ႈတုမ် မၢၼ်ႈ မႃးႁဵတ်းၵၢၼ်ၼပ်ႉဢၢၼ်ႇႁူဝ်လၢၼ့် ၊ မၢင်ၸိူဝ်းၵေႃႈ ဢမ်ႇလႆႈႁပ့်ၵႃႈၸၢင်ႈၸွမ်းၼင်ႇ လူင်ပွင်ၸိုင်ႈမၵ်းမၼ်ႈ၊ ႁဵတ်းၵၢၼ်ဢမ်ႇလႆႈငိုၼ်းၸိူဝ်းၼႆ့။ ယူႇတီႈၸုမ်းတူင့်ၼိုင်ၾၢႆႇႁႅင်းၵၢၼ်လႄႈ လူင်ပွင်ၸိုင်ႈထႆး ၶတ်းၸႂ်ႁႃလၢႆးတၢင်းၵႄႈလိတ်ႈပၼ်ႁႃ ၶၢတ်ႇၵူၼ်းႁဵတ်းၵၢၼ်လႄႈ ႁႂ်ႈႁႅင်းၵၢၼ်ထုၵ်ႇမႅၼ်ႈၸွမ်းၼင်ႇပၵ်းပိူင်မၢႆမီႈ ႁူမ်ႈပႃးထိုင်ႁႂ်ႈႁႅင်းၵၢၼ်ယၢၼ်မိူင်းၵႆယၢၼ်ယႃႈမဝ်းၵမ်ၼႆယဝ့် ။